NEWS.am Sport-ը շարունակում է ներկայացնել է 2-րդ պատանեկան օլիմպիական խաղերում Հայաստանի մարզիկներին:
Սիմոն Մարտիրոսյան, ծանրամարտ, +85 կգ քաշային կարգ:
Ծնվել է 1998 թվականին Էջմիածին քաղաքում:
Նանջինգ-2014-ի պատանեկան Օլիմպիական խաղերի ուղեգիր նվաճել է 2014թ. Եվրոպայի առաջնությունում՝ դառնալով ոսկե մեդալակիր:
Ես` ծանրորդ.
«Ես սիրում եմ այս մարզաձեւը: Ծանրամարտով սկսել եմ զբաղվել 13 տարեկանից: Հորեղբայրս` նախկին ծանրորդ է` Եվրոպայի չեմպիոն, աշխարհի փոխչեմպիոն է, նա է ինձ ուղղորդել այս մարզաձեւին: Նրա շնորհիվ եմ ես ծանոթացել ծանրամարտ մարզաձեւին, սիրել եւ մարզվել: Առաջին իսկ մարզումներից ուղղակի շատ եմ սիրել եւ նվիրվել այս մարզաձեւին:
Իրականում շատ բարդ մարզաձեւ է, բայց այն կոփում է տղամարդուն, ինքնավստահություն տալիս, պայքարելուն, դժվարություն հաղթահարելուն սովորեցնում: Այս տարի դարձա Եվրոպայի չեմպիոն: Դա ինձ համար մեծ պատիվ է: Ուղղակի երջանկություն է: Հաճելի է, որ զբաղվում ես մի մարզաձեւուվ, որը շատ ես սիրում»:
Ես` պատանեկան Օլիմպիական խաղերի մասնակից:
«Սա իմ մարզական ճանապարհին դեռեւս ամենապատասխանատու մրցումն է: Տրամադրված եմ շատ մարտական: Պատանեկան Օլիմպիական խաղերի ուղեգիր նվաճել եմ 2014թ. Եվրոպայի առաջնությունում, որտեղ նաեւ գրանցեցի անձնական ռեկորդ: Երբ նվաճեցի Եվրոպայի չեմպիոնի տիտղոսը, ուրախությանս չափ չկար, բայց երբ իմացա, որ նաեւ նվաճել եմ պատանեկան Օլիմպիական խաղերի ուղեգիր, ուրախությունս քառապատկվեց»:
Ակնկալիքներս
«Ես դուրս եմ գալու պատանեկան Օլիմպիական խաղերի մրցահարթակ միայն ոսկե մեդալի համար: Ես վստահ եմ, որ ինձ կհաջողվի: Չեմ թերագնահատում ոչ մի մասնակցի, բայց հոգուս խորքում գիտեմ, որ ոսկե մեդալի եմ պատրաստ: Մարզավիճակս գերազանց է, մարզումներս շատ լավ են անցել: Եթե սպորտային հաջողությունն ինձ ժպտա եւ պատանեկան Օլիմպիական խաղերում ոսկի նվաճեմ, հաղթանակս կնվիրեմ հայ ազգին, մարզիչներիս, ծնողներիս»:
Սիմոն Մարտիրոսյանը օլիմպիական մրցահարթակ դուրս կգա օգոստոսի 23-ին:
Լուսինե Շահբազյան
Հետևեք NEWS.am SPORT-ին Facebook-ում, Twitter և Telegram-ում