Սոչի-2014. Դրոշակակիր Սերգեյ Միքայելյանի գլխավորությամբ Հայաստանը մասնակցեց օլիմպիական շքերթին (ֆոտո)

Սոչիի «Ֆիշտ» ստադիոնում ընթացող 22-րդ ձմեռային օլիմպիական խաղերում պատվիրակությունների շքերթում ստադիոնով անցավ նաեւ Հայաստանի պատվիրակությունը, որի դրոշակակիրն է դահուկորդ Սերգեյ Միքայելյանը: Սա նրա երկրորդ անընդմեջ Օլիմպիական խաղերն են:

Բացմանը ներկա են նաեւ ՀՀ նախագահ Սերժ Սարգսյանը, ՀԱՕԿ նախագահ Գագիկ Ծառուկյանը, Սպորտի նախարար Յուրի Վարդանյանը:

22-րդ ձմեռային օլիմպիական խաղերը ռեկորդային են մասնակից երկրների թվով: Այս անգամ հայտավորված է 88 երկրի ներկայացուցիչ: 2010թ. Վանկուվերում ներկայացված էր 82 երկիր:

Օլիմպիական ծրագրի ընդլայնման շնորհիվ՝ 86-ից մինչեւ 98, ռեկորդային է նաեւ մասնակիցների թիվը՝ մոտ 2800 մարզիկ:

Առաջին անգամ ձմեռային Օլիմպիական խաղերին մասնակցուն են Մալթայի, Դոմինիկայի, Պարագվայի, Արեւելյան Թիմորի, Տոգոյի, Տոնգայի եւ Զիմբաբվեի ներկայացուցիչները:

Հայաստանն առաջին անգամ ձմեռային Օլիմպիական խաղերին մասնակցելել է 1994-ին: Խաղերն անցկացվել են Նորվեգիայի Լիլեհամեր քաղաքում: Հայաստանը ներկայացել է երկու մարզիկով՝ Ժոզեֆ Ալմասյան եւ Քենեթ Թոփալյան (բոբսլեյ):

Ճապոնիայի Նագանո քաղաքում կայացած ձմեռային Օլիմպիական խաղերին (1998) Հայաստանը ներկայացել է 6 մարզիկով (4 մարզաձեւում). Ալլա Միքայելյան (դահուկավազք),Արսեն Հարությունյան (լեռնադահուկ), Արմեն Ռաֆայելյան (դահուկային ֆրիսթայլ), Ալեքսանդր Չեստնիխ (գեղասահք, զուգապար), Մարիա Կրասիլցեւա (գեղասահք, զուգապար), Քսենյա Սմետանենկո (գեղասահք, մենապար):

2002-ին Խաղերն անցկացվեցին ԱՄՆ-ի Սոլթ Լեյք Սիթիում: Հայաստանից մասնակցել է 9 մարզիկ, կրկին 4 մարզաձեւում. Արսեն Հարությունյան (լեռնադահուկ),Վանեսա Ռաքեջյան (լեռնադահուկ), Ալեքսանդրու Ջորջոս եւ Դանիել Ջանջիգյան (բոբսլեյ), Արամ Հաջիյան (դահուկավազք),Մարգարիտա Նիկոլյան (դահուկավազք), Քրիստինե Խաչատրյան (դահուկավազք),Արտյոմ Զնաչկով (գեղասահք, զուգապար), Մարիա Կրասիլցեւա (գեղասահք, զուգապար), Յուլյա Լեբեդեւա (գեղասահք, մենապար):

Իտալիայի Թուրին քաղաքում կայացած Խաղերին (2006) Հայաստանը ներկայացրել է 4 մարզիկ՝ 3 մարզաձեւում. Վազգեն Ազրոյան (գեղասահք),Աբրահամ Սարկախյան (լեռնադահուկ), Էդմոնդ Խաչատրյան (լեռնադահուկ),  Հովհաննես Սարգսյան (դահուկավազք):

2010թ. Վանկուվերի Խաղերին Հայաստանը ներկայացավ կրկին 4 մարզիկով, այս անգամ 2 մարզաձեւում. Արսեն Ներսիսյան (լեռնադահուկ), Անի-Մաթիլդա Սերեբրակյան (լեռնադահուկ), Սերգեյ Միքայելյան (դահուկավազք), Քրիստինե Խաչատրյան (դահուկավազք):

2012-ին ստեղծված NEWS.am Sport-ի համար սա առաջին ձմեռային Օլիմպիական խաղերն են, եւ այն լուսաբանում ենք օլիմպիական մայրաքաղաքից: 

Հետևեք NEWS.am SPORT-ին Facebook-ում, Twitter և Telegram-ում