Որեւէ այլ երկրում ձմեռային օլիմպիական խաղերի բացման արարողության ժամանակ օլիմպիական դրոշը ստադիոն ներս չէին բերի ամառային մարզաձեւերի ներկայացուցիչները, ասել է բիատլոնի քառակի օլիմպիական չեմպիոն Ալեքսանդր Տիխոնովը, որը նախագահական օթյակից հետեւել է Ադլերի «Ֆիշտ» ստադիոնում կայացած 22-րդ ձմեռային խաղերի բացման արարողությանը:
«Ես երբեք Կարելինի կամ Իսինբաեւայի փոխարեն չէի համաձայնի դրոշ տանել ամառային Օլիմպիական խաղերի բացմանը: Հարգելի գործընկերներ, հրաժարվեք, դուք ձեր խիղճը կորցրել եք: Մենք չունենք մարզական եղբայրություն, դրանից էլ այս արդյունքներն են:
Միխալկովի փոխարեն ես կինո չեմ նկարի, տրիլիոններ է ծախսում ֆիլմերի վրա, բայց դրանք չկան: Մնացել են միայն Միխալկովն ու բեղերը: Նա եւս խիղճը կորցրել է: Ամբողջ մարզական եղբայրության անունից եմ ասում:
Որեւէ այլ երկրում հնարավոր չէ պատկերացնել, որ ձմեռային Խաղերի բացմանը ամառային մարզաձեւերի ներկայացուցիչներ լինեն: Օլիմպիական փոխչեմպիոն Շարապովան դրոշ է տանում, իսկ Ռուսաստանի հերոսներ, վեցակի օլիմպիական չեմպիոն Լյուբով Եգորովան եւ քառակի օլիմպիական չեմպիոն Գալինա Կուլակովան՝ ամբողջ աշխարհում հարգանք վայելող մարդիկ, նստած են տրիբունայում: Միայն հայրենիքում նրանց չեն հիշում: Բոլորս նստած ստադիոնում վրդովված էինք: Նույն տրամադրությունը հետո ավտոբուսում էր»,- Ալեքսանդր Տիխոնովի խոսքը փոխանցում է Championat-ը:
Հիշեցնենք, որ փետրվարի 7-ին կայացավ Սոչիի 22-րդ ձմեռային օլիմպիական խաղերի բացման արարողությունը: Ռուսաստանն առաջին անգամ անցկացնում է ձմեռային Օլիմպիական խաղեր:
Հետևեք NEWS.am SPORT-ին Facebook-ում, Twitter և Telegram-ում