Հակոբ Սերոբյան. Սպասվածից ավելին էր, մինչեւ հիմա չեմ հավատում

Սպասվածից ավելին եղան մեր արդյունքները: 4-ից 4, 100 տոկոսանոց արդյունք:  Մինչեւ հիմա չեմ հավատում:

Այսպես «Զվարթնոցում» իր գլխավորած թիմի արդյունքներն աշխարհի առաջնությունում գնահատեց սպորտային մարմնամարզության Հայաստանի հավաքականի գլխավոր մարզիչ Հակոբ Սերոբյանը:

Հայաստանի հավաքականի գլխավոր մարզիչը նախորդ գիշեր աշխարհի չեմպիոնների, թիմի հետ Ռոտերդամից վերադարձավ հայրենիք:

«Սպասվածից ավելին եղան մեր արդյունքները: Երկու մեդալ էինք սպասում: Պատրատ էինք, տղաները գիտեին, որ իրենք պետք է լավ մասնակցեն: Ուղղակի՝ սպասվածից շատ ստացվեց: Միշտ այդպես է լինում. ասում ենք այսքան մեդալի ակնկալիք ունենք եւ ավելին ենք անում: Երկու աշխարհի չեմպիոն ունենալը, 4 մասնակից, բոլորը եզրափակիչի դուրս եկած արդեն մեծ արդյունք է: Ցանկացած երկիր աշխարհի առաջնություն եզրափակիչ մեկ մասնակից ունենալը մեծ բան է: 4-ից 4 եղավ,  100 տոկոսանոց արդյունք: Անկեղծ ասած, չէի հավատում, մինչեւ հիմա էլ չեմ հավատում: Շատ լավ էր:

Մեր աշխատանքը մենք չէ, որ պետք է գնահատենք, թող ուրիշները գնահատեն: Շնորհակալ եմ բոլորին»,- ասաց Հակոբ Սերոբյանը:

Հիշեցնենք, որ հոկտեմբերի 17-25-ը Նիդերլանդների Ռոտերդամ քաղաքում անցկացված սպորտային մարմնամարզության աշխարհի առաջնությունում Հակոբ Սերոբյանի գլխավորած հավաքականը 4 մասնակցով նվաճեց 4 մեդալ՝ երկու ոսկի եւ երկու բրոնզ:

Առաջին անգամ աշխարհի չեմպիոն հռչակվեց Համլետ Մանուկյանը: 19-ամյա մարմնամարզիկը նժույգ թափեր վարժության եզրափակիչում ոսկե մեդալակիր դարձավ 15.300 միավորով:

Արթուր Դավթյանը երկրորդ անգամ հռչակվեց աշխարհի չեմպիոն: Հենացատկի վարժության եզրափակիչում Դավթյանը երկու փայլուն ցատկերի հանրագումարում վաստակեց 14.850 միավոր:

Նժույգի վարժությունում բրոնզե մեդալակիր դարձավ Մամիկոն Խաչատրյանը` 15.000 միավոր:

Օղակների վարժությունում Արթուր Ավետիսյանը արժանացավ բրոնզե մեդալի՝ 14.233 միավոր: Սա նրա առաջին մեդալն է աշխարհի առաջնություններում:

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում