Էլինա Դանիելյան. Բոլորն էլ ֆավորիտ են

Լիլիթ Մկրտչյանի հետ դժվարանում եմ խաղալ, մենք միշտ մեր պարտիաներն ավարտում ենք ոչ ոքի արդյունքով:

Այդ մասին NEWS.am Sport-ի թղթակցի հետ զրույցում ասաց այսօր` հուլիսի 17-ին Ջերմուկում մեկնարկած ՖԻԴԵ Գրան պրի մրցաշարում Հայաստանի ներկայացուցիչ, միջազգային գրոստմայստեր, Հայաստանի ուժեղագույն շախմատիստուհի Էլինա Դանիելյանը:

Առաջին տուրում Դանիելյանը խաղում է հենց Լիլիթ Մկրտչյանի հետ։

Այս մրցաշարով Էլինա Դանիելյանը կավարտի ելույթը Գրան պրիի այս շրջափուլում, քանի որ սա նրա չորրորդ մասնակցությունն է:

«Ջերմուկում անցկացվող կանանց Գրան պրին վերջինն է ինձ համար այս ցիկլում: Կարծում եմ, որ կկարողանամ լավ խաղալ Ջերմուկում: Նախորդ` Կազանի Գրան պրիում ես հավաքեցի վեց միավոր` չորս հաղթանակ եւ երկու ոչ ոքի: Վերջին պարտիաներում առաջատարի դիրքս զիջեցի, քանի որ արդեն բավական հոգնած էի: Կարծում եմ` հոգնածությունն ինձ խանգարեց: Կազանի Գրան պրին երկար մրցում  էր` ընդամենը երկու հանգստյան օրով: Բայց դա ոչինչ չի նշանակում»,- Ջերմուկի մրցաշարի մեկնարկից առաջ ասաց Էլինա Դանիելյանը:

Էլինա Դանիելյանն իր մարզավիճակի մասին նախընտրում է խոսել մրցումի ավարտից հետո: Ասում է`միայն արդյունքները կարող են ցույց տալ, թե ինքն ինչ մարզավիճակում է:

«Բոլորն էլ ուժեղ են, բոլորն էլ ֆավորիտ են: Դժվար է նախապես կանխատեսումներ անել: Ինչպես խաղը կստացվի, ում կողմից հաջողությունը կլինի, նա էլ կհաղթի: Այս մասին վստահ եմ ասում, քանի որ իսկապես բոլոր 12 մասնակիցներն էլ ուժեղ են: Ես այստեղ թույլ կամ թերի խաղացող չեմ տեսնում: Իսկ դա նշանակում է` սպասվում են բավական բարդ խաղեր բոլորիս համար: Ընդհանրապես շատ ուժեղ մրցում է: Այն, որ խաղալու է աշխարհի չեմպիոն Հոու Յիֆանը, չեմպիոնի հավակնորդ Համպի Կոներուն դրանով արդեն բարդ է»,- նշեց Էլինա Դանիելյանը:

Հիշեցնենք, որ այս պարտիայում հայ շախմատիստուհիները` Էլինա Դանիելյանը եւ Լիլիթ Մկրտչյանը  կխաղան միմյանց հետ:
Թե ինչ խաղ է սպասվում երկու հայ շախմատիստուհիների միջեւ, Էլինա Դանիելյանը չի ցանկանում կանխատեսումներ անել:

«Իրականում մենք չենք կարողանում իրար հետ խաղալ: Դժվար է Լիլիթի հետ խաղալը: Տեսնենք, թե ինչ կստացվի: Երկար տարիներ է իրար հետ ենք հանդես գալիս մրցաշարերում, հավաքականի անդամներ ենք, իրար կողք ենք նստում, այս ամենը մեզ խանգարում է փորձել մեր ուժերը միմյանց դեմ: Բայց սա մեր առաջին հանդիպումը չէ: Որոշ մրցաշարերում խաղացել ենք ես եւ Լիլիթը եւ մշտապես խաղն ավարտել ոչ ոքի արդյունքով: Հուսամ, այս պարտիան էլ կավարտենք ոչ ոքի արդյունքով: Սա ոչ թե մեր կամքով է, այլ իսկապես մեր ուժերը հավասար են: Եվ ես դժվարանում են Լիլիթի հետ խաղում առավելությամբ ավարտել պարտիան»,- նկատեց Էլինա Դանիելյանը:

Առաջին տուրում խաղում են.

Համպի Կոներու (Հնդկաստան) – Ժաո Սյուե (Չինաստան)

Լուֆեյ Ռուան (Չինաստան) – Կատերինա Լահնո (Ուկրաինա)

Հոու Յիֆան (Չինաստան) – Մունգունտուուլ Բատհույագ (Մոնղոլիա)

Էլինա Դանիելյան (Հայաստան) – Լիլիթ Մկրտչյան (Հայաստան)

Նինո Խուրցիձե (Վրաստան) - Յու Վենյուն (Չինաստան)

Եկատերինա Կովալեւսկայա (Ռուսաստան) – Նադեժդա Կոսինցեւա (Ռուսաստան)

Հետևեք NEWS.am SPORT-ին Facebook-ում, Twitter և Telegram-ում