Գեւորգ Թադեւոսյան. Շատ սպասված մեդալ էր ինձ համար (տեսանյութ)

Շատ սպասված մեդալ էր ինձ համար: Նպատակս մասնակցելն ու հաղթելն էր, բայց այս անգամ բավարարվեցի բրոնզե մեդալով: Անհատական սպորտում, այսպիսի մեդալների հետեւում միշտ մեծ թիմ է կանգնած:

Այս մասին «Զվարթնոցում» ասաց աշխարհի առաջնության բրոնզե մեդալակիր Գեւորգ Թադեւոսյանը, որը նախորդ գիշեր Հայաստանի թիմի հետ վերադարձավ հայրենիք:

Ղազախստանի մայրաքաղաք Աստանայում ավարտված հունահռոմեական ոճի ըմբշամարտի աշխարհի առաջնությունում Գեւորգ Թադեւոսյանը նվաճեց բրոնզե մեդալ: 87 կգ քաշային կարգի բրոնզե մեդալի համար գոտեմարտում Թադեւոսյանը մրցեց Ուկրաինան ներկայացնող Յարոսլավ Ֆիլչակովի հետ եւ հաղթեց 4:1 հաշվով:

«Շատ սպասված մեդալ էր ինձ համար: Ճիշտ է՝ նպատակս մասնակցելն ու հաղթելն էր, բայց այս անգամ բավարարվեցի բրոնզե մեդալով: Տեխնիկական եւ տակտիկական սխալներ թույլ տվեցի, որի վրա կաշխատենք մարզիչների հետ, կշտկենք: Մյուս մրցաշարերին ավելի լավ պատրաստված կլինեմ:

Թե կիսաեզրափակիչին, թե բրոնզե մեդալի համար գոտեմարտին պատրաստվել էի շատ լավ: Կիսաեզրափակիչին ավելի լավ էի պատրաստվել, որպեսզի կարողանամ հաղթել Իրանի ներկայացուցիչին եւ դուրս գամ եզրափակիչ: Ցավոք, ինչ-ինչ պատճառներով սխալներ թույլ տվեցի: Հասկանում եմ, որ կարեւոր գոտեմարտ էր եւ կարող էի հաղթանակը բաց չթողնել ու դուրս գալ եզրափակիչ:

Բրոնզե մեդալի համար գոտեմարտում համառ պայքար ստացվեց, շատ բուռն էր: Հաղթելու ցանկությունս շատ մեծ էր: Ուրախ եմ, որ կարողացա բրոնզե մեդալը նվաճել: Անհատական սպորտում, այսպիսի մեդալների հետեւում միշտ մեծ թիմ է կանգնած: Մարզիչներիս, ընկերներիս շնորհիվ կարողացա ճիշտ գոտեմարտել, մինչեւ վերջ պայքարել եւ հասնել իմ նպատակին»,- ասաց Գեւորգ Թադեւոսյանը:

Աստանայում ավարտված աշխարհի առաջնությունում Գեւորգ Թադեւոսյանը կիսաեզրափակիչում պարտվել էր Իրանի ներկայացուցիչ Ալիրեզա Մոհմադիպիանին:

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում