20:42  ,  19 մարտի, 2018

Հայաստանի ուժեղագույն հեծանվորդը տեղափոխվել է ԱՄՆ

Հայաստանի առաջատար հեծանվորդ Էդգար Ստեփանյանը պայմանագիր է կնքել ԱՄՆ–ի Velo Pasadena Racing team ակումբի հետ: Մարզիկը տեղափոխվել է Միացյալ Նահագներ, բայց շարունակելու է պայքարը Տոկիո-2020–ի Օլիմպիական խաղերի ուղեգրի համար Հայաստանի հավաքականի կազմում:

Այս մասին NEWS.am Sport-ի թղթակցի հետ զրույցում Լոս Անջելեսից ասաց Էդգար Ստեփանյանը:

«Հրավերը ստացել եմ Velo Pasadena ընկերության կողմից, որն ունի նաեւ հեծանվասպորտի ակումբ: Ակումբի թիմը այստեղ ԱՄՆ-ում մասնակցում է առաջին եւ երկրորդ կարգի մրցումների, որոնք ամենաբարձրն են համարվում ակումբային մրցաշարերում: Ինձ համար սա մեծ հնարավորություն է, քանի որ յուրաքանչյուր շաբաթ մրցումներ կան, մեկնարկների եմ դուրս գալու: Մեծ փորձ ձեռք բերելու հնարավորություն է, անդադար մրցումներ են: Այսպիսի նպատակ էլ ունեի, որ որեւէ արտասահմանյան ակումբում հանդես գամ:

Դեռեւս միայն 6 ամիս կարող եմ այստեղ գտնվել: Ինձ ԱՄն տեղափոխվելու հարցում շատ օգնեց հեծանվային սպորտի ֆեդերացիան: Ես ակումբում համատեղ կնախապատրաստվեմ նաեւ Եվրոպայի, աշխարհի առաջնություններին, աշխարհի գավաթի խաղարկություններին: Բոլոր պայմաններն այստեղ ինձ համար ստեղծված են՝ ակումբն արդեն ինձ տրամադրել է մարզահագուստ, մարզագույք, բնակարան: Պետք է միայն կենտրոնանամ իմ մարզումների եւ մեկնարկների վրա: Այստեղ ես մենակ եմ, անձնական մարզիչս՝ Արմեն Գյոզալյանը, Հայաստանում է: Մարզվելու եմ շաբաթը 6 օր, որոնցից 2-ը մրցումների օրեր են լինելու:

Velo Pasadena ընկերության սեփականատերը Հրաչ Գեւրիկյանն է: Հրավերը եղել է նրա կողմից»,- ասաց Էդգար Ստեփանյանը:

Ամերիկյան ակումբում Հայաստանի առաջատար հեծանվորդը մարզումները կսկսի մարտի 20-ից:

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում


  • Այս թեմայով