Ալեքսանդր Բորոդյուկ. Հայ ֆուտբոլիստները միշտ առանձնացել են լավ տեխնիկայով

Ֆուտբոլի Ղազախստանի հավաքականի գլխավոր մարզիչ Ալեքսանդր Բորոդյուկը Երեւանում կայացած նախախաղային ասուլիսում խոսեց Հայաստանի թիմի դեմ աշխարհի առաջնության առաջիկա ընտրական հանդիպման մասին:

«Հայաստանի եւ Կիպրոսի հավաքականները նման են տեխնիկայի առումով: Դեռ խորհրդային ժամանակներից այստեղի խաղացողներն առանձնացել են լավ տեխնիկայով: Կիպրոսում կայացած ընկերական խաղում առաջին խաղակեսը լավ խաղացինք, հետո թույլ տվեցինք սխալներ: Այդ խաղն արդեն անցյալում է: Մենք հավաքվել ենք եւ քննարկել այդ խաղը: Հուսով եմ՝ այս խաղում թույլ չենք տա այդպիսի սխալներ եւ կհասնենք ավելի լավ արդյունքի:

Ֆուտբոլ խաղում են 11 խաղացողներ: Ցանկացած թիմում կան առաջատարներ ու աստղեր: Հենրիխ Մխիթարյանը ձեր թիմի առաջատարն է, սակայն դաշտում խաղում է թիմը: Միայն թիմը կարող է լուծել լուրջ խնդիրներ: Պետք է արժանի խաղով ուրախացնենք մեր երկրպագուներին: Թիմի համար կարեւոր են նաեւ նրանք, ովքեր չեն խաղում:

Խաղի ծրագրի մասին չեմ խոսի, քանի որ դա չեն նշում խաղից առաջ: Մեր միակ ծրագիրը հաղթելն է: Տակտիկական նրբությունների մասին քննարկվում է միայն թիմի ներսում:

Չգիտեմ՝ ինչ խաղ սպասել Հայաստանի հավաքականից: Հուսով եմ, որ վաղը 2 թիմերն էլ կցուցադրեն որակյալ ֆուտբոլ, սակայն այսպիսի խաղերում առաջին հերթին ընդգծվում է վարպետությունը: Հուսով եմ՝ վաղը երկրպագուները կտեսնեն հետաքրքիր ու լուրջ հանդիպում:

Այժմ փորձում եմ իմ ֆուտբոլային փորձը փոխանցել խաղացողներին: Ղազախստանի թիմում կան տաղանդավոր տղաներ, որոնք աստիճանաբար կցուցադրեն իրենց լավագույն որակները: Ինձ համար գլխավորն այն է, որ խաղացողները հասկանան՝ հավաքականում պաշտպանում են իրենց երկրի մարզական պատիվը: Մենք հետեւելու ենք Ղազախստանի երիտասարդ ֆուտբոլիստներին: Գրանատկինի մրցաշարը ցույց տվեց, որ ունենք տաղանդավոր երիտասարդներ»,- ասաց ռուս մասնագետը:

Հայաստան - Ղազախստան խաղը կկայանա մարտի 26-ին Երեւանի «Հանրապետական» ստադիոնում եւ կսկսվի ժամը 20:00-ին:

Դավիթ Եղիազարյան

Լուսանկարն՝ Արսեն Սարգսյանի

Հետևեք NEWS.am SPORT-ին Facebook-ում, Twitter և Telegram-ում