Մեկնարկել է Հայաստան - Ղազախստան ընկերական հանդիպման տոմսերի վաճառքը

Մեկնարկել է ֆուտբոլի Հայաստան - Ղազախստան ընկերական հանդիպման տոմսերի վաճառք։

Մրցախաղը տեղի կունենա հունիսի 6-ին Երևանի Վազգեն Սարգսյանի անվան «Հանրապետական» ստադիոնում եւ կմեկնարկի 18:00-ին։

Տոմսերը հասանելի են tickets.ffa.am կայքում: Ինչպես այս, այնպես էլ Հայաստանի ազգային հավաքականի հաջորդ բոլոր հանդիպումների տոմսերը վաճառվելու է միայն առցանց․ տոմսերի ֆիզիկական վաճառք չի նախատեսվում, հաղորդում է ՀՖՖ-ի կայքը:

Յուրաքանչյուր անձ կարող է գնել Հայաստան-Ղազախստան խաղի ոչ ավելի, քան 4 տոմս: Գնումից հետո օգտատերը տեսնելու է իր գնած տոմսերը tickets.ffa.am կայքի անձնական հաշվում, սակայն տոմսերի QR կոդերն ակտիվանալու են միայն հանդիպման օրը:

Տոմս գնելու համար հարկավոր է անցնել անձնագրային նույնականացում tickets.ffa.am կայքում:

Նույնականացման համար անհրաժեշտ տվյալները մուտքագրելուց հետո պետք է սպասել հաստատմանը, որը կատարվում է յուրաքանչյուր օր՝ ժամը 10։00-20։00՝ 30 րոպեի ընթացքում:

Տոմսերի գինը 1000 - 8000 դրամ է։

Անվտանգության նկատառումներից ելնելով և կուտակումներից խուսափելու նպատակով նպատակահարմար է մարզադաշտ գալ խաղից առնվազն 2 ժամ առաջ:

Հետևեք NEWS.am SPORT-ին Facebook-ում, Twitter և Telegram-ում