Եթե մարզիչը չի ցանկանում հրավիրել մի ֆուտբոլիստի, մենք չենք կարող նրան ստիպել ու ասել, որ պետք է հրավիրվի:
Այս մասին հայտարարել է Դորտմունդի «Բորուսիայի» եւ ֆուտբոլի Հայաստանի ազգային հավաքականի կիսապաշտպան Հենրիխ Մխիթարյանը, որն ընկերական խաղում Բելառուսի դեմ գոլազուրկ ոչ ոքիից հետո պատասխանեց լրագրողների հարցերին, փոխանցում է NEWS.am Sport-ի թղթակիցը:
Ի՞նչ կարծիքի ես խաղի մասին:
Կարծում եմ՝ լավ խաղացինք: Ճիշտ է, չկարողացանք գոլ խփել, բայց նախորդ խաղի համեմատ ավելի լավ գործեցինք, ստեղծեցինք ավելի շատ պահեր: Կարծում եմ, որ վատ չէր առաջին հանդիպման համար:
Դրվագներից մեկում հարված ստացար ոտքիդ: Ամեն բան նորմա՞լ է:
Փառք Աստծո, ամեն բան նորմալ է: Շնորհակալություն:
Ի՞նչ կասես նորեկների մասին: Նրանց հետ համագործակցությունը ստացվե՞ց:
Կարծում եմ, որ Գոռ Մալաքյանն ու Դավիթ Մանոյանը դաշտի կենտրոնում շատ լավ հանդես եկան երկար բացակայությունից հետո: Փոխարինման դուրս եկած մյուս ֆուտբոլիստները նույնպես կարողացան լավ գործել: Կարծում եմ՝ նրանց դեռ ժամանակ է պետք մերվելու համար: Հույս ունենանք, որ հավաքականն ավելի ուժեղ կդառնա:
Երիտասարդ դարպասապահի ներկայությունը հոգեբանորեն ազդո՞ւմ էր խաղացողների վրա:
Եթե խաղում է ազգային հավաքականում, ուրեմն պատրաստ է: Ճիշտ է, գուցե նրա մոտ լարվածություն կար, քանի որ առաջին խաղն էր, բայց լավ հանդես եկավ եւ կարողացավ փրկել մի քանի դրվագներում: Հուսով ենք, որ մնացած հանդիպումներում կգործի էլ ավելի լավ:
Մարզիչի առաջադրանքներից ի՞նչը հաջողվեց կատարել, ինչը՝ ոչ:
Խաղից հետո մարզիչը գոհունակություն հայտնեց եւ ասաց, որ կատարել ենք գրեթե այն ամենը, ինչ նա հանձնարարել էր: Մենք էլ փորձեցինք անել այն ամենը, ինչ պահանջվում էր մեզանից: Կարծում եմ՝ միայն գոլն էր պակասում:
Բերեզովսկու փոխարինման պահը շատ խորհրդանշական ստացվեց: Ինչպիսի՞ զգացողություններ ունեցար այդ պահին:
Ճիշտն ասած, հաճելի զգացողություններ էին, քանի որ ճանապարհում էինք մի ֆուտբոլիստի, որը 19 տարի ոչ մի բան չի խնայել ազգային հավաքականի համար: Նա խաղացել է բարձր մակարդակով եւ հոգի ու սիրտ է ներդրել, որպեսզի ուրախացնի մեր ազգին: Շատ լավ զգացողություններ էին:
Հավաքականում հիմա հոգեբանական ի՞նչ վիճակ է ՀՖՖ նախագահի վերջին հայտարարություններից հետո:
Ճիշտն ասած, մենք ընդհանրապես ուշադրություն չենք դարձնում: Մեր գործը ֆուտբոլ խաղալն է: Ինչ կարող ենք անել: Եթե մարզիչը չի ցանկանում հրավիրել մի ֆուտբոլիստի, մենք չենք կարող նրան ստիպել ու ասել, որ պետք է հրավիրվի: Մեզանից ինչ հասնում է, մենք անում ենք դա խաղադաշտում: Ես չգիտեմ՝ դուք ինչ նկատի ունեք:
Դավիթ Եղիազարյան
Լուսանկարն՝ Արսեն Սարգսյանի
Հետևեք NEWS.am SPORT-ին Facebook-ում, Twitter և Telegram-ում