«Լիվերպուլը» 5 գոլ խփեց հետնապահին (տեսանյութ)

Անգլիական Պրեմյեր լիգայի 36-րդ տուրում «Լիվերպուլն» ընդունեց հետնապահ «Հադերսֆիլդին» եւ խփեց 5 անպատասխան գոլ (տեսանյութ):

Դուբլի հեղինակ դարձան սենեգալցի Սադիոն Մանեն ու եգիպտացի Մոհամեդ Սալահը, իսկ խաղի հաշիվն առաջին րոպեին բացեց Նաբի Կեյտան: Սալահը 21 գոլով միանձնյա գլխավորեց Պրեմյեր լիգայի ռմբարկուների ցուցակը, իսկ Մանեն 20 գոլով երկրորդն է:

73-րդ րոպեին «Լիվերպուլի» կազմում փոխարինման դուրս եկավ անգլիացի կիսապաշտպան Ալեքս-Օքսլեյդ Չեմբերլենը, որը վնասվածքի պատճառով խաղադաշտից բացակայում էր նախորդ տարվա ապրիլի 24-ից:

Այս հաղթանակից հետո Յուրգեն Կլոպի գլխավորած թիմը հավաքեց 91 միավոր եւ, շրջանցելով մեկ հանդիպում պակաս անցկացրած «Մանչեսթեր Սիթիին», բարձրացավ առաջին տեղ: «Հադերսֆիլդը» մրցաշարային աղյուսակը եզրափակում է 14 միավորով:

Անգլիայի առաջնություն, 36-րդ տուր

«Լիվերպուլ» - «Հադերսֆիլդ»՝ 5:0

Նաբի Կեյտա, 1, Սադիո Մանե, 26, 66, Մոհամեդ Սալահ, 45+1, 83

Հետևեք NEWS.am SPORT-ին Facebook-ում, Twitter և Telegram-ում