Շախմատի ֆեդերացիայում Լևոն Արոնյանի որոշման վերաբերյալ քննարկումներ եղել են, նաև՝ նախագահի հետ, բայց այդ պահին ես ներկա չեմ եղել: Այս մասին լրագրողների հետ զրույցում հայտնեց Հայաստանի շախմատի ֆեդերացիայի փոխնախագահ Սմբատ Լպուտյանը, որն անդրադարձավ հայկական շախմատի առաջատար Լևոն Արոնյանի շուրջ ստեղծված իրավիճակին, փոխանցում է NEWS.am Sport-ի թղթակիցը:
«Իրականում, ես հիմա գուցե չկարողանամ տալ ամբողջական ճիշտ պատասխանը, այդ պատճառով չէի ցանկանա կարծիք հայտնել այդ հարցի շուրջ: Վստահ եմ, որ Լևոնը կարտահայտվի իր որոշման վերաբերյալ: Այնպես որ, կցանկանայի, որ այդ մասով խոսեր Լևոնը: Ես զրուցել եմ Լևոնի հետ և նա ասել է, որ այդ հարցերին կպատասխանի ինքը: Կարծում եմ՝ ճիշտ կլինի, որ հենց նա պատասխանի: Ֆեդերացիայում այդ հարցով քննարկումներ եղել են, բայց այդ պահին ես ներկա չեմ եղել: Կարող եմ ասել մեկ բան, որ Լևոնի պես շախմատիստներ հազվադեպ են ծնվում, և դրանք գանձեր են շախմատային աշխարհի ու մեր երկրի համար: Շատ կցանականայի, որ հասարակությունը կարողանա գնահատել արժեքները: Շատ հեշտ է արժեքազրկել, բայց արժեքներ ձեռք բերելը դա բոլորին չի տրվում: Լևոնին համարում եմ հայկական շախմատի պատմության լավագույն ներկայացուցիչներից մեկը: Մենք միշտ փայփայել ենք այդ արժեքնելը և եղել հոգատար բոլոր ոլորտների այդպիսի մարդկանց հանդեպ: Եթե մարդիկ ճանաչում են բերում հայ ժողովրդին, մենք պետք է լինենք շատ հոգատար և ուշադիր»,- ասել է Սմբատ Լպուտյանը:
Հարցին, թե արդյոք այս պահին Լևոն Արոնյանը Հայաստանի հավաքականի կազմում է և շարունակում է մնալ թիմի առաջատարը, Լպուտյանը նշեց հետևյալը.
«Ես այդպիսի բան չասացի: Այդ մասին կխոսի Լևոնը: Ցանկանում եմ դիմել մեր հասարակությանը, փորձենք չոտնահարել բոլոր ոլորտներում մեր ունեցած արժեքները: Հիմնականում դրանք ոտնահարում են մարդիկ, որոնք շատ բան չեն կարողանում անել: Եթե շախմատիստը ցանկանա տեղափոխվել այլ երկիր, ֆեդերացիան ոչինչ չի կարող անել: Ես դժվար եմ պատկերացնում մեր հավաքականի բարձր ցուցանիշներն առանց Լևոն Արոնյանի: Մենք ունենք լավ պատանի շախմատիստներ, որոնք մոտենում են թիմի ամբողջական անդամ դառնալուն, բայց այդպիսի տաղանդներ հազվադեպ են լինում: Մենք շատ անելիքներ ունենք: Հեշտ չէ հենց այնպես փոխարինել Լևոն Արոնյանի պես շախմատիստի»:
Ավելի վաղ լուրեր էին շրջանառվում, որ Լևոն Արոնյանը հրաժարվել է հանդես գալ ՀՀ դրոշի ներքո եւ պատրաստվում է մշտական բնակության տեղափոխվել ԱՄՆ և ներկայացնել այդ երկիրը։
Տեղեկությունը համացանցում հայնտվելուն պես դժգոհությունների մեծ ալիք բարձրացրեց: Ավելի ուշ Լևոն Արոնյանի մայր Սեդա Արոնովնան ֆեյսբուքյան գրառումով անդրադարձել էր որդու հասցեին քննադատություններին:
Լուսինե Շահբազյան
Հետևեք NEWS.am SPORT-ին Facebook-ում, Twitter և Telegram-ում
23:43 , 28 ապրիլի 
23:04 , 28 ապրիլի 
21:44 , 28 ապրիլի 
21:36 , 28 ապրիլի 
21:07 , 28 ապրիլի 
19:22 , 28 ապրիլի 
19:19 , 28 ապրիլի 
19:06 , 28 ապրիլի 
17:57 , 28 ապրիլի 
16:27 , 28 ապրիլի 
