ՀՖՖ փոխնախագահ Արմեն Նիկողոսյան. Արթուր Սողոմոնյանը պաթոլոգիկ ստախոս է

Արթուր Սողոմոնյանը պաթոլոգիկ ստախոս է: Ես գտել եմ նրա ախտորոշումը, նա հիվանդ է: Նրա պնդումների 99.9 տոկոսը սուտ են:

Այս մասին NEWS.am Sport-ի թղթակցի հետ զրույցում ասաց ՀՖՖ փոխնախագահ Արմեն Նիկողոսյանը:

«Փյունիկ« ֆուտբոլային ակումբի նախկին սեփականատեր Արթուր Սողոմոնյանը հերթական մեղադրանքներն է ներկայացրել ՀՖՖ ղեկավարության նկատմամբ: Ըստ նրա, ֆեդերացիայում այժմ ստուգումներ են եւ կա ձերբակալված անձ: 

Պարոն Նիկողոսյան, Արթուր Սողոմոնյանի եւ ֆեդերացիայի առճակատումը դեռ շարունակվում է: Այժմ ի՞նչ խնդիր կա ակումբի նախկին նախագահի հետ: Ինչո՞ւ չեն հանդարտվում կրքերը:

Մոտ 2,5 տարի Արթուր Սողոմոնյանը խոսում է ֆուտբոլի ֆեդերացիայի ղեկավարներից, կոնկրետ նախագահից, փոխնախագահից: Այդքան ժամանակ նա ամեն ինչով փորձում է մեղադրանքներ ներկայացնել ֆեդերացիայի գործունեության վերաբերյալ: Մենք գրեթե չենք պատասխանում: Ես անձամբ 1-2 անգամ եմ պատասխանել այդ մարդուն, քանի որ անձնամբ նրան լավ չեմ ճանաչում: Ինձ միշտ հետաքրքրել է, թե ինչու է այդքան խոսում: Տարբեր վարկածներ էի ինձ համար մտածում: «Փյունիկ» ակումբը վաճառեց, մտածեցի՝ վերջապես այս մարդը կհանգստանա, այլեւս մեր մասին չի խոսի: Նա արդեն կապ չունի ֆուտբոլի հետ, բայց ուշքն ու միտքը Արմեն Մելիքբեկյանն է եւ Արմեն Նիկողոսյանը:

Ունեմ արդեն բնորոշում, թե ինչ է իրենից ներկայացնում Արթուր Սողոմոնյան մարդը: Առաջին հերթին ես պետք է հասկանայի նրա հիվանդության բնորոշումը, որովհետեւ կարծում եմ՝ նա հիվանդ է: 2,5 տարի Արթուր Սողոմոնյանը տարբեր հարթակներով վճարովի հիմունքներով խոսում է, բայց նրա պնդումների 99.9 տոկոսը սուտ են:

Ձեր եւ ֆեդերացիայի հասցեին հնչեցված մեղադրանքների ու պնդումների սուտ լինելը կհիմնավորե՞ք:  

Չեմ ցանկանում պատասխանել Արթուր Սողոմոնյան անձին: Պատասխանում եմ հայկական ֆուտբոլով հետաքրքրվող լսարանին: Նախկինում էլ հանել էի նրա ստերի շարանը, բայց կանդրադառնամ վերջին հարցազրույցի մի քանի կետի:

Մինչեւ 2022 թ. հոկտեմբերի 19-ը Արթուր Սողոմոնյանը, «Փյունիկ» ֆուտբոլային ակումբը բացառապես միայն շնորհակալություն են հայտնել ֆուտբոլի ֆեդերացիային: Այդ մասին կան բազմաթիվ փաստեր, հրապարակումներ նրանց սոցիալական էջերում: Ֆեդերացիան մշտապես աջակցություն է ցույց տվել բոլոր այն խնդիրներին, որոնք բարձրացվել են: Օգնությունը եղել է կազմակերպչական հարցերով, ֆուտբոլիստներին գրանցելու, խաղերը կազմակերպելու, «Փյունիկի» նախապատրաստական, ընդհուպ մինչեւ հսկայական ֆինանսական աջակցություն, որը չուներ «Փյունիկը» խաղերին մեկնելու համար. խոսքը 100 միլիոն դրամի մասին է: Բոլոր հնարավոր միջոցներով ֆեդերացիան աջակցել է ակումբին եւ դա բնական է, քանի որ մեր աշխատանքն է, որն անում ենք Հայաստանը ներկայացնող յուրաքանչյուր ակումբի նկատմամբ: Հետո, չգիտես ինչու, շատ լավ հիշում եմ՝ «Սլովանին» պարտվելուց հետո մեղադրանքների տարափ սկսվեց ֆեդերացիայի ղեկավարների հասցեին:

Ասում է, որ ֆեդերացիան իրեն եւ «Փյունիկին» ճնշել է: Սուտ է ասում, որովհետեւ միակ թիմը, որը Արմեն Մելիքբեկյանի ղեկավարության ընթացքում երկու անգամ դարձել է չեմպիոն, «Փյունիկն» է: Ակումբի աղջիկների թիմը, տարբեր տարիքային խմբերի թիմեր դարձել են չեմպիոններ: Ինչ ճնշման մասին կարող է խոսքը լինել, եթե «Փյունիկը» շատ հանգիստ կարողանում է տիտղոսներ նվաճել:

Ասում է, թե ֆեդերացիան կպնում է ակումբի սաներին, չի հրավիրում հավաքականներ, զրկում է մարզիչներին: Սուտ է ասում: Եթե կա մեկ դեպք, որ «Փյունիկի» սանը չի կանչվել ֆեդերացիայի ղեկավարների պահանջով կամ որեւէ մարզիչ զրկվել է ֆեդերացիայի ղեկավարների պահանջով, ես հենց նույն րոպեին հրաժարական կտամ: Սողոմոնյանը սուտ է ասում:

Ասում է՝ ՀՖՖ կազմում կեսից ավելին չգործող կազմակերպություններ են: Սուտ է ասում: ՀՖՖ կազմում չգործող կազմակերպություններ չեն կարող լինել: Նա խոսում է մեկ ձայնի իրավունքի մասին, համաձայն որի «Փյունիկ» ակումբը պիտի ստանա ավելի շատ ձայներ, քան, օրինակ, շրջաններում գործող ակումբները: Սա խայտառակություն է, ընդ որում, ասում է «մաֆիա»: Նշանակում է՝ «մաֆիա» պետք է ասել նաեւ ՈՒԵՖԱ-ի մասին: Պատկերացրեք՝ նույն բանն ասի Գերմանիան, որ պետք է ունենա ավելի շատ ձայներ, քան Հայաստանը, որովհետեւ Գերմանիան մի քանի անգամ դարձել է աշխարհի եւ Եվրոպայի չեմպիոն, Հայաստանը չի դարձել: Նման չարություն եւ արկածախնդրություն ֆուտբոլի հանդեպ չի կարելի անել: Մարզերում ֆուտբոլը զարգացնող ակումբները պակաս ներդրում ունե՞ն, քան Սողոմոնյա՞նը:

Նա պարբերաբար նշում է, որ «Բազելի» հետ խաղից առաջ ֆեդերացիան խաղ է դնում: Կա «Բազելի» հետ խաղը օրով նշված, եւ կա «Փյունիկի» վերջին խաղի օրը: Նա չի կարողանում իր նախորդ խաղի եւ այս խաղի միջեւ օրերի տարբերությունը հաշվել: Մեկ հայտնի խոսք կա՝ 2+2 ոչ միշտ է 4 անում. դա Սողոմոնյան Արթուրն է:

Նրա խոսքով ԲԿՄԱ-ի 23 ֆուտբոլիստներից 19-ն ավարտել են կարիերան: Տարբեր տարիներին տարբեր թվեր է ասել, հիմա հասել է 19-ի: Նախորդ հարցազրույցումս անդրադարձել էինք այս հարցին, որ այդ ֆուտբոլիստների մեջ նույնիսկ կար տղա, որը զոհվել էր պատերազմի ժամանակ, բայց Սողոմոնյանն իրեն էլ էր հաշվել:

Ըստ Արթուր Սողոմոնյանի,  ֆեդերացիան զբաղված է ԲԿՄԱ-ի միջոցով տղաներին բանակից ազատելու գործով: Նաեւ նշում է, որ իշխանությունն է ուղղորդում, թե ում ազատել բանակից...

Ֆեդերացիայի ոչ նախագահը, ոչ փոխնախագահը տեղյակ չեն, թե երեխաներն ինչպես են հասնում ԲԿՄԱ: ԲԿՄԱ-ի ցուցակները կազմում է 12 մարզիչից բաղկացած մարզչական խորհուրդը, որի անդամները տարիներ շարունակ հետեւում են երեխաներին եւ իրենք են ներկայացնում կազմը: Մենք ընդամենը ցուցակներն ենք ուղարկում ԿԳՄՍ, նախարարությունը ստուգումներից հետո ուղարկում է ՊՆ, որի միջոցով մտնում է Կառավարություն: Մի քանի ֆիլտր են անցնում այդ երեխաները: Մեղադրել ֆեդերացիայի ղեկավարությանը այդ ցուցակներին միջամտելու մեջ, առնվազն ապուշություն է: Եթե չեմ սխալվում, այդ ընտրությունը կատարող 12 մարզիչների մեջ կան նաեւ «Փյունիկի» մարզիչներ: Մենք դրա հետ կապ չունենք: Ինչ վերաբերում է իշխանության միջամտությանը, սուտ է: Թող բերի մեկ դեպք: Անընդհատ փոխնախարարի տղայի օրինակ է բերում, այժմ էլ նոր բան է գտել, թե այդ մարդը մեզ մոտ աշխատում է, ինչը նույնպես սուտ է: Մենք ունենք ինչպես գործող, այնպես էլ նախկին նախարարների ֆուտբոլիստ երեխաներ, որոնք բանակում ծառայում են: Չկարողացան լավ արդյունքի հասնել, այսօր ծառայում են:

«Փյունիկի» նախկին սեփականատերը եւս մեկ անգամ հիշատակել է կոռուպցիայի մասին: Ի՞նչ կասեք նրա բարձրաձայնած թվերի եւ փաստերի մասին:

Այն, որ ՀՖՖ-ի 30-ամյակի կապակցությամբ մեր անցկացրած միջոցառման վրա 900 միլիոն դրամ գումար էնք վատնել, խայտառակ սուտ է: Ամեն տարի տալիս ենք հաշվետվություն մեր ծախսերի մասին: Սուտ է ասում նաեւ այն, որ 30-ամյակի միջոցառմանը չենք հրավիրել Հենրիխ Մխիթարյանին և իր մորը: Երկուսն էլ հրավիրվել են, չեն եկել:

Ասում է՝ Նիկողոսյանը ավտոմեքենաներ է գնում: Սուտ է ասում, որովհետեւ Արմեն Նիկողոսյանը վերջին անգամ ավտոմեքենա է ունեցել 20 տարի առաջ: 2004 թվականից ավտոմեքենա չունեմ եւ չեմ վարում: Ասում է՝ Մելիքբեկյանը տներ է գնում: Սուտ է: 

Արթուր Սողոմոնյանը անընդհատ խոսում է միլիոնների մասին, 100 միլիոն դոլարների մասին, որոնք գոյություն չունեն, իսկ ես կասեմ փաստեր. «Փյունիկ» ակադեմիան, որի սեփականատերն է Արթուր Սողոմոնյանը, ամեն ամիս երեխաներից հավաքում է 80-100 հազար դոլար: Տարեկան կտրվածքով այս գումարը 1 միլիոն եվրոյից ավելի է: Դա այն վարձն է, որը հավաքում է: Ինչքա՞ն հարկ է նա տալիս այդ գումարից: «Փյունիկ» ակումբը 7 տարվա մեջ ՈւԵՖԱ-ից եւ ՀՖՖ-ից տարբեր կտրվածքներով ստացել է մի քանի միլիոն դոլար: Այդ միլիոններից քանի՞ կոպեկ է դրվել ենթակառուցվածքների վրա:

Արթուր Սողոմոնյանը հայտնել է նաեւ, որ ֆեդերացիայում ստուգումներ են գնում, կա ձերբակալված անձ: Կա՞ն ստուգումներ եւ ո՞վ է ձերբակալվել:

Կներեք, չգիտեմ, թե այս մարդը որտեղից է այդ ստերը հորինում: Ֆեդերացիայում ստուգումներ չեն գնում, ձերբակալվածներ չկան: Ըստ նրա, ես տեղյակ եմ: Առաջին անգամ եմ լսում, որ մեզ մոտ ստուգումներ են, եւ կա ձերբակալված մարդ:

Ասում է՝ հավաքականի խաղերին չարթերով մեր ընկերներին ենք տանում: Հերթական սուտը: Ես կարող եմ այլ բան ցույց տալ, իր չարթերով նա իր ընկերներին է տանում: Մեր չարթերում նման բան չկա: Ամենավատն այն է, որ մեր ֆուտբոլիստներին անվանում է կլոուններ: Ով մեր հավաքականի ֆուտբոլիստներին կլոուն է ասում, ամենամեծ կլոունն ինքն է, որովհետեւ այդ չարթերի ամենակարեւոր մարդիկ ֆուտբոլիստներն են: Բնականաբար, ազգային հավաքականը տեղափոխվում է բացառապես չարթերով, որովհետեւ դա պայմաններից մեկն է:

Ասում է՝ Նիկողոսյանը չգիտի, թե քանի ֆուտբոլիստ է խաղում դաշտում: Նաեւ պատմում է, որ սկսել է ուսումնասիրել հայագիտությունը,  իմացել է, որ Ուրուգվայը փոքր երկիր է եւ երկու անգամ դարձել է աշխարհի չեմպիոն: Ծափ պետք է տամ նրան, որ վերջապես այդքանը գիտի: Պետք է խնդրեմ, ուսումնասիրի, թե Նիկողոսյանը ֆուտբոլով երբվանից է զբաղվում:

Հարցազրույցի սկզբում ակնարկեցիք, որ ունեք բնորոշում, թե ինչ է իրենից ներկայացնում Արթուր Սողոմոնյան մարդը: Ի՞նչ նկատի ունեք:

Գտել եմ Արթուր Սողոմոնյանի ախտորոշումը. կոչվում է պաթոլոգիական ստախոս: Վիկիպեդիան գրում է՝ «Պաթոլոգիկ ստախոս, նշանակում է՝ սուտ ինֆորմացիա հաղորդելու, ֆանտաստիկ պատմություններ ստեղծելու հակում: Սովորաբար առաջանում է, երբ անհատը ցանկանում է ուշադրություն սեւեռել իր անձի վրա, այլ կերպ ասած ցանկանում է ցույց տալ սեփական անձի կարեւորությունը: Պաթոլոգիկ ստախոսները կարող են գիտակցել, որ ստում են եւ կարող են հավատալ այն ամենին, ինչն ասում են որպես ճշմարտություն: Պաթոլոգիկ ստախոսությունը կլինիկական ախտորոշման մեջ չի գործածվում, բայց հոգեբուժների մեծամասնությունը կարծում են՝ անձի այս տեսակը համարվում է հոգեկան հիվանդ: 2005 թ. տրվել է առաջին ապացույցը, որ պաթոլոգիկ ստախոսի ուղեղը տարբերվում է սովորական մարդու ուղեղից: Հետազոտությունների ընթացքում պաթոլոգիկ ստախոսների ուղեղում հայտնաբերվել են կառուվածքային անոմալիաներ, որոնցով նրանք տարբերվում են մնացած բոլորից»: Իմ կարծիքով՝ սա լավագույն բնորոշումն է Արթուր Սողոմոնյանին: Այս մարդը պաթոլոգիկ ստախոս է, եւ ես նրա մասին այլեւս չեմ խոսի:

Մենք մեկ անգամ նրան դատի տվել ենք: Վաղը նամակով կդիմենք, որպեսզի ինքը հերքի իր ասածները, եթե ոչ, հերթական անգամ կգնա դատարաններ, իր ստերի համար պատասխան կտա:

Ինչո՞ւ որոշեցիք պատասխանել նրան:

Չէի պատասխանի, բայց այդ մարդը գումարով տարբեր ալիքներով այլ երկրների շահերը սպասարկող լրատվամիջոցներով կամ մեռելածին անձանց հարցազրույցներ է տալիս: NEWS.am-ի լսարանը, ընթերցողների շրջանակը հաշվի առնելով, որոշեցի պատասխանել:  

Արթուր Սողոմոնյանից բացի, ֆեդերացիայի գործունեության, նախագահի եւ ղեկավար կազմի նկատմամբ կա մեծ բողոքի ալիք, դժգոհություններ: Երկրպագուները պահանջում են Արմեն Մելիքբեկյանի եւ Ձեր հրաժարականը: Այդ մեղադրանքներն էլ են սու՞տ:

Ես մեկ առիթով ասել եմ, որ երկրպագուների ցանկացած ակցիայի հարգանքով եմ մոտենում: Մարդիկ իրավունք ունեն դժգոհելու եւ դժգոհում են: Ես դեմ եմ դժգոհելու այն միջոցին, որ երբեմն խաղերը խանգարում են, հատկապես ազգային հավաքականի խաղերը: Մնացած դեպքերում ընդունում եմ նրանց գործողությունները, առավել եւս, լսում եմ երկրպագուների ձայնը, հանդիպում եմ, խոսում եմ նրանց հետ: Որոշակի բաներ կա, որ ընդունում եմ, որոշները՝ ոչ: Բայց, նման պաթոլոգիկ ստախոսները պետք չի գան, ընկնեն այդ դաշտ: Մեր երկրպագուների հետ կխոսենք, կհասկանանք, պետք լինի կհանդիպենք: Դժգոհությունների հետ կապված՝ այո, ես էլ դժգոհություններ ունեմ թե մեր աշխատանքից, թե հավաքականների ցուցադրած արդյունքներից: Նորմալ է:

Թե ինչու չեմ պատասխանում մյուս մեղադրանքներին, քանի որ անձնական բնույթի չեն: Եթե գործի մասին է խոսքը, մենք պատրաստ ենք քննարկել: Մենք ցույց ենք տվել աշխատանքներ, որոնք ճիշտ են կամ սխալ, ուրիշ բան, թե մարդիկ ինչպես են ընդունում: Կա մի հստակ բան․ եթե մարդը գիտի սեւ է, ինչ ուզում ես արա, պիտի ասի՝ սեւ է: Մեր հասարակությունը հիմա այնպիսի վիճակում է, որ ոչ մեկ չի ուզում լսել՝ դու ինչ ես ասում: Քեզ ասում են սեւ, ուրեմն դու սեւ ես: Շատ ցավալի է, որովհետեւ նման բեւեռացում կա. կարեւոր չի ՀՖՖ-ն ինչ է ասում, ինչ է անում: Մարդու մոտ պիտակավորվել է եւ չես կարող ջնջել:

Կա էքստրեմիստ մարդկանց մի փոքրիկ խումբ, որոնց հետ ես չեմ էլ ցանկանում խոսել: Այդ մարդիկ պիտակավորել են իշխանությանը, ֆուտբոլի ֆեդերացիային: Այդ մարդկանց նպատակը իշխանափոխությունն է, ոչ ֆուտբոլը:

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում