Մրցաշրջան-2019. Հայկական սպորտի նվաճումները (ֆոտո)

Մրցաշրջան-2019-ը հայկական սպորտի համար շրջադարձային էր նվաճումների առումով: Տարվա ընթացքում հայկական մարզաշխարհի ներկայացուցիչները, նախորդ տարիների համեմատ, կրկնակի շատ մեդալներ նվաճեցին եւ հաղթանակներ նվիրեցին մարզասեր հանրությանը, Հայաստանին: 2019-ին Հայաստանն ունեցավ աշխարհի 2, Եվրոպայի 7,  Եվրոպական խաղերի 5 եւ Համաշխարհային ուսանողական խաղերի 1 չեմպիոն:

NEWS.am Sport-ն առանձնացրել է մրցաշրջան-2019-ի կարեւորագույն հաղթանակներն ու ձեռբերումները:

Աշխարհի առաջնություններն ու հայ մարզիկների նվաճումները

Սիմոն Մարտիրոսյանը՝ աշխարհի կրկնակի չեմպիոն

Օլիմպիական փոխչեմպիոն, աշխարհի ու Եվրոպայի չեմպիոն, 2018-ին լավագույն մարզիկ ճանաչված Սիմոն Մարտիրոսյանը փայլեց նաեւ 2019 թվականին՝ երկրորդ անգամ Հայաստանին պարգեւելով աշխարհի չեմպիոնի տիտղոսը:

Սեպտեմբերի 26-ին Թաիլանդի Պատայա քաղաքում տեղի ունեցած ծանրամարտի աշխարհի առաջնությունում Սիմոն Մարտիրոսյանը իր մարզական կարիերայում երկրորդ անգամ նվաճեց աշխարհի չեմպիոնի տիտղոսը: 109 կգ քաշայինների պայքարում Սիմոնը բարձրացրեց 429 կգ եւ հռչակվեց աշխարհի կրկնակի չեմպիոն։ 22-ամյա ծանրորդը սահմանեց նաեւ աշխարհի ռեկորդ՝ պոկում վարժությունում բարձրացնելով 199 կգ:

Չեմպիոն դառնալուց հետո NEWS.am Sport-ի թղթակցի հետ զրույցում Մարտիրոսյանը նշել էր, որ առաջնությունում նպատակ ուներ կրկնել հաղթանակը եւ այն նվիրել իր ընկերոջ՝ Աղասի Աղասյանի վառ հիշատակին: Հիշեցնենք, որ ծանրորդ Աղասի Աղասյանը մահացել է 2019 թվականի հուլիսի 8-ին ավտովթարի հետեւանքով:

Նախորդ անգամ Մարտիրոսյանը աշխարհի չեմպիոնի կոչումը նվաճել էր 2018 թվականին Թուրքմենստանում:

Հակոբ Մկրտչյանի հաղթանակը աշխարհի առաջնությունում

Ծանրամարտի աշխարհի առաջնությունում Հայաստանի համար երկրորդ ոսկե մեդալը նվաճեց 89 կգ քաշային Հակոբ Մկրտչյանը: Երկամարտի 375 կգ արդյունքով Հակոբը շրջանցեց բոլորին եւ առաջին անգամ հռչակվեց աշխարհի չեմպիոն:

Հաղթանակից հետո Հակոբ Մկրտչյանը NEWS.am Sport-ին ասաց, որ եկել էր Թաիլանդ չեմպիոնի կոչման հետեւից:

Ի դեպ, հունվարին լույս աշխարհ է գալու Հակոբ Մկրտչյանի առաջնեկը: Աշխարհի ոսկե մեդալը ծանրորդը նվիրեց իր ապագա որդուն:

Արթուր Ալեքսանյանի արծաթե մեդալը աշխարհի առաջնությունում

Արթուր Ալեքսանյանը մրցաշրջան 2019-ում բավարարվեց աշխարհի առաջնության արծաթե մեդալով: Սակայն սա նվաճում համարել չի կարելի, քանի որ օլիմպիական չեմպիոնը Ղազախստանում անցկացված աշխարհի առաջնությունում 5 փայլուն հաղթանակ տանելուց հետո կողոսկրի վնասվածքի պատճառով հրաժարվեց եզրափակիչ գոտեմարտից: Աշխարհի եռակի չեմպիոնը արժանացավ արծաթե մեդալին: Առանց պայքարի ոսկե մեդալը բաժին հասավ ռուս Մուսա Եվլոեւին:

Գոռ Մինասյանի պայքարը անպարտելի Տալախաձեի հետ եւ աշխարհի փոխչեմպիոնի տիտղոսը

Օլիմպիական փոխչեմպիոն Գոռ Մինասյանին դեռեւս չի հաջողվում հաղթել 2016թ․ Ռիոյի օլիմպիական չեմպիոն, վրացի Լաշա Տալախաձեին: Երկու ծանրորդների պայքարը տարվա խոշորագույն մրցաշարերում առայժմ ավարտվում է հայ ծանրորդի պարտությամբ:

Թաիլանդում տեղի ունեցած ծանրամարտի աշխարհի առաջնությունում Մինասյանը երկամարտում 24 կգ-ով հետ մնաց Տալախաձեից եւ նվաճեց փոխչեմպիոնի տիտղոսը: 

Ռուբեն Ալեքսանյանը՝ աշխարհի առաջնության բրոնզե մեդալակիր

Թաիլանդում գերծանրքաշայինների պայքարում երրորդ մրցակիցը Եվրոպայի փոխչեմպիոն Ռուբեն Ալեքսանյանն էր, որը երկամարտում գրավեց երրորդ տեղը՝ 437 կգ (192+245)։

Հովհաննես Բաչկովի վիճարկելի կիսաերզափակիչը աշխարհի առաջնությունում եւ բրոնզե մեդալը

Սեպտեմբերին Ռուսաստանի Եկատերինբուրգ քաղաքում տեղի ունեցած բռնցքամարտի աշխարհի առաջնությունում Հայաստանի ներկայացուցիչներից մեդալ նվաճեց միայն Եվրոպայի կրկնակի չեմպիոն Հովհաննես Բաչկովը: Վիճարկելի մենամարտում հայ բռնցքամարտիկին բաժին հասավ բրոնզե մեդալը: 63 կգ քաշային կարգի կիսաեզրափակիչում Բաչկովը մենամարտեց ԱՄՆ-ի եւ Պանամերիկյան խաղերի բազմակի չեմպիոն Քեյշոն Դեւիսի հետ։ Մրցավարների ոչ միաձայն որոշմամբ հաղթանակը շնորհվեց Դեւիսին՝ 4։1։ Հայկական կողմը բողոքարեց մրցավարների որոշումը, սակայն հանձնաժողովը չընդունեց այն: 

Սլավիկ Գալստյանի բրոնզե հաղթանակը աշխարհի առաջնությունում

Հունահռոմեական ըմբշամարտի աշխարհի առաջնությունում 63 կգ քաշային Սլավիկ Գալստյանը նվաճեց բրոնզե մեդալ՝ կիսաեզրափակիչում պարտվելով 2018-ի աշխարհի չեմպիոն, ռուսաստանցի Ստեփան Մարյանյանին: Սլավիկի բրոնզե մեդալը թերեւս ամենաուրախալին էր, քանի որ ըմբիշն էլ չէր հավատում իր հաջողությանը:

Նուրսուլթանում NEWS.am Sport-ի թղթակցի հետ զրույցում երիտասարդ ըմբիշը մեծահասակների ԱԱ-ում նվաճած առաջին մեդալը նվիրեց սահմանում ծառայող բոլոր հայ զինվորներին:

Եվրոպայի առաջնություններում հայ մարզիկների հաղթանակները

Արսեն Հարությունյանը՝ մեծահասակների Եվրոպայի չեմպիոն

Մրցաշրջան-2019-ում հայկական սպորտում իր անունը ոսկե տառերով գրեց ազատ ոճի ըմբիշ Արսեն Հարությունյանը: Ապրիլին Ռումինիայի մայրաքաղաք Բուխարեստում ազատ ոճի ըմբշամարտի Եվրոպայի առաջնության 61 կգ քաշայինների պայքարում Արսեն Հարությունյանը տպավորիչ հաղթանակով հռչակվեց Եվրոպայի չեմպիոն՝ եզրափակիչում 17:11 հաշվով կամային հաղթանակ տանելով վրացի Բեկա Լոմտաձեի նկատմամբ: 

20-ամյա ըմբիշը NEWS.am Sport-ի թղթակցի հետ զրույցում ասել էր, որ մեծահասակների Եվրոպայի առաջնությունում իրականացել է իր մեծ երազանքներից մեկը: 

Արսեն Հարությունյանից ոսկե մեդալի ակնկալիք կար նաեւ աշխարհի առաջնությունում, սակայն Նուրսուլթանում Եվրոպայի չեմպիոնին չհաջողվեց հաղթահարել 1/8 եզրափակիչի արգելքը:

Սիմոն Մարտիրոսյանը՝ Եվրոպայի կրկնակի չեմպիոն

Այս տարի Սիմոն Մարտիրոսյանը կրկնեց 2017 թվականի Եվրոպայի առաջնությունում իր գրանցած հաջողությունը: Բաթումիում տեղի ունեցած ծանրամարտի Եվրոպայի առաջնությունում 22-ամյա ծանրորդը երկամարտի 427 կգ արդյունքով նվաճեց չեմպիոնի կոչումը՝ հռչակվելով կրկնակի Եվրոպայի չեմպիոն:

Հաղթանակից հետո Սիմոն Մարտիրոսյանը հայտարարեց, որ իր հաղթանակները միայն իրենը չեն, այլ ամբողջ հայ ազգինը, իր ծնողներինը, անձնական մարզիչինը, մարզչական շտաբինն ու մինչեւ անգամ մերսող բժիշկինը: 

Սիմոն Մարիտրոսյանը Բաթումիի մրցահարթակում պոկեց 197 կգ, հրեց 235 կգ՝ շրջանցելով իր բոլոր մրցակիցներին:

Հակոբ Մկրտչյանի չեմպիոնությունը՝ Եվրոպայի առաջնությունում

Բաթումիի մրցահարթակում փայլեց նաեւ ծանրամարտի Հայաստանի հավաքականի մեկ այլ ներկայացուցիչ՝ 89 կգ քաշային Հակոբ Մկրտչյանը, որը երկամարտի 371 կգ արդյունքով նվաճեց Եվրոպայի չեմպիոնի տիտղոսը եւ սամանեց Եվրոպայի ռեկորդ: Սա Հակոբ Մկրտչյանի առաջին մեծ նվաճումն էր մեծահասակների կազմում: 

Չեմպիոնությունից հետո Հակոբ Մկրտչյանը նշեց, որ իրականացավ իր երազանքը եւ հաղթանակը նվիրեց հայրիկին: 

Նշենք, որ Մկրտչյանը աշխարհի եւ Եվրոպայի չեմպիոնի տիտղոսները նվաճեց ոչ օլիմպիական քաշային կարգում: Ծանրորդը NEWS.am Sport-ի հետ զրույցում հայտնել էր քաշը փոխելու ծրագրերի եւ օլիմպիական վարկանիշային միավորների համար պայքարելու վճռականության մասին: 

Հովհաննես Բաչկովը՝ Եվրոպայի կրկնակի չեմպիոն

2018 թվականի աշխարհի առաջնության բրոնզե մեդալակիր եւ Եվրոպայի չեմպիոն Հովհաննես Բաչկովը այս մրցաշրջանում երկրորդ անգամ հռչակվեց Եվրոպայի չեմպիոն: Նախաօլիմպիական տարում Մինսկում անցկացված երկրորդ Եվրոպական խաղերը բռնցքամարտիկների համար նաեւ Եվրոպայի առաջնություն էր, քանի որ Եվրոպայի առաջնություն չէր անցկացնելու: Հովհաննես Բաչկովը Եվրոպական խաղերում նվաճեց չեմպիոնի տիտղոսը:

Արթուր Հովհաննիսյանը՝ Եվրոպայի չեմպիոն

Նույն կարգով Եվրոպայի չեմպիոնի կոչումը նվաճեց նաեւ Ռիո-2016-ի Օլիմպիական խաղերի մասնակից, 49 կգ քաշային Արթուր Հովհաննիսյանը: Բելառուսի մայրաքաղաք Մինսկում անցկացված Եվրոպական խաղերում բռնցքամարտի Հայաստանի հավաքականի անդամը եզրափակիչում 4:1 հաշվով հաղթեց Վրաստանի ներկայացուցիչ Սախիլ Ալախվերդովին եւ նվաճեց չեմպիոնի տիտղոսը։ 

Գաբրիել Սարգսյանը՝ արագ շախմատի Եվրոպայի չեմպիոն

Շախմատի Համաշխարհային օլիմպիադայի եռակի չեմպիոն Գաբրիել Սարգսյանը դեկտեմբերի 4-8-ը Էստոնիայի մայրաքաղաք Տալինում անցկացված արագ եւ կայծակնային շախմատի Եվրոպայի առաջնությունում նվաճեց արագ շախմատի չեմպիոնի տիտղոսը: NEWS.am Sport-ի թղթակցի հետ զրույցում Գաբրիել Սարգսյանը խոստովանեց, որ իր համար համար անակնկալ էր արագ շախմատի Եվրոպայի չեմպիոնի տիտղոսը նվաճելը:

Հայ գրոսմայստերը 13 հնարավորից վաստակեց 10.5 միավոր եւ, հավասար քանակությամբ միավոր ունենալով ռուսաստանցի Ալեքսանդր Ռյազանցեւի ու ադրբեջանցի Ռաուֆ Մամեդովի հետ, լրացուցիչ ցուցանիշներով չեմպիոն հռչակվեց:

Մրցաշրջան-2019-ի Եվրոպայի առաջնություններում մեդալներ նվաճեցին նաեւ՝

Սամվել Գասպարյանը՝ Եվրոպայի փոխչեմպիոն (ծանրամարտ)

Զավեն Անդրիասյանը՝ Եվրոպայի փոխչեմպիոն (կայծակնային շախմատ)

Ռուբեն Ալեքսանյանը՝ Եվրոպայի բրոնզե մեդալ (ծանրամարտ)

Վահագն Դավթյանը՝ Եվրոպայի բրոնզե մեդալ (սպորտային մարմնամարզություն)

Կարեն Ասլանյանը՝ Եվրոպայի բրոնզե մեդալ (ըմբշամարտ)

Դավիթ Հովհաննիսյանը՝ Եվրոպայի բրոնզե մեդալ (ծանրամարտ)

Գոռ Ներսեսյանը՝ Եվրոպայի բրոնզե մեդալ (բռնցքամարտ)

Կարեն Տոնականյանը՝ Եվրոպայի բրոնզե մեդալ (բռնցքամարտ)

Եվրոպական երկրորդ խաղեր

 Մրցաշրջան-2019-ն առանձնացավ նաեւ Եվրոպական երկրորդ խաղերով: Ամռանը՝ հունիսի 21-30-ը հայկական մարզաշխարհի ամբողջ ուշադրությունն ուղղված էր դեպի Բելառուսի մայրաքաղաք Մինսկ: 9 մարզաձեւում 37 մասնակցով Եվրոպական խաղերում Հայաստանի պատվիրակությունը նվաճեց 5 ոսկե, 3-ական արծաթե ու բրոնզե մեդալ՝ ընդհանուր հաշվարկում գրավելով 11-րդ տեղը։ 

Եվրոպական խաղերում չեմպիոններ դարձան հունահռոմեական ոճի ըմբիշ Արթուր Ալեքսանյանը (97 կգ), մարմնամարզիկ Արթուր Դավթյանը (հենացատկ), բռնցքամարտիկներ Արթուր Հովհաննիսյանը (49 կգ), Հովհաննես Բաչկովը (64 կգ) եւ սամբիստ Տիգրան Կիրակոսյանը (52 կգ):

Արծաթե մեդալներ նվաճեցին սամբիստ Դավիթ Գրիգորյանը (82 կգ), մարմնամարզիկ Վահագն Դավթյանը (օղակներ) եւ հունահռոմեական ոճի ըմբիշ Կարապետ Չալյանը (77 կգ)։

Բրոնզե մեդալակիրներ դարձան բռնցքամարտիկներ Կարեն Տոնականյանը (60 կգ), Գոռ Ներսեսյանը (81 կգ) եւ սամբիստ Արսեն Ղազարյանը (74 կգ):

Ունիվերսիադա-2019

Արթուր Ավետիսյանը՝ ոսկե մեդալակիր

Իտալիայի Նեապոլ քաղաքում անցկացված համաշխարհային ուսանողական խաղերում Հայաստանին միակ հաղթանակը նվիրեց սպորտային մարմնամարզիկ Արթուր Ավետիսյանը՝ նվաճելով չեմպիոնի կոչումը: 

Օղակների վարժության եզրափակիչում Արթուր Ավետիսյանը վաստակեց 14․900 միավոր՝ գերազանցելով թուրք Իբրահիմ Չոլակին եւ ավստրիացի Վինցենս Յոհան Հյոկին։

Նշենք, որ երկու տարի անընդմեջ Ուսանողական խաղերի չեմպիոնի տիտղոսը նվաճել է սպորտային մարմնամարզության Հայաստանի հավաքականի անդամ, օղակների վարժության առաջատարներից Արթուր Թովմասյանը: Այս արդյունքով Արթուր Թոմվասյանը երկու անգամ էլ ընդգրկվել է «Տարվա 10 լավագույն մարզիկների» ցանկում: Իսկ այս տարի Ունիվերսիադա-2019-ի չեմպիոնությունը, չգիտես ինչու, տեղ չի գտել «Լավագույն 10-յակում»:

Մրցաշրջան-2019-ը առանձնացավ շատ այլ հաղթանակներով եւ ձեռքբերումներով: Տարբեր մարզաձեւերի մինչեւ 23 տարեկանների աշխարհի եւ Եվրոպայի առաջնություններում հայ մարզիկները փայլեցին հաղթանակներով: Նախաօլիմպիական տարում, Եվրոպայի, աշխարհի առաջնություններից բացի,  հայ մարզիկները նվաճեցին նաեւ օլիմպիական ուղեգրեր Տոկիո-2020-ի համար:

Ուղեգրեր նվաճեցին՝ Արթուր Ալեքսանյանը (ըմբշամարտ), Կարապետ Չալյանը (ըմբշամարտ) եւ Արթուր Դավթյանը (սպորտային մարմնամարզություն):  

Լուսինե Շահբազյան