Ռիո-2016. Լեւան Բերիանիձեն չկարողացավ մեդալ նվաճել Հայաստանի համար

Ռիոյի Օլիմպիական խաղերի ազատ ոճի ըմբշամարտի մրցաշարում Հայաստանի ներկայացուցիչ Լեւան Բերիանիձեն 125 կգ քաշայինների բրոնզե մեդալի համար գոտեմարտում մրցեց Բելառուսի ըմբիշ Իբրահիմ Սաիդովի հետ եւ պարտություն կրեց:

Առաջին մրցափուլում Բերիանիձեն հաղթեց 1:0 հաշվով: Երկրորդ մրցափուլում Սաիդովը երկու միավորի հնարք կատարեց: Դրանից հետո Բերիանիձեն ակտիվ էր, սակայն փոխել դրությունը չհասցրեց: Մեկ միավոր վաստակեց, սակայն մրցակցի հնարքը ավելի բարձր միավորի էր եւ 2:2 հաշվի դեպքում, հաղթանակը շնորհվեց Սաիդովին:

Կիսաեզրափակիչում Բերիանիձեն գոտեմարտել էր աշխարհի կրկնակի չեմպիոն, թուրք Տահա Ակգուլի հետ եւ պարտություն կրել: Առաջին մրցափուլում Բերիանիձեն պարտվեց 1:6 հաշվով: Երկրորդ մրցափուլում Ակգուլը վաստակեց եւս 2 միավոր եւ հաղթանակ տարավ՝ դուրս գալով եզրափակիչ:

Քառորդ եզրափակիչում Բերիանիձեն մրցել էր 27-ամյա հունգարացի Դանիել Լիգետիի հետ: Առաջին մրցափուլում առաջին միավորը վաստակեց Լիգետին: 25-ամյա Բերիանիձեն մինչեւ ընդմիջում հավասարեցնել հաշիվը չկարողացավ՝ 1:0:

Երկրորդ մրցափուլում առաջինը պասիվություն տվեցին Լագետիին, Բերիանիձեն վաստակեց մեկ միավոր, դրանից հետո էլ 2 միավոր վաստակեց եւ հաղթեց 3:1 հաշվով:

1/8 եզրափակիչում  Բերիանիձեն գոտեմարտել էր չինացի Չժիվեյ Դենգի հետ: Առաջին մրցափուլում 2:0 հաշվով հաղթեց Դենգը: Երկրորդ մրցափուլի առաջին կեսում Բերիանիձեն վերադարձրեց մեկ միավորը, երկրորդ մասում պասիվության համար չինացին հայտնվեց պաշտպանվողի դիրքում, Բերիանիձեն վաստակեց եւս մեկ միավոր եւ հաղթանակ տարավ:

Լեւան Բերիանիձե

Ծնվել է 1990 թվականի հոկտեմբերի 10-ին Աբխազիայում։

Մինչեւ 2015 թվականը Վրաստանի հավաքականի, 2015-ից Հայաստանի հավաքականի անդամ է։  2010 թ․ երիտասարդների աշխարհի բրոնզե մեդալակիր է, 2015 թ․ աշխարհի առաջնությունում զբաղեցրել է 4-րդ տեղը, միջազգային մրցաշարերի հաղթող է։ Ռիո-2016-ի ուղեգիրը նվաճել էր 2015 թ․ աշխարհի առաջնությունում։  

Հետևեք NEWS.am SPORT-ին Facebook-ում, Twitter և Telegram-ում