Անգլիայի ազգային հավաքականն առաջին հաղթանակը տարավ Լեհաստանում եւ Ուկրաինայում ընթացող Եվրո-2012-ում: Կիեւի «Օլիմպիական» ստադիոնում կայացած խաղում Ռոյ Հոջսոնի թիմը 3:2 հաշվով առավելության հասավ Շվեդիայի հավաքականի նկատմամբ:
Առաջին խաղակեսում թիմերը մի քանի հարվածներ կատարեցին միմյանց դարպասների ուղղությամբ, ինչից հետո անգլիացիները բացեցին հանդիպման հաշիվը: 23-րդ րոպեին Ստիվեն Ջերարդի կատարած փոխանցումից հետո Էնդի Քերոլը գլխի հարվածով առաջ մղեց Անգլիայի թիմին: Առաջին խաղակեսն ավարտվեց անգլիացիների նվազագույն առավելությամբ:
Ընդմիջումից անմիջապես հետո շվեդները հավասարեցրին հաշիվը: Անգլիացի պաշտպան Գլեն Ջոնսոնը գրավեց սեփական դարպասը՝ խփելով Շվեդիայի թիմի պատասխան գնդակը: Այս գոլից 10 րոպե անց 34-ամյա պաշտպան Օլաֆ Մելբերգը եւս մեկ գնդակ ուղարկեց անգլիացիների դարպասը՝ առաջ մղելով Շվեդիայի հավաքականին: Րոպեներ անց փոխարինման մտած անգլիացի կիսապաշտպան Թեո Ուոլքոտը հավասարեցրեց հաշիվը, իսկ 78-րդ րոպեին «Մանչեսթեր Յունայթեդի» հարձակվող Դենի Ուելբեկը խփեց Անգլիայի հավաքականի հաղթական գնդակը: Շվեդները երկրորդ անընդմեջ պարտությունը կրեցին՝ զրկվելով փլեյ-օֆֆ դուրս գալու հնարավորությունից:
Այս հաղթանակից հետո անգլիացները վաստակեցին չորս միավոր եւ հավասարվեցին D խմբի մրցաշարային աղյուսակը գլխավորող Ֆրանսիայի հավաքականին: Ուկրաինացիներն ունեն երեք միավոր, իսկ Շվեդիայի հավաքականը միավորներ չի վաստակել:
Խմբային փուլի վերջին տուրում անգլիացիները կխաղան ուկրաինացիների հետ, իսկ Շվեդիայի հավաքականի մրցակիցը կլինի Ֆրանսիայի թիմը:
Եվրո-2012, խմբային մրցաշար
D խումբ, երկրորդ տուր
Շվեդիա – Անգլիա՝ 2:3
Ջոնսոն, 49 (ինքնագոլ), Մելբերգ, 59,– Քերոլ, 23, Ուոլքոտ, 64, Ուելբեկ, 78
Հետևեք NEWS.am SPORT-ին Facebook-ում, Twitter և Telegram-ում