Շախմատի աշխարհի առաջնությունում բրոնզե մեդալը շատ լավ արդյունք է, չնայած առաջնությունում իմ եւ Վլադիմիր Հակոբյանի վատ խաղին։ Կաշկանդված էինք խաղում, բայց պետք է դրական վերաբերվենք բրոնզե մեդալին։
Այս մասին ասել է Հայաստանի հավաքականի անդամ Սերգեյ Մովսեսյանը՝ ամփոփելով Ծաղկաձորում ավարտված աշխարհի թիմային առաջնությունը:
Հիշեցնենք, որ աշխարհի չեմպիոն է դարձել Չինաստանի թիմը, արծաթե մեդալը նվաճել է Ուկրաինայի հավաքականը, իսկ Հայաստանի հավաքականը բավարավել է բրոնզե մեդալով։
«Ես ինքս մեր հավաքականից, մեր խաղից սպասում էի ավելի բարձր արդյունք: Մրցաշարից առաջ ասել էինք, որ այստեղ ամենաուժեղ թիմերն են խաղում: Առաջնության բոլոր պարտիաները ապացուցեցին, որ այստեղ թույլ թիմ չկար: Մասնավորապես, վերջին երկու տուրերում բոլոր պարտիաները շատ բարդ էին:
Սկզբում մեր մոտ լավ չէր ստացվում խաղը, բայց հետո ամեն ինչ տեղն ընկավ: Կարծում եմ՝ աշխարհի առաջնությունում երրորդ տեղի արդյունքը շատ լավ է՝ հաշվի առնելով այն, որ լավ չսկսեցինք մրցումը: Սկզբում հույսերն այդքան էլ բարձր չէին: Երրորդ-չորրորդ տուրից հետո հասկացանք, որ ոսկե մեդալի հնարավորություն չունենք:
Ես եւ Վլադիմիր Հակոբյանը լավ չխաղացինք այս առաջնությունում, բայց թիմն ապացուցեց, որ կարող է եւ օգնեց մեզ։ Պատվով կարողացանք դուրս գալ այս բարդ իրավիճակից:
Համարում եմ, որ լավ ավարտվեց մեզ համար այս առաջնությունը: Այս մրցաշարն ապացուցեց, որ նույնիսկ վերջին պահին կարող է ամեն ինչ փոխվել, որ մրցաշարերում ամեն ինչ հնարավոր է: Բրոնզե մեդալը գուցե մեզ չի ուրախացրել, բայց պետք է դրական վերաբերվենք բրոնզե մեդալին»,- ասաց Սերգեյ Մովսեսյանը:
Աշխարհի առաջնությունում Սերգեյ Մովսեսյանը 7 հնարավորից վաստակեց 2.5 միավոր, Վալդիմիր Հակոբյանը չորս հնարավորից՝ 1 միավոր:
Լուսինե Շահբազյան
Ֆոտո՝ tsaghkadzor2015.fide.com
Հետևեք NEWS.am SPORT-ին Facebook-ում, Twitter և Telegram-ում