Արթուր Դավթյան․ Եվրոպայի առաջնությունում գերնպատակս ոսկե մեդալ նվաճելն է

Գերմանիայում դահլիճային պայմանները շատ լավն են: Ես, թիմը նույնպես լավ մարզավիճակում ենք, բոլորս գերազանց մարզումներ ենք ունեցել այստեղ: Եվրոպայի առաջնությունում գերնպատակս ոսկե մեդալ նվաճելն է: Ամենակարեւորն այն է, որ ես իմ ցատկերը կարողանամ անել այնպես, ինչպես անում եմ:

Այս մասին NEWS.am Sport-ի թղթակցի հետ զրույցում Բեռլինից ասաց Օլիմպիական խաղերի արծաթե եւ բրոնզե մեդալակիր, աշխարհի չեմպիոն, Եվրոպայի կրկնակի չեմպիոն, աշխարհի եռակի գավաթակիր Արթուր Դավթյանը:

Օլիմպիական փոխչեմպիոնը Հայաստանի հավաքականի հետ այս օրերին վերջին մարզումներն է անցկացնում սպորտային մարմնամարզության Եվրոպայի առաջնությունից առաջ: Հակոբ Սերոբյանի գլխավորած հավաքականը մայիսի 12-ից Գերմանիայի հավաքականի հետ համատեղ ուսումնամարզական հավաք է անցնում Բեռլինում, որտեղից մայիսի 23-ին թիմը կմեկնի Լայպցիգ:

«Գերմանիայի թիմի հետ համատեղ հավաքը հետաքրքիր է անցնում: Ամեն ինչ այնպես էր, ինչպես ծրագրել էինք: Դահլիճային պայմաններն այստեղ շատ լավն են: Ես, թիմը նույնպես լավ մարզավիճակում ենք, բոլորս գերազանց մարզումներ ենք ունեցել այստեղ:

Եվրոպայի առաջնությունից սպասելիքներ ունենք: Մեր ամբողջ թիմից ակնկալիքներ կան: Մեր ուժերը փորձելու ենք թիմային պայքարում: Սա փորձնական է լինելու 2027 թ. Եվրոպայի եւ աշխարհի առաջնությունների համար: Ուզում ենք թիմ պատրաստել: Քանի որ սա փորձնական է լինելու, վստահ չեմ կարող ասել, որ բոլորս շատ լուրջ պատրաստվել ենք թիմային աշխատանքին: Կփորձենք միավոր վաստակել մեր ուժեղ գործիքների վրա, հետո մեր ուժերը կփորձենք մյուս գործիքների վրա, որոնցում այդքան էլ ուժեղ չենք:

Հենացատկի վարժությունում գերնպատակս ոսկե մեդալ նվաճելն է: Ամենակարեւորն այն է, որ ես իմ ցատկերը կարողանամ անել այնպես, ինչպես անում եմ:

Օլիմպիական խաղերից հետո եւս մեկ փոփոխություն եղավ հենացատկում. ցատկելիս, երբ կանգնում ես ու քայլ չես անում, 1 տասնորդական միավոր ավել են գնահատում: Աշխատում եմ այս ուղղությամբ, փորձում եմ այնպես անել, որ քայլ չանեմ: 1 տասնորդական միավորը երկու ցատկերի հանրագումարում էլ կարող է շատ բան փոխել»,- ասաց Արթուր Դավթյանը:

Եվրոպայի առաջնությունը կանցկացվի մայիսի 26-ից 31-ը Գերմանիայի Լայպցիգ քաղաքում:

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում