ԱԱ-ն երկու տարին մեկ անցկացնելու հիմնավորումներ Արսեն Վենգերից

ՖԻՖԱ-ի Ֆուտբոլի գլոբալ զարգացման բաժնի ղեկավար, Լոնդոնի «Արսենալի» նախկին գլխավոր մարզիչ, ֆրանսիացի Արսեն Վենգերը ներկայացրել է հերթական հիմնավորումները, թե ինչու աշխարհի առաջնությունը պետք է անցկացվի երկու տարին մեկ։

«Ես հավատում եմ, որ ֆուտբոլիստները ցանկանում են մասնակցել կարեւոր եւ նշանակալի հանդիպումների։ Նրանք չեն ցանկանում խաղալ այնպիսի հանդիպումներում, որոնք քիչ նշանակություն ունեն։ Բոլորը ցանկանում են մրցակցային միջավայր։ Եթե ես հիմա ձեզ առաջարկեմ դառնալ աշխարհի չեմպիոն՝ թեկուզ 10 րոպե, դուք կհամաձայնեք։ Պետք է այդպիսի հնարավորություններ ավելի շատ լինեն։

Հիմա եթե որեւէ հավաքական այդքան էլ ուժեղ չէ աշխարհի առաջնության համար, ստիպված է մի ամբողջ հավերժություն սպասել։ Եթե ֆուտբոլիստը վնասվածք է ստանում, նա բաց է թողնում աշխարհի առաջնությունը եւ սպասում է չորս տարի։

Հիմա ժամանակի ընկալումն է փոխվել, երիտասարդ սերունդը ցանկանում է, որ իրենց ավելի շատ ու ավելի հաճախ զվարճացնեն»,- Վենգերի խոսքը մեջբերում է Sky Sports-ը։

ՖԻՖԱ-ի նախագահ Ջանի Ինֆանտինոն եւս կողմ էր արտահայտվել ԱԱ-ն 2 տարին մեկ անցկացնելուն։ ՖԻՖԱ-ում հույս ունեն փոփոխությունն ընդունել մինչեւ 2030 թվական։

2022-ի ԱԱ-ն անցկացվելու է Քաթարում, 2026-ինը՝ Կանադայում, ԱՄՆ-ում եւ Մեքսիկայում համատեղ։

Հետևեք NEWS.am SPORT-ին Facebook-ում, Twitter և Telegram-ում