Եվրոպական խաղեր. Դավիթ Սաֆարյանը հաղթեց եւ պարտվեց, Գարիկ Բարսեղյանը քառորդ եզրափակիչում է եւ կհանդիպի ադրբեջանցու

Բաքվում անցկացվող Եվրոպական մարզական խաղերում հունիսի 17-ին մեկնարկեց ազատ ոճի ըմբշամարտի մրցաշարը, որի առաջին օրը պայքարի մեջ են մտել Հայաստանի 3 ներկայացուցիչներ՝ Գարիկ Բարսեղյանը (57կգ), Դավիթ Սաֆարյանը (65կգ) եւ Գրիգոր Գրիգորյանը (74կգ):

2013թ. աշխարհի չեմպիոն Դավիթ Սաֆարյանը մեկնարկային գոտեմարտում դժվարությամբ հաղթեց մակեդոնացի Դեյան Միտրովին եւ դուրս եկավ 1/8 եզրափակիչ, որտեղ 6:8 հաշվով պարտվեց բուլղարացի Բորիսլավ Նովաչկովին: Եթե բուլղարացին հասնի եզրափակիչ, հայ ըմբիշը հնարավորություն կստանա պայքարել բրոնզե մեդալի համար:

Գարիկ Բարսեղյանը 1/8 եզրափակիչից պայքարը սկսեց բուլղարացի Վլադիմիր Դուբովի դեմ գոտեմարտով, որում հաղթեց 4:0 հաշվով: Քառորդ եզրափակիչում Բարսեղյանը կհանդիպի ադրբեջանցի Յաշար Ալիեւին: 

Գրիգոր Գրիգորյանը կմեկնարկի 1/8 եզրափակիչից՝ հանդիպելով բուլղարացի Կիրիլ Տերզիեւին:

Ազատ ոճի ըմբշամարտի Հայաստանի թիմի կազմում Բաքու են մեկնել նաեւ Վոլոդյա Ֆրանգուլյանը (61կգ), Մուսա Մուրթազալիեւը (86կգ) եւ Լեւան Բերիանիձեն (125կգ), որոնք պայքարի մեջ կմտնենք հունիսի 18-ին:

Հետևեք NEWS.am SPORT-ին Facebook-ում, Twitter և Telegram-ում