Ferrari-ի խայտառակության փոքրիկ օրագրությունը

Ferrari-ն հերթական խայտառակության դուռն է չոքում, թեպետ Մոնցայում վատ հանդես չեկավ: Այդ թիմն այսօր հիշեցնում է Կրիշտիանու Ռոնալդուին: Միշտ լավն է, սակայն ոչ «Լեո Մեսիի», այս դեպքում՝ Red Bull-ի գոյության դաշտում: Սեբաստիան Ֆետելը մեկ շնչով վերցնում է Մոնցան` Red Bull-ի աքիլեսյան գարշապարը, ինչպես անողոքորեն արտահայտվել էր թիմի մարզական տնօրեն Քրիստիան Հորները: Ալոնսոն գրավում է երկրորդ տեղը, ընդ որում, թիմի կառավարման վահանակի մոտ նստածների մեղքով: Ֆետելի պիտ կանգառ մտնելու ժամանակ նրանք կարող էին այնտեղ կանչել նաեւ Ալոնսոյին, որը հրաշալի արագություն էր զարգացրել մինչ այդ: Սակայն Ֆետելը պիտ կանգառից դուրս եկավ նոր անվադողերով, իսկ Ալոնսոն մի քանի շրջան դեռ մաշում էր առաջին անվադողերը ամեն շրջանին կորցնելով մոտ մեկ վայրկյան: Արդյունքում Ալոնսոն մի կերպ պահպանեց երկրորդ տեղը:

Առջեւում դեռ 7 Գրան Պրի կա, սակայն Ֆետելն իր վերջին հաղթանակով ապահովեց 50 միավորի տարբերություն, որը երկու Գրան Պրիի առաջին տեղի միավորների քանակն է: Այսինքն, ինտրիգը վերականգնելու համար անհրաժեշտ է, որ Ալոնսոն հաղթի երկու Գրան Պրի՝ պայմանով, որ 7-ից երկուսում Ֆետելը եզրագիծ չհասնի: Դա, ըստ էության անիրականանալի է: Նշանակում է, Ferrari-ն պետք է կենտրոնանա 2014-ի մրցաշրջանի վրա: Հիմա ժամանակն է հասկանալ, թե ինչու հերթական անգամ Ferrari-ի մոտ ոչինչ չստացվեց: Ավստրալիայում Ալոնսոն գրավեց երկրորդ տեղը, թեպետ մեկ շրջանի նրա լավագույն արդյունքը 7-րդն էր: Նա հայտարարում է, որ Ferrari-ի արագությունն իրեն բավարարում է: Մալայզիայում հենց առաջին շրջանում Ալոնսոն դուրս է մնում պայքարից: Նրա բոլիդը մեկնարկին բախվում է Red Bull-ի առաջին համարի բոլիդին եւ շարքից դուրս գալիս: «Մեր բախտը չբերեց»,- հայտարարում է Ալոնսոն: Շանհայում Ալոնսոն հաղթում է: Այս անգամ. «Չի բացառվում, որ բախտներս բերեց»: Նա բոլիդի հնարավորությունները գիտի. «Մենք պատրանքներ չունենք»: Բահրեյնում Ալոնսոն 8-րդն է: Ստեֆանո Դոմենիկալին հայտարարում է. «Բոլիդը մեծ պոտենցիալ ունի»: Տեխնիկական տնօրեն Պիտ Ֆրայը վստահեցնում է, որ Ferrari-ն կարող է պայքարել առաջին տեղի համար: Ֆերնանդոյի F138-ի վրա փչացել էր վերին հակաթեւի տուրբուլենտային կարգավորումը, որն օգնում է արագություն զարգացնելուն:

Իսպանիայում Ալոնսոն կրկին հաղթում է. «Կարծում եմ, մեր բոլիդը կարող է պայքարել աշխարհի չեմպիոնի կոչման համար»: Մարզասերներն այս տարվա ընթացքում վերջին անգամ են Ալոնսոյին տեսնում այդքան երջանիկ: «Ես հասկանում եմ, որ դեռ զիջում ենք արագության հարցում»,-ամոթխածոր ասում է Ֆերնանդոն: Ենթադրվում է, որ փորձում է թուլացնել Red Bull-ի զգոնությունը: Էդրիան Նյուիի ուշքն ու միտքը սակայն Mersedes-ն է, նրանք են իրար հետեւից վերցնում որակավորման բոլոր մրցումները: Այս մրցաշրջանում առայժմ միայն նրանք են մեկնարկում առաջին տեղից: Մոնակոյում հենց Mersedes-ն էլ հաղթում է: 2-րդ, 3-րդ տեղերը վերցնում է Red Bull-ը, Ալոնսոն միայն 7-րդ տեղում է եզրափակում մրցումը: Նույնիսկ չգիտի, թե ինչ ասի: Սակայն առաջին անգամ խոստովանում է. «Դեռ շատ ճանապարհ ունենք անցնելու, որպեսզի մեքենան բարելավենք»: Կանադայում Ալոնսոն 2-րդն է՝ Ֆետելից հետո: Դեմքին բացարձակապես ոգեւորություն չկա, թեպետ մեկնարկել էր 6-րդ տեղից: «Առջեւում դեռ երկար ճանապարհ կա»,- բոլիդի հնարավորությունների բարելավման մասով կրկներգում է Ալոնսոն: Իսկ Ֆետելն արդեն միավորներով պոկվել է «մեկ ու կես» Գրան Պրի:

Մեծ Բրիտանիայում այս մրցաշրջանում առաջին անգամ Ֆետելը եզրագիծ չի հասնում: Ալոնսոն 3-րդն է. «Եթե այսօր առավոտյան ինձ ասեին, որ ես պոդիում կբարձրանամ, չէի հավատա»: Իսպանացին կրկին վկայակոչում է բախտի գործոնը, արդեն չի էլ հասկանում, թե ինչ է կատարվում բոլիդի հետ, որ չեն կարողանում հաղթել: Գերմանիայում Ֆետելը հաղթում է 4-րդ անգամ, իսկ ինքը 4-րդ տեղում է: Մեկնարկել էր 8-րդից: «Մենք դարձյալ արագ չէինք»,- հենց այնպես ասում է նա: Հունգարիայում Ալոնսոն գրավում է 5-րդ տեղը: Արդեն 5-րդ տեղը նույնիսկ ոգեւորում է աշխարհի կրկնակի չեմպիոնին. «Mersedes-ը, Lotus-ը եւ Red Bull-ն ավելի արագ են»,- լրագրողներին ասում է նա: Կանոնավոր նվաճումներն սկսվում են Բելգիայից ու Իտալիայից: Երկու մրցուղիներում էլ Ալոնսոն 2-րդ տեղն է գրավում: Ցավն այն է, որ երկուսում էլ հաղթում է Ֆետելը: Սպայի հաղթահարթակում Ալոնսոն կանգնած է ինչպես սառույց, իսկ Մոնցայում՝ նույնիսկ մռայլ: Նա կորցրել է մոտիվացիան: Նա սգում է Ferrari-ի անզորությունը: Սպայում «կծում» է իր գործատուի՝ Ferrari-ի կոնստրուկտորներին. «Նույնիսկ եթե մեկնարկեի առաջին տեղից, միեւնույն է, կգրավեի 2-րդ տեղը»: Բոլիդը թարմացվել էր տեխնիկական որոշ նորարարություններով: Մոնցայից հետո Ալոնսոն գրեթե հանձնվում է. «Պետք է լինել իրատես՝ անհատական հաշվարկում 53 միավորի տարբերությունը վերացնելը հեշտ չէ»:

Twitter-ում օգտատերի այն հարցին, թե դեռ հավատում եք, որ կհաղթեք այս տարվա առաջնությունը, Ալոնսոն պատասխանում է, որ մենք դրան հավատալու ենք մինչեւ մրցաշրջանի ավարտը: Վերջին երեք առաջնություններում նա երկու անգամ դարձել է փոխչեմպիոն: Սոցցանցերում խոսում են, որ անցյալ տարվա բոլիդն ավելի լավ էր «համագործակցում» Ալոնսոյի հետ: Դա ճիշտ է, որովհետեւ անցյալ տարի Իտալիայում Ալոնսոն ընդհանուր հաշվարկում 39 միավորով առաջին տեղում էր, իսկ առաջնությունը ձախողեց 3 միավորի տարբերությամբ:

Մհեր Արշակյան

Հետևեք NEWS.am SPORT-ին Facebook-ում, Twitter և Telegram-ում