Ցյուրիխ. Լեւոն Արոնյանը հաղթեց Հիկարու Նակամուրային

Ցյուրիխում անցկացվող շախմատային սուպերմրցաշարի նախավերջին՝ չորրորդ տուրում Հայաստանի հավաքականի առաջին համար Լեւոն Արոնյանը սպիտակներով առավելության հասավ Հիկարու Նակամուրայի նկատմամբ: ԱՄՆ-ի ներկայացուցիչն իր պարտությունն ընդունեց 45-րդ քայլում:

Լեւոն Արոնյանը 6 միավորով ընթացիկ առաջատարն է: 5 միավոր ունեցող Մագնուս Կարլսենը սպիտակներով մրցում է իտալացի Ֆաբիանո Կարուանայի հետ, իսկ իսրայելցի Բորիս Գելֆանդն ուժերը չափում է հնդիկ Վիշվանաթան Անանդի հետ:

Ավելի վաղ հաղորդվում էր, որ չորրորդ տուրին ներկա կլինի նաեւ Շվեյցարիայում Հայաստանի դեսպան Շառլ Ազնավուրը: Ցյուրիխի մրցաշարի դասական պարտիաներում հաղթանակի համար տրվում է 2 միավոր, իսկ ոչ ոքիի դեպքում՝ 1։

Վերջին տուրում Արոնյանը սեւերով կխաղա Կարուանայի դեմ:

Հետևեք NEWS.am SPORT-ին Facebook-ում, Twitter և Telegram-ում