NEWS.am Sport-ի Օլիմպիական բլոգը Սոչիից. Հայկական ռեպորտաժ՝ օլիմպիական հոկեյից, եռագույնն էլ՝ Չեխիա - Շվեդիա խաղին (ֆոտոշարք)

01:30   13 փետրվարի, 2014

NEWS.am Sport-ի հատուկ թղթակից Լուսինե Շահբազյանը շարունակում է Օլիմպիական բլոգը՝Սոչիից:

Սա տափօղակով հոկեյի առաջին հանդիպումն է իմ կյանքում: Երեւանի մարզահամերգային համալիրում վերջին տարիներին անցկացվել են տափօղակով հոկեյի հանդիպումներ, բայց դե հասկանում եք, որ համեմատության եզրեր չկան:

Այսօր առաջին անգամ ականատես եմ լինում իրական տափօղակով հոկեյի, հզոր տղամարդկանց դիմակայության: Բազմիցս լսել էի, որ տափօղակով հոկեյը շատ հետաքրքրիր է, մասնավորապես, երբ այն հետեւում ես անմիջապես մարզապալատում: Իրականում, այդպես էլ կա, շատ դիտարաժան է, հույզերն էլ անպակաս են: Փորձեմ ներկայացնել առաջին հայկական ռեպորտաժը տափօղակով հոկեյի օլիմպիական մրցաշարից:

Սոչիում ընթացող 22-րդ օլիմպիական խաղերի տափօղակով հոկեյի տղամարդկանց մրցաշարը բացեցին Շվեդիան ու Չեխիան: Մեդալի իրական հավակնորդ թիմեր են ասպարեզում: Խաղը կայացավ «Բոլշոյ» սառցե արենայում:

Կամավորներն եւ հեռուստատեսությունից հայ գործընկերներս պնդում էին, որ միայն հավատարմագրումով մուտք գործել տափօղակով հոկեյի տղամարդկանց մրցաշարին հնարվոր չէ, քանի որ պետք է երկու օր առաջ տոմս վերցնել  ՄՕԿ-ի գրասենյակից, բայց իրականում բոլոր մարզապալատների մամուլի գոտիներում էլ հնարավոր է հայտնվել հավատարմագրումով: Հետեւեցի առաջին օրվա ամենահետաքրքիր հանդիպմանը՝ Շվեդիա-Չեխիա:

Ճիշտ է՝ լրագրողական տեղերը սահմանափակ են, իսկ Չեխիայի, Շվեդիայի եւ ռուսական ու արեւմտյան լրատվամիջոցների ներկայացուցիչները շատ են: Բոլորին տեղ չհասավ: Մի քանի տասնյակ լրագրողներ՝ համաշխարհային լրատվամիջոցներից ստիպված էին կանգնած հետեւել խաղին: Բայց ես շուտ էի եկել եւ հարմարավետ տեղավորվեցի, ու սկսվեց ճակատամարտը:

Հանդիսատեսների տրիբունայում նկատեցի Հայաստանի եռագույնը: Հաճելի զգացողություն է: Այստեղ բոլորը ծածանում են կամ Շվեդիայի, կամ Չեխիայի դրոշները: Իսկ Հայաստանի դրոշը կախված էր անմիջապես չեխ հոկեյիստների հանգստի գոտու հարեւանությամբ, որտեղից չեխերը մուտք ու ելք են անում սահադաշտ: Մեծ հեռուստաէկրանին եւ եթերում բազմիցս երեւաց Հայաստանի դրոշը, եւ դա տեսնում են նաեւ միլիոնավոր հեռուստադիտողներ:

Իսկ «Բոլշոյ» սառցե արենայում ասեղ գցելու տեղ չկա: Հանդիսատեղը բաժանվել է երկու մասի՝ մի մասը Շվեդիայի երկրպագուներն են, մյուս մասը՝ Չեխիայի:

Ուշադիր հետեւում եմ խաղին, հոկեյն իսկապես կլանիչ է: Սահադաշտում հավասար պայքար է: Ամեն վայրկյան հանդիսատեսը երկրպագում է, գոլերի դեպքում ուղղակի պայթեցնում դահլիճը: Գոլերից առաջ դահլիճում նստած հանդիատեսը ոտքերով հարվածում է հատակին ու բարձր բղավում՝ «շայբու»: Ցանկանում են դարպասի գրավում տեսնել: Ընթանում է բավական կոպիտ խաղ, ամեն վայրկյան հոկեյիստները միտումնավոր եւ ոչ միտումնավոր միմյանց հրում, գցում են եւ այդ ամենը՝ շատ կոպիտ:

Դադարի ընթացքում հանդիսատեսների համար կարճ հարցազրույց տվեց տափօղակով հոկեյի կանանց Շվեդիայի հավաքականի հոկեյիստուհիներից մեկը: Նա նշեց, որ կանանց հավաքականի մարզուհիները եկել են իրենց երկրի տղամարդկանց թիմին երկրպագելու: Եվ ակնկալում են, որ տղամարդկանց հավաքականը նույն ժեստով կպատասխանի եւ կայցելի իրենց խաղին:

Հարցին, թե ինչով է տարբերվում կանանց տափօղակով հոկեյը, տղամարդկանց հոկեյից, շվեդ մարզուհին պատասխանեց. «Տղամարդկանց հոկեյում ամեն ինչ այլ է, այստեղ միմյանց կոպիտ հրում են, գցում, վնասվածքներ հասցնում, հարվածում եւ դա բնականաբար ոչ միտումնավոր է: Այստեղ սահմաններ չկան, իսկ կանանց հոկեյում նման բան չկա: Մենք միմյանց չենք հրում եւ չենք գցում: Դա կոպիտ խախտում է»:

Չնայած դահլիճում մի փոքր ցուրտ է, բայց այնքան լարված խաղ է ընթանում, որ նույնիսկ ցուրտը չես նկատում: Ամեն դարպասի գրավումից հետ հանդիսատեսին զուգահեռ հոկեյիստներին երկրպագում են նաեւ պարուհիները՝ փետուրները թափահարելով: Իսկ հանդիսատեսը ամեն դարպասի գրավումի հետ ալիք է բարձրացնում տրիբունաներում:

Շվեդիան հաղթեց 4:2 հաշվով եւ սկսեց չեմպիոնական մրցավազքը: Շվեդիան, Կանադան, ԱՄՆ-ն, Ռուսաստանը հավասար հավակնություններով ֆավորիտներ են: Օլիմպիական խաղերի գլխավոր եզրափակիչը փակման օրն է՝ փետրվարի 23-ին:

Կարծում եմ, այստեղ գտնվողից յուրաքանչյուրի համար այս խաղը եւ սրան հաջորդող բոլոր հանդիպումները պատմական կլինեն: Չէ որ Օլիմպիական խաղեր են: Թեժ է, հետաքրիրք է, քոնն է՝ NEWS.am Sport-ի հետ:

Լուսինե Շահբազյան՝ օլիմպիական Սոչիից

NEWS.am Sport-ի Օլիմպիական բլոգը Սոչիից. «Օլիմպիական պարկում» թեժ է (ֆոտոռեպորտաժ)

NEWS.am Sport-ի Օլիմպիական բլոգը Սոչիից. «Լաուրա» հասնելու լեռնային փորձությունները

NEWS.am Sport-ի Օլիմպիական բլոգը Սոչիից. Հեքիաթն ավարտվեց կամ գուցե դեռ նոր է սկսվում (ֆոտո)

NEWS.am Sport-ի Օլիմպիական բլոգը Սոչիից. Համառությամբ բացման հրավիրատոմս էլ կգտնվի (ֆոտո)

NEWS.am Sport-ի Օլիմպիական բլոգը Սոչիից (live). Կամավորներն ասես բոլորը հայ լինեն

Սոչի-2014. Օլիմպիական բլոգ, մեկնարկ



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։