Զիդան. Օրեցօր մոտենում ենք չեմպիոնությանը

Մադրիդի «Ռեալի» գլխավոր մարզիչ Զինեդին Զիդանը մեկնաբանել է ֆուտբոլի Իսպանիայի առաջնության նախավերջին տուրում «Սեւիլիայի» նկատմամբ տնային հաղթանակը 4:1 հաշվով:

«Իսպանիայի առաջնությունում հաղթելը շատ բարդ է, սակայն մենք ամեն օր ավելի ենք մոտենում դրան: Մնացել է ընդամենը 2 խաղ, կփորձենք շարունակել նույն ոգով: Այս խաղում մենք հրաշալի սկսեցինք եւ հաղթեցինք արժանիորեն: Կեյլոր Նավասը մի քանի անգամ փրկեց թիմին, իսկ հետո փոխարինողներն ավելացրին կայունություն, եւ մենք ցուցադրեցինք հրաշալի ֆուտբոլ:

Ինչ վերաբերում է Ռոնալդուին, ապա նա ունի այն, ինչը չունեն մյուսները: Նա միշտ «Ռեալին» օգնում է կարեւոր պահերին»,- մարզիչի խոսքը մեջբերում է AS-ը:

Հիշեցնենք, որ «Բարսելոնան» ու «Ռեալը» վաստակել են 85-ական միավոր, սակայն Արքայական ակումբը մեկ հանդիպում պակաս է անցկացրել: Մայիսի 21-ին կայանալիք վերջին տուրում կատոլանական ակումբը կընդունի «Էյբարին», իսկ մադրիդցիները կհյուրընկալվեն «Մալագային»: «Ռեալը» «Սելտայի» հետ հետաձգված հանդիպումը կանցկացնի մայիսի 17-ին Վիգոյում:

Հետևեք NEWS.am SPORT-ին Facebook-ում, Twitter և Telegram-ում