2018 թվականի հունիսին Հայաստանի ազգային հավաքականի կազմում նորամուտը նշեց շվեդական «Գյոտեբորգի» պաշտպան Անդրե Կալիսիրը, որն ազգային հավաքականի կազմում 8 հանդիպման է մասնակցել:
NEWS.am Sport-ի թղթակցի հետ զրույցում 29-ամյա ֆուտբոլիստը պատմել է իր ընտանիքի, ակումբային կարիերայի, Հայաստանի հավաքականի մասին և դիմել է բոլոր երկրպագուներին:
ԿԵՆՏՐՈՆԱՑԱԾ ԵՄ «ԳՅՈՏԵԲՈՐԳՈւՄ» ԻՄ ՄՐՑԵԼՈւՅԹՆԵՐԻ ՎՐԱ
«Շվեդիայի Սուպերլիգայում մենք գրավեցինք 7-րդ տեղը, սակայն «Գյոտեբորգը» մեծ ակումբ է և ցանկանում է լինել առաջատար դիրքերում: Առաջիկա մրցաշրջանում մենք կպայքարենք հենց դրա համար: Ակումբի հետ իմ պայմանագիրը նախատեսված է մինչև 2021թ․ հունիս, և ես ամբողջովին կենտրոնացած եմ «Գյոտեբորգում» իմ մրցելույթների վրա»:
ՊԱՏԻՎ ՈւՆԵՄ
«Մեծ հաճույքով եմ ընդունել Հայաստանի ազգային հավաքականում հանդես գալու հրավերը: Ինձ համար մեծ պատիվ է ազգային հավաքականի խաղաշապիկը հագնելը:
Մենք մոտ էինք Եվրոպայի առաջնության խմբային փուլի ուղեգիր նվաճելուն: Հաջորդ ընտրական մրցաշարի ժամանակ պետք է չկրկնենք սխալները: Մեզ համար յուրաքանչյուր հանդիպում շատ կարևոր է, և մենք պետք է օգտվենք ցանկացած հնարավորությունից»:
ԻՄ ԸՆՏԱՆԻՔՆ ԻՄ ՀԱՐՍՏՈւԹՅՈւՆՆ Է
«Նախորդ տարվա հունիսին ես ամուսնացա: Մարտին լույս աշխարհ կգա մեր առաջնեկը: Իմ գլխավոր երկրպագուներն ընտանիքիս անդամներն են: Ծնողներս շատ հպարտ են, որ ես հանդես եմ գալիս Հայաստանի ազգային հավաքականում և հետևում են ազգային թիմի մրցելույթներին: Հայրս եղբայրներիս հետ Երևանում հետևել է Բոսնիա և Հերցեգովինայի դեմ խաղին: Ծնողներս նաև ստադիոնում ներկա են գտնվել Ֆինլանդիա - Հայաստան հանդիպմանը»:
ԿՈՉ ԵՐԿՐՊԱԳՈւՆԵՐԻՆ
«Շնորհակալ եմ հայ երկրպագուներին իրենց աջակցության համար: Նրանք անկրկնելի են և միշտ պատրաստ են օգնել: Շարունակեք նույն ոգով»:
Սամվել Սուքիասյան
Հետևեք NEWS.am SPORT-ին Facebook-ում, Twitter և Telegram-ում