«Փառք Աստծո, տրամադրությունս «հզոր» է, ամեն ինչ նորմալ է, հոգեվիճակս՝ նույնպես»։ Այս մասին NEWS.am Sport-ի թղթակցի հետ զրույցում ասաց հուլիսի 31-ին օլիմպիական մրցահարթակ դուրս եկող ծանրամարտի Եվրոպայի չեմպիոն ու աշխարհի փոխչեմպիոն Առաքել Միրզոյանը:
69կգ քաշայինների պայքարը կմեկնարկի Երեւանի ժամանակով 22:00-ին։
Հիշեցնենք, որ Առաքել Միրզոյանը 2009 թվականի աշխարհի առաջնությունում արծաթե մեդալ նվաճեց, որից հետո նրա մարզական կարիերայում եղավ երկարատեւ դադար առողջական խնդիրների պատճառով: Մարզաշխարհ վերադարձավ 2011թվականին՝ մասնակցություն ցուցաբերելով աշխարհի առաջնությունում: Այս մրցաշարում Առաքել Միրզոյանը հանդես էր գալիս 77կգ քաշային կարգում: Սակայն լավ արդյունք չցուցաբերեց: Աշխարհի առաջնությունից հետ ծանրորդը վերադարձավ 69 կգ քաշային կարգ:
Նախքան օլիմպիական մեկնարկը NEWS.sm Sport-ի թղթակիցը զրուցել է Առաքել Միրզոյանի հետ։
Առաքել մի քանի ժամ է մնացել մեկնարկիդ: Ի՞նչ տրամադրություն ունես:
Փառք Աստծո, տրամադրությունս «հզոր» է, ամեն ինչ նորմալ է, հոգեվիճակս՝ նույնպես:
Այս մի քանի ժամը լարվածություն չի առաջացնո՞ւմ: Ի՞նչն է զբաղեցնում միտքդ այս ժամերին:
Չեմ լարվում: Միտքս իսկապես զբաղված է: Միտքս զբաղված է միայն նրանով, որ մեր ժողովրդին եւ ընտանիքիս այսօր կարողանամ ուրախացնել:
Առաքել, Հայաստանը մեդալ դեռ չի նվաճել: Այսօր բոլորը սպասում են քո ելույթին եւ մեծ հույսեր կապում քեզ հետ՝ ակնկալելով մեդալ: Սա պարտավորեցնո՞ւմ է:
Իհարկե, այն էլ ինչքան է պարտավորեցնում: Այս պահին եւ այսօր ծանրաձողին մոտենալու պահին միտքս միայն զբաղված կլինի նրանով, որ հաղթանակ պարգեւեմ իմ ազգին: Իսկ հաղթանակը, որը կպարգեւեմ իմ ազգին եւ իմ ընտանիքին, ինձ կպարգեւի գերագույն հաճույք: Մնում է միայն, որ Աստված իմ կողմից լինի:
Զրուցեց Լուսինե Շահբազյանը
Հետևեք NEWS.am SPORT-ին Facebook-ում, Twitter և Telegram-ում