Սլավիկ Գալստյանը չներկայացավ բրոնզե մեդալի համար գոտեմարտին

Հայաստանի ներկայացուցիչ Սլավիկ Գալստյանը (67 կգ) Հունգարիայի մայրաքաղաք Բուդապեշտում անցկացվող հունահռոմեական ոճի ըմբշամարտի եվրոպական գոտու օլիմպիական վարկանիշային մրցաշարում չներկայացավ բրոնզե մեդալի համար գոտեմարտին:

Հայ ըմբիշը բրոնզե մեդալը պետք է վիճարկեր ուկրաինացի Արտուր Պոլիտաևի հետ, որին հաղթանակ շնորհվեց առանց պայքարի:

2019թ. աշխարհի առաջնության բրոնզե մեդալակիր Սլավիկ Գալստյանը նախօրեին պայքարը սկսել էր որակավորման փուլից, որտեղ 9:6 հաշվով հաղթել էր բելառուս Ալեքսանդր Լիավոնչուկին: 1/8 եզրափակիչում նա ժամանակից շուտ ուժեղ էր գտնվել ֆրանսիացի Մամադասա Սիլայից՝ 10:1, իսկ քառորդ եզրափակիչում դարձյալ ժամանակից շուտ 14:6 հաշվով պարտության էր մատնել ադրբեջանցի Իսլամբեկ Դադովին: Կիսաեզրափակիչում Գալստյանը մրցել էր վրացի Ռամազ Սոիձեի հետ և առաջին մրցափուլում պարտվել 1:10 հաշվով:  

Հունահռոմեական ըմբշամարտի Հայաստանի հավաքականի կազմում մարտի 20-ին հանդես էին եկել նաև Գևորգ Ղարիբյանը (60 կգ), Արթուր Շահինյանը (87 կգ) և Դավիթ Օվասապյանը (130 կգ), որոնք հաղթանակով մեկնարկելուց հետո պարտվել էին քառորդ եզրափակիչում: Արթուր Շահինյանը հնարավորություն էր ստացել պայքարել բրոնզե մեդալի համար, սակայն չներկայացավ սփոփիչ գոտեմարտին, որտեղ պետք է մրցեր թուրք Մետեհան Բասարի հետ:

Բուդապեշտի մրցաշարում Տոկիոյի Օլիմպիական խաղերի ուղեգիր են նվաճում միայն եզրափակիչ դուրս եկած ըմբիշները:

Հունահռոմեական ըմբշամարտի Հայաստանի հավաքականի կազմում Տոկիո-2020 Օլիմպիական խաղերի ուղեգիր ունեն Կարապետ Չալյանը (77 կգ) և Արթուր Ալեքսանյանը (97 կգ):

Հիշեցնենք, որ ազատ ոճի ըմբշամարտի Հայաստանի հավաքականը մրցավայր էր մեկնել 4 ըմբիշով և նվաճեց 2 ոսկե մեդալ: 2020թ. աշխարհի գավաթի հաղթող Վազգեն Թևանյանը (65 կգ) և Եվրոպայի 2019թ. չեմպիոն Արսեն Հարությունյանը (57 կգ) դարձել էին ոսկե մեդալակիր և նվաճել Տոկիոյի Օլիմպիական խաղերի ուղեգիր: Հրայր Ալիխանյանը (74 կգ) և Հովհաննես Մխիթարյանը (86 կգ) հաջողության չէին հասել: 

Հետևեք NEWS.am SPORT-ին Facebook-ում, Twitter և Telegram-ում