2013 թվականին հրավեր եմ ստացել Հայաստանի պատանեկան հավաքականից, որին միացել եմ եւ անցկացրել եմ ուսումնամարզական հավաք: Սակայն ինձ հաջողվեց մարզվել միայն հինգ օր, քանի որ առողջական խնդիրներ ունեի, բժիշկներն ինձ արգելեցին մարզվել:
Այդ մասին NEWS.am Sport-ի թղթակցի հետ զրույցում ասաց Գերմանիայի «Վիկտորիա Քյոլնի» պատանեկան թիմի պաշտպան Հարություն Գարինյանը, ով ծնվել եւ մեծացել է Գերմանիայում:
Հարություն, պատմիր քո մասին. որտեղի՞ց է ընտանիքդ, ինչպե՞ս եք հայտնվել Գերմանիայում:
Ծնողներս արմատներով Արեւմտյան Հայաստանից են: 1980-ին Ստամբուլից տեղափոխվել են Գերմանիա: Ես ծնվել եւ մեծացել եմ Գերմանիայի Քյոլն քաղաքում:
Եղե՞լ ես Հայաստանում:
Այո, արդեն հինգ անգամ ծնողներիս հետ եղել եմ եմ Հայաստանում:
Չնայած, որ հինգ անգամ եղել ես հայրենիքումդ, այնուամենայնիվ, հայերեն չես խոսում: Ե՞րբ ես պատրաստվում սովորել մայրենին:
Ցանկությունս շատ մեծ է, սակայն Քյոլնում հայկական դպրոց չկա: Հայերեն մի փոքր շփվում եմ հայրիկիս հետ: Հույս ունեմ՝ մոտ ապագայում լիարժեք կտիրապետեմ մայրենի լեզվիս:
Ե՞րբ եւ ինչո՞ւ սկսեցիր ֆուտբոլով զբաղվել:
Ֆուտբոլի հանդեպ սերը ինձ փոխանցվել է հորիցս. նա նույնպես ֆուտբոլիստ է եղել: Մարզվել սկսել եմ վեց տարեկանից:
Քեզ համար ավելի հարմար է խաղալ կիսապշտպանությա՞ն, թե՞ պաշտպանության գծում:
Ինձ ավելի շատ հարմար է խաղալ աջ պաշտպանի դիրքում, սակայն կարող եմ խաղալ նաեւ կիսապաշտպանության գծում:
«Վիկտորիա Քյոլնի» հետ քանի՞ տարվա պայմանագիր ես կնքել:
Առայժմ՝ երեք:
Գերմանիայի կամ Հայաստանի պատանեկան հավաքականում խաղալու հրավեր երբեւէ ստացե՞լ ես :
2013 թվականին հրավեր եմ ստացել Հայաստանի պատանեկան թիմում հանդես գալու համար: Հավաքականին միացել եմ եւ անցկացրել եմ ուսումնամարզական հավաք: Սակայն ինձ հաջողվեց մարզվել միայն հինգ օր, քանի որ առողջական խնդիրներ ունեի, բժիշկներն ինձ արգելեցին մարզվել:
Ե՞րբ քեզ կրկին սպասենք Հայաստանում:
Ես միշտ պատրաստ եմ իմ ազգային հավաքականին օգտակար լինել, երբ հրավեր ստանամ, անպայման կգամ Հայաստան:
Հետեւո՞ւմ ես Հայաստանի ազգային հավաքականի մրցելույթներին:
Այո, անպայման:
Հայ ֆուտբոլիստներից ու՞մ ես ճանաչում:
Գրեթե բոլորին:
Հունիսի 6-ին Հայաստանի հավաքականը ընկերական հանդիպում կանցկացնի Գերմանիայի ազգային ընտրանու հետ: Ներկա կլինե՞ս խաղին:
Բնականաբար:
Ո՞րն է քո երազանքը:
Երազանքս է խաղալ եվրոպական ուժեղագույն ակումբներից մեկում, ինչպես նաեւ՝ Հայաստանի ազգային հավաքականում:
Ո՞ր ակումբին ես երկրպագում:
Մադրիդի «Ռեալին»:
Սիրածդ ֆուտբոլի՞ստը:
Չէի ցանկանա որեւէ մեկին առանձնացնել: Ինձ ավելի շատ դուր են գալիս Հայաստանի ազգային հավաքականի առաջատարները:
Կա՞ այնպիսի ֆուտբոլիստ, ում կցանկանայիր նմանվել:
Ես ավելի շատ կուզենայի իմ ուրույն խոսքը ասել ֆուտբոլում՝ դառնալ այնպիսի խաղացող, որ ուրիշները ցանկանան նմանվել ինձ: Խնդրում եմ ասածս մեծամտություն չհամարել (ժպտում է):
Մի քանի օրից մեկնարկում է աշխարհի առաջնությունը: Ըստ քեզ, ո՞ր երկրի հավաքականը կդառնա աշխարհի չեմպիոն:
Կարծում եմ՝ Բրազիլիան:
Շուշանիկ Հակոբյան (Մոսկվա)
Հետևեք NEWS.am SPORT-ին Facebook-ում, Twitter և Telegram-ում