Football.by-ի գլխավոր խմբագիր. Հենրիխ Մխիթարյանի գործոնը ֆավորիտ է դարձնում Հայաստանի հավաքականին

Բելառուսական Football.by կայքի նախագծի ղեկավար Տիմոֆեյ Զինովեւը ֆուտբոլի Բելառուսի եւ Հայաստանի ազգային հավաքականների միջեւ ընկերական խաղից առաջ NEWS.am Sport-ի թղթակցի հետ զրույցում խոսել է բելառուսական ֆուտբոլի խնդիրների եւ առաջիկա հանդիպման մասին: Խաղը կկայանա նոյեմբերի 9-ին Երեւանի «Հանրապետական» ստադիոնում եւ կսկսվի ժամը 18:00-ին:

Բելառուսի հավաքականը կարծես ուժեղագույն կազմով չէ ժամանել Երեւան: Ի՞նչ փոփոխություններ են տեղի ունենում թիմում:

Այո, հավաքականն ուժեղագույն կազմով չի ժամանել Երեւան: Շատ լեգեոնականներ մնացել են իրենց ակումբներում: Խոսքը դարպասապահ Սերգեյ Չեռնիկի («Նանսի»), պաշտպաններ Եգոր Ֆիլիպենկոյի («Մաքաբի Թել Ավիվ») եւ Միխայիլ Սիվակովի («Ամկար») մասին է: Մյուս առանցքային խաղացողներից Ստանիսլավ Դրագունը (ԲԱՏԷ), Իվան Մաեւսկին («Աստանա»), Պավել Սավիցկին («Նեման») եւ Ալեքսանդր Մարտինովիչը («Կրասնոդար») բացակայում են վնասվածքի պատճառով: Բելառուսի հավաքականի վերջին խաղերը կարելի է համարել փորձնական, քանի որ թիմ են հրավիրվում նորեկներ: Թիմի գլխավոր մարզիչ Իգոր Կրիուշենկոն շեշտը դնում է Բելառուսի առաջնությունում հանդես եկող ֆուտբոլիստների վրա:

ԱԱ-2018-ի ընտրական փուլում Բելառուսի թիմը խմբում գրավեց վերջին տեղը՝ զիջելով նաեւ Լյուքսեմբուրգին: Որո՞նք էին Ձեր թիմի անհաջողությունների գլխավոր պատճառները:

Այդ հարցին բարդ է տալ միանշանակ պատասխան: Կան համալիր խնդիրներ: Սակայն ինձ թվում է, որ գլխավոր պատճառը ֆուտբոլիստների խաղամակարդակն է: Եվրոպայի երիտասարդական առաջնությունում բրոնզե մեդալ նվաճած եւ Լոնդոնի Օլիմպիական խաղերում հանդես եկած սերունդը այդպես էլ չաճեց միջինից բարձր մակարդակի խաղ ցուցադրելու համար: Ավագ սերունդն էլ իր հերթին արդեն ավարտում է կարիերան եւ բարդ է նրանցից պահանջել անհավանական ինչ-որ բան:

Այս երիտասարդական հավաքականը նախորդներից ավելի թույլ է: Բելառուսում մեծ խնդիրներ կան մանկապատանեկան ֆուտբոլի, ֆուտբոլիստներ պատրաստելու եւ տաղանդներ գտնելու հարցում: Դրա մասին խոսում են նաեւ պատանեկան թիմերի մարզիչները: Պատանեկանից մեծահասակների ֆուտբոլ տեղափոխությունը կաղում է: Գուցե,  աշխատելու մեթոդները այն չեն կամ մարզիչների ցածր որակավորումն է մեղավոր: Այդ հարցի շուրջ կարելի է շատ երկար քննարկել: Ես չէի խոսի միայն մեկ ընտրական փուլում անհաջողությունների մասին: Մեր գրանցած արդյունքները վաղուց լավը չեն:

Առաջիկա խաղում կա՞ ֆավորիտ, թե՞ լինելու է հավասար թիմերի պայքար:

Բելառուսի հավաքականի համար հիմա չկան թույլ մրցակիցներ: Նվազագույնը լինելու է հավասար թիմերի պայքար: Եթե մեզ արդյունք է հարկավոր, պետք է պայքարենք բոլորի դեմ: Հայաստանի եւ Վրաստանի հետ առաջիկա խաղերում ֆավորիտների չէի առանձնացնի: Քիչ կարեւոր հանգամանք չէ, որ Հայաստանի հավաքականն ունի Անգլիայի Պրեմյեր լիգայի մակարդակի ֆուտբոլիստ: Բելառուսներն այդպիսի առաջատար չունեն: Դա նույնիսկ ինչ-որ տեղ ֆավորիտ է դարձնում հայկական թիմին: Բացի այդ, դուք խաղում եք տանը:

Բելառուսի հավաքականը շարունակում է կազմավորվել նոր մարզիչի օրոք: Քիչ թե շատ ձեւավորվել է թիմի կմախքը, սակայն դեռ տեղի են ունենում փոփոխություններ, եւ գալիս են նոր խաղացողներ: Դեռ հեռու ենք դաշտում համահունչ տեսք ունենալուց: Սովորաբար մեր թիմն ընկերական խաղերում ավելի հաջող է հանդես գալիս, քան ընտրական փուլերում, սակայն կանխատեսումներ չեմ անի: Կարծում եմ՝ առաջիկա 2 խաղերում մեր թիմի գլխավոր մարզիչը կփորձարկի նորեկներին ու խաղ առանց առաջատարների:

Հայաստանի հավաքականը երկրպագուներին հիասթափեցրեց այս ընտրական փուլում: Հայաստանի առաջնության մակարդակն էլ գնալով իջնում է: Ձեզ մոտ իրավիճակն ինչպիսի՞ն է:

Այս մրցաշրջանում մեր առաջնությունն ամենահետաքրքիրն է վերջին 10 տարում: Մինչեւ վերջին տուրը պայքար է ընթանում ինչպես չեմպիոնության, այնպես էլ ուժեղագույնների լիգայում մնալու համար: Շատ հնարավոր է, որ վերջապես ունենանք նոր չեմպիոն: Առաջնության ավարտից 2 տուր առաջ գործող չեմպիոն ԲԱՏԷ-ն երրորդ տեղում է, որում էլ կարող է մնալ: Դա կլինի մեծ սենսացիա: Ամեն դեպքում, հետաքրքիր է:

Ինչ վերաբերում է խաղամակարդակի իջնելուն, ապա ավելի շատ այո, քան՝ ոչ: Ունենք մեկ ակումբ, որը քիչ թե շատ հաջող է հանդես գալիս եվրագավաթներում եւ իր կազմում է հավաքել ուժեղագույն խաղացողներին: Սակայն այս տարի այդ թիմն էլ ամենաուժեղ մրցակիցը չէ: Բելառուսի առաջնության խաղերին ներկա են լինում 200-300 երկրպագուներ: Արդեն երկար տարիներ բելառուսական ֆուտբոլը հետաքրքրի չէ ոչ մեկի համար: Չկան բարձրակարգ լեգեոնականներ: Եվրագավաթներում մեկանգամյա ելույթին հաջորդում է անհաջողության շղթան: Բելառուսական շատ թիմերի համար որակավորման մի քանի փուլ անցնելը երազանք է: Կարծում եմ՝ այդ ամենը խոսում է խաղամակարդակի անկման մասին:

Հայաստանի հավաքականն ընտրական փուլի ընթացքում ընկերական խաղեր անցկացնելու փոխարեն որոշեց դա անել վերջում: Ըստ ձեզ՝ այս խաղը ի՞նչ կտա թիմերին:

Պետք չէ մոռանալ, որ Հայաստանը, Վրաստանն ու Բելառուսը Ազգերի լիգայի նույն դիվիզիոնում են: Թիմերը հնարավորություն կունենան ուսումնասիրել իրար այդ մրցաշարից առաջ: Գուցե Հայաստանի հավաքականի մարզիչն ունի նաեւ այլ ծրագրեր: Չգիտեմ:

Բելառուս երկրպագուներ ժամանե՞լ են Երեւան:

Երկրպագուների ուղեւորության կազմակերպում չի եղել: Ոմանք կարող էին իրենց ուժերով հասնել Երեւան: Գուցե ստադիոնում կլինի 5-10 բելառուս երկրպագու:

«Տորպեդո ԲելԱԶ»-ում հանդես է գալիս Հայաստանի հավաքականի խաղացող Կամո Հովհաննիսյանը: Ինչպիսի՞ տպավորություն է նա թողնում Բելառուսի առաջնությունում:

Հովհաննիսյանը կարողացավ ամրապնդվել թիմի մեկնարկային կազմում: Բելառուսի ընթացիկ առաջնության 28 խաղերից 26-ին նա մասնակցել է եւ դարձել 2 գոլի հեղինակ: Երեւի, դա ցուցանիշ է, սակայն թիմի առաջատար նա չդարձավ: Հովհաննիսյանն արագ է, բայց տեխնիկապես այնպես պատրաստված չէ, որ առանձնանա մյուսների ֆոնին: Կարծում եմ՝ նա դեռ միջին կարգի խաղացող է Բելառուսի եւ Հայաստանի մակարդակի առաջնություններում:

Բելառուսի առաջնությունում հանդես եկած մյուս հայ ֆուտբոլիստներից ո՞վ է աչքի ընկել հիշարժան ելույթներով:

Չեմ ասի, որ որեւէ մեկն աչքի է ընկել հիշվող խաղով: Հայ ֆուտբոլիստները խաղացել են բելառուսական ակումբներում, սակայն թիմում առաջատար չեն դարձել: Բացի այդ, այնքան էլ երկար չեն խաղացել, շատերը՝ մեկ մրցաշրջանից ոչ ավելի: Երեւի, ամենահիշվողը Համլետ Մխիթարայնն էր, որը հանդես էր գալիս ՄՏԶ-ՌԻՊՕ ակումբում: 2004-2006-ը նա անցկացրեց 43 հանդիպում, խփեց 10 գոլ՝ դառնալով Բելառուսի առաջնության բրոնզե մեդալակիր եւ երկրի գավաթակիր: Իհարկե, հիմա այդ ակումբն այլեւս չկա: ԲԱՏԷ-ի կազմում հիշում եմ Հովհաննես Գոհարյանին ու Զավեն Բադոյանին, սակայն առանձնահատուկ ոչինչ չեմ ասի: Նրանք քիչ էին խաղում:

Դավիթ Եղիազարյան

Հետևեք NEWS.am SPORT-ին Facebook-ում, Twitter և Telegram-ում