«Բորուսիան» ու «Բավարիան» խաղաղությամբ բաժանվեցին Դորտմունդում

Գերմանական Բունդեսլիգայի 25-րդ տուրի կենտրոնական խաղը կայացավ Դորտմունդում, որտեղ երկրորդ տեղում գտնվող «Բորուսիան» ընդունեց 5 միավորի առավելություն ունեցող առաջատար Մյունխենի «Բավարիային»: Թիմերը չկարողացան գոլերով ուրախացնել երկրպագուներին եւ բաժանվեցին գոլազուրկ ոչ ոքիով՝ 0:0:

Խաղի սկզբնամասն անցնում էր հավասար պայքարում ու փոխնիփոխ գրոհներով: Թիմերը խաղադաշտում պայքարում էին, թե ով պետք է վերահսկի գնդակը, բայց գոլային պահեր գրեթե չկային: Առաջին իրական գոլային պահը եղավ 27-րդ րոպեին, երբ «Բավարիայի» բրազիլացի կիսապաշտպան Դուգլաս Կոստան մեն-մենակ դուրս եկավ տանտերերի դարպասապահի դեմ եւ չկարողացավ գրավել դարպասը: Առաջին խաղակեսի վերջնամասում մյունխենցիների առավելությունը նկատելի էր դարձել: 5 պաշտպաններով խաղացող «Բորուսիան» գործում էր երկրորդ համարով ու հակագրոհներով, իսկ «Բավարիան» ստեղծեց մի քանի վտանգավոր պահեր, որոնք օգտագործել չհաջողվեց:

Հայաստանի հավաքականի կիսապաշտպան Հենրիխ Մխիթարյանը «Բորուսիայի» մեկնարկային կազմում էր եւ բավական ակտիվ էր առաջին խաղակեսում:

Երկրորդ խաղակեսի սկզբանասում դաշտի տերերից գոլային պահ կորցրեց գաբոնցի հարձակվող Պյեր-Էմերիկ Օբամեյանգը, ինչին «Բավարիան» պատասխանեց մի քանի վտանգավոր գրոհներով: «Բորուսիան» գնդակը հանձնել էր մրցակցին, բայց չէր մոռանում նաեւ գրոհելու մասին: Հյուրերը, չնայած բազմաթիվ գրոհներին, միայն մեկ անգամ լուրջ անհանգստացրին Ռոման Բյուրկիին, որի հրաշալի սեյվից հետո գնդակը հետ մղվեց դարպասաձողից: Գրանցվեց 0:0 հաշիվը: Արդյունք, որը ձեռնտու էր Խոսեպ Գվարդիոլայի թիմին: Հենրիխ Մխիթարյանը խաղաց առանց փոխարինման:

«Բավարիան» պահպանում է 5 միավորի առավելությունը դորտմունդցիների նկատմամբ: Թոմաս Տուխելի թիմն էլ իր հերթին 16 միավոր առաջ է անցել լավագույն եռյակը եզրափակող Բեռլինի «Հերտայից»:

Գերմանիայի առաջնություն, 25-րդ տուր

«Բորուսիա Դ.» - «Բավարիա»՝ 0:0

«Բորուսիա». Ռոման Բյուրկի, Էրիկ Դուրմ, Լուկաշ Պիշչեկ, Մատս Հումելս, Սվեն Բենդեր, Մարսել Շմելցեր, Յուլիան Վայգլ, Իլկայ Գյունդոգան (Նուրի Շահին, 90+1), Հենրիխ Մխիթարյան, Մարկո Ռոյս (Ադրիան Ռամոս, 80) Պյեր-Էմերիկ Օբամեյանգ։

«Բավարիա». Մանուել Նոյեր, Ֆիլիպ Լամ, Ջոշուա Կիմիխ, Դավիդ Ալաբա, Խուան Բերնատ, Խաբի Ալոնսո (Մեհդի Բենատիա, 90+1), Արտուրո Վիդալ, Թոմաս Մյուլեր, Դուգլաս Կոստա (Ֆրանկ Ռիբերի, 75), Արյեն Ռոբեն, Ռոբերտ Լեւանդովսկի:

Հետևեք NEWS.am SPORT-ին Facebook-ում, Twitter և Telegram-ում