16:07  +04,  11 հունիսի, 2017

Գեւորգ Ալեքսանյանը՝ Թբիլիսիի սկանդալի մասին. Արթուրն իջավ մրցագորգից եւ կանխեց մեծ բախում, իսկ նրան որակազրկեցին

Արթուրը գորգից հեռացավ  գորգի անկյունում հայերի եւ վրացիների միջեւ ծագած վիճաբանության մասնակիցներին հանդարտեցնելու համար, այլապես վատ ավարտ կունենար, իսկ այդ ընթացքում 2-3  րոպե կանգնեցված էր գոտեմարտը:  Գլխավոր մրցավարն ազգությամբ թուրք էր, գորգում գործող օլիմպիական չեմպիոնն էր, բնական է, որ այս միջադեպից վրացիները պետք է օգտվեին: Այս հարցին պետք է լուծում տալ. մենք անպաշտպան ենք միջազգային մրցասպարեզում:

Այս մասին NEWS.am Sport-ի թղթակցի հետ զրույցում Թբիլիսիից ասաց Ռիո-2016-ի օլիմպիական չեմպիոն Արթուր Ալեքսանյանի անձնական մարզիչ Գեւորգ Ալեքսանյանը՝ մեկնաբանելով Թբիլիսիում ընթացող վրացի լեգենդար ըմբիշներ Վախթանգ Բալավաձեի եւ Գիվի Կարտոզիայի անվան մրցաշարում հունիսի 10-ին Արթուր Ալեքսանյանի որակազրկումն ու պատճառները:

Ռիո-2016-ի օլիմպիական չեմպիոն Արթուր Ալեքսանյանը 3 տպավորիչ հաղթանակ տանելուց հետո դուրս եկավ 98 կգ քաշային կարգի եզրափակիչ, որը սկանդալով եւ հայ ըմբիշի որակազրկմամբ ավարտվեց:

«Արթուր Ալեքսանյանի գոտեմարտի ժամանակ գորգի մրցավարը անիմաստ միավոր տվեց Արթուրի մրցակցին, ինչը տրիբունայում բողոքի ալիք բարձրացրեց: Մինչ Արթուրը փորձում էր հետ վերադարձնել միավորները, գորգի ներքեւում Արթուրի գոտեմարտին հետեւող հայերի եւ տրիբունայում ներկա վրացիների միջեւ կռիվ հասունացավ եւ պատճառը վրացուն միավորներ նվիրելն էր: Այդ ժամանակ գոտեմարտը կանգնեցվեց:

Կռվին միացել էին նաեւ մեր թիմի տղաները եւ որպեսզի բարձրացած աղմուկը չվերածվի ծեծկռտուքի, Արթուրը մի պահ հեռացավ գորգից՝ հանգստացնելու կռվի բռնվածներին, այդ թվում եւ մեր թիմի տղաներին: Այդ ամենը մի քանի վայրկյան տեւեց, ինչը առիթ հանդիսացավ, որպեսզի եւս 2 միավոր ավելացնեին  վրացի Ռեւազ Նադարեիշվիլիին եւ հաղթանակը նվիրեն վրացուն: Մենք փորձեցինք բողոքարկել, բայց քանի որ մրցման գլխավոր մրցավարը թուրք էր, հասկանալի էր, որ ոչինչ փոխել հնարավոր չէր»,- ասաց Գեւորգ Ալեքսանյանը:

Արթուր Ալեքսանյանի հայրն ու անձնական մարզիչը մանրամասնեց, թե ինչպես է եղել վրացու նկատմամբ մրցավարների բացահայտ դրական վերաբերմունքը:  

 «Ամբողջ 5 րոպե 16 վայրկյանի ընթացքում վրացի ըմբիշը միայն պաշտպանվում էր եւ փորձում ուղղակի միավոր չտալ: Նա շատ պասիվ էր  պաշտպանվում: Իսկ մրցավարները,  հակառակ,  պասիվություն տվեցին Արթուրին ու երկու միավոր շռայլեցին վրացուն: Դրանից էլ հանդիսատեսը վրդովվեց եւ վիճաբանություն ծագեց, քանի որ, նույնիսկ հանդիսատեսը համաձայն չէր այդ մրցավարության հետ: Վեճին մասնակցում էր նաեւ Վրաստանի ըմբշամարտի ֆեդերացիայի գլխավոր քարտուղարը, ով իրեն շատ վատ պահեց: Նա էր կռիվ հրահրողներից մեկը նաեւ: Այդ ընթացքում 2-3 րոպե կանգնեցրեցին գոտեմարտը, որպեսզի հարթվի լարված իրավիճակը:

Այդ ընթացքում, երբ կանգնեցրին գոտեմարտը, Արթուրը դեռ գորգի վրա էր: Տեսնելով, որ ավելի է թեժանում կռիվը, Արթուրն իջավ գորգից՝ կռիվը կանխելու: Հանդիսատեսն արդեն գորգ էր դուրս գալիս, քանի որ ոչ ոք համաձայն չէր այդ անարդար մրցավարության հետ: Ինչ ուզում, անում էին մրցավարները: Արթուրն իջավ, ժողովուրդը հանգստացավ, հանդարտվեց, վերադարձան տրիբունաներ, Արթուրն էլ վերադարձավ գորգ, որպեսզի շարունակի գոտեմարտը: Իսկ գլխավոր մրցավարը հայտարարեց, որ հաղթանակը տրվում է վրացուն, քանի որ Արթուր Ալեքսանյանը լքել է գորգը:

Գոտեմարտի ավարտին մենք մոտեցանք գլխավոր մրցավարին՝ թուրքին, ով նաեւ օլիմպիական մրցավար է, փորձեցինք բացատրել, որ այդ ընթացքում այսպես, թե այնպես կանգնեցված էր գոտեմարտը, Արթուրն էլ իսկապես կանխեց լուրջ բախումը, մրցավարը հայտարարեց, որ իր որոշումը բեկման ենթակա չէ»,- նշեց Գեւորգ Ալեքսանյանը:

Մարզիչի խոսքով,  Արթուր Ալեքսանյանի գորգից դուրս գալն օգնեց խուսափել լուրջ հետեւանքներից, քանի որ կռիվը կարող էր շատ վատ ավարտ ունենալ:

«Արթուրը չի մասնակցել այդ վեճին եւ վարվել է այնպես, ինչպես կվարվեր յուրաքանչյուր հայ տղամարդ, քանի որ վիճաբանության մեջ էին հայերը: Իսկ մրցման մրցավարներին մնում էր միայն օգտվել այս հնարավորությունից, քանի որ գորգի վրա օլիմպիական չեմպիոնն էր եւ նրան պետք էր այսպիսի սկանդալով եւ անարդարությամբ հաղթել: Թող արդար պայքար լիներ, արդար մրցավարություն լիներ, տեսնեինք՝  կկարողանա՞ր վրացի ըմբիշը հաղթել Արթուրին:

Բայց միեւնույն է, ոչինչ այլեւս չկարողացանք փոխել: Ինձ արդեն լուրջ անհանգստացնում է այս իրավիճակը, մրցավարների եւ, մասնավորապես, այդ թուրք մրցավարի վերաբերմունքն ու անօրինական գոործողությունները մեր ըմբիշների նկատմամբ, քանի որ սա առաջին դեպքը չէ, կարծում եմ, որ վերջինն էլ չէ: Մենք պաշտպանված չենք, մեր մարզիկները պաշտպանված չեն: Ամեն անգամ այսպես անարդար մրցավարություն է լինում, անօրինական բան են անում մեր նկատմամբ եւ մենք չենք կարողանում պաշտպանել մեր իրավունքները: Արդեն ժողովուրդն է դուրս գալիս մրցագորգ եւ ցանկանում պաշտպանել մեր ըմբիշներին: Առջեւում աշխարհի առաջնությունն է: Եթե այս նույն մրցավարը դատի նաեւ աշխարհի աառաջնությունը, ես չգիտեմ մենք ինչ պետք է անենք: Արդեն ժամանակն է, որ այս հարցին լուծում տրվի:

Արթուրին որակազրկեցին այս մրցաշարից, նրան զրկեցին նաեւ արծաթե մեդալից: Աշխարհի առաջնության եւ մյուս մրցաշարերի վրա այս որակազրկումն ու միջադեպը ոչ մի ազդեցություն չի ունենա: Մենք կնախապատրաստվենք աշխարհի առաջնությանը: Կարծում եմ՝ վրացի ըմբիշի հետ դեռեւս առիթ կլինի հանդիպել գորգում եւ իրական հաղթողին պարզել»,- մանրամասնեց օլիմպիական չեմպիոնի հայրը:

Լուսինե Շահբազյան

Հետևեք NEWS.am SPORT-ին Facebook-ում և Twitter-ում


Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

  • Այս թեմայով


  • Հարցում
Քվեարկել են (12)
  • Ֆեյսբուք
  • NEWS.am Sport Exclusive
  • Արխիվ