Օզբիլիսի գոլային փոխանցումը «Սպարտակին» չօգնեց դերբիում, Մովսիսյանը վնասվածք ստացավ

Ֆուտբոլի Ռուսաստանի առաջնության 12-րդ տուրում «Սպարտակը» մոսկովյան դերբիում ընդունեց երկրորդ տեղում գտնվող «Լոկոմոտիվին» եւ պարտվեց 1:2 հաշվով:

Հայաստանի հավաքականի հարձակվող Յուրա Մովսիսյանը վնասվածքից ապաքինվելուց հետո առաջին անգամ ընդգրկվել էր «Սպարտակի» մեկնարկային կազմում: Նա գրեթե աննկատ էր առաջին խաղակեսում, բայց ունեցավ մեկ գոլային պահ, որն օգտագործել չհաջողվեց: «Լոկոմոտիվը» շատ ավելի լավ տեսք ուներ առաջին խաղակեսում եւ ընդմիջման գնաց հաշվի մեջ առջեւում: Երկրորդ խաղակեսի սկզբնամասում հյուրերը խփեցին նաեւ երկրորդ գոլը: Քիչ անց վնասվածք ստացավ Յուրա Մովսիսյանը, որը չկարողացավ շարունակել հանդիպումը, իսկ 56-րդ րոպեին նրան փոխարինեց Հայաստանի հավաքականի կիսապաշտպան Արաս Օզբիլիսը, որը հաջող մտավ խաղի մեջ եւ ակտիվացրեց տանտերերի խաղն առջեւի գծում: Հենց Օզբիլիսի փոխանցումից հետո իտալացի պաշտպան Սալվադորե Բոկետին 77-րդ րոպեին կրճատեց հաշիվը: Դրանից 7 րոպե առաջ Արասը ստացել էր դեղին քարտ: Վերջնամասն անցավ շատ լարված պայքարում: Դմիտրի Ալենիչեւի թիմը մեծ ճնշում էր գործադրում հյուրերի դարպասի մոտ, սակայն պարտությունից խուսափել չհաջողվեց:

«Լոկոմոտիվը» երկրորդն է եւ 5 միավոր զիջում է առաջատար ԲԿՄԱ-ին, իսկ «Սպարտակը» մնաց չորրորդ տեղում: Մոսկովյան ակումբը երրորդ տեղում գտնվող «Զենիթին» զիջում է 2 միավոր, իսկ ԲԿՄԱ-ին՝ 12:

Ռուսաստանի առաջնություն, 12-րդ տուր

«Սպարտակ» - «Լոկոմոտիվ»՝ 1:2

Սալվադորե Բոկետի, 77 – Ալեքսանդր Կոլոմեյցեւ, 9, Օմար Նյասե, 49

Հետևեք NEWS.am SPORT-ին Facebook-ում, Twitter և Telegram-ում