Ռուբեն Հայրապետյան. Միշել Տեր-Զաքարյանը մերժեց Հայաստանի հավաքականին, իսկ Սերխիո Մարգարյանի մասին չեմ խոսի

Շատ եմ ափսոսում, որ Վարդան Մինասյանը հեռացավ: Վարդանը շատ անելիքներ ունի հայկական ֆուտբոլում, բայց ինձ չհաջողվեց պահել նրան: Նոր մարզիչի հարցում մենք վարում ենք բանակցություններ: Անուններ չեմ հրապարակի:

Այդ մասին այս պահին ընթացող մամուլի ասուլիսում հայտարարեց ՀՖՖ նախագահ Ռուբեն Հայրապետյանը, փոխանցում է NEWS.am Sport-ի թղթակիցը:

«Վերջերս ուշ-ուշ եմ հանդիպում լրագրողների հետ: Դա լավ չէ, բայց այսօրվա լրատվամիջոցները չեն ծառայում իրենց նպատակին, այլ աղավաղում են իրականությունը: Հաճախ աղավաղվում են իմ խոսքերը: Մի անգամ թմրամոլների մասին իմ խոսքերն աղավաղել էին ու ֆիլմ էին սարքել՝ իմ ասուլսիից վերցնելով միայն մեկ բառ, որ ես ծեծում եմ մարդկանց:

Շատ եմ ափսոսում, որ Վարդան Մինասյանը հեռացավ: Կցանկանայի շարունակել աշխատանքը նրա հետ: Ես շատ լավ գիտեմ նրա բոլոր հնարավարությունները: Վարդանը շատ անելիքներ ունի հայկական ֆուտբոլում, բայց ինձ չհաջողվեց պահել նրան: Նա երկու անգամ մերժեց հավաքականում մնալու իմ առաջարկը: Վարդանն ունի միջազգային կարգի մարզիչի որակներ: Նոր մարզիչի հարցում մենք վարում ենք բանակցություններ: Անուններ չեմ հրապարակի:

Հիշեք, թե որտեղ էինք մենք ՖԻՖԱ-ի դասակարգման աղյուսակում մինչեւ Վարդանի գալը եւ որտեղ ենք հիմա: Վարդան Մինասյանը նախկինում եւս հրաժարական տվեց, բայց ես կարողացա համոզել նրան: Այս անգամ եւս կարծում էր, որ կկարողանամ մտափոխել նրան: Նա պատրաստ է ցանկացած պահի ծառայել հայկական ֆուտբոլին, բայց այժմ չի ցանկանում լինել հավաքականի մարզիչի դերում: Կարծում եմ, որ Մինասյանը պետք է մնար:

Ինչ վերաբերում է Վարդանի խոսքերին, թե հրավիրելու ենք իսպանացի կամ իտալացի մասնագետի, ասեմ, որ դուք սխալ եք հասկացել նրան: Նա մեզ է այդպիսի խորհուրդ տվել, քանի որ իսպանացի եւ իտալացի մասնագետները մեզ ավելի մոտ են իրենց մտածելակերպով: Բայց ես չեմ բացառում, որ նոր մարզիչը լինի արգենտինացի կամ գերմանացի: Խնդրում եմ չկառչեք գերմանացիներից եւ ասեք, թե դա կապված է իմ մականունի հետ:

Սկզբում ես բանակցում էի Միշել Տեր-Զաքարյանի հետ: Շատ էի ցանկանում, որ Միշելը մարզի մեր հավաքականը, սակայն նա մերժեց մեզ: Ես նրան չորս տարի առաջ էլ էի հրավիրել, բայց շատ կցանկանամ, որ մի օր նա միանա մեզ: Նա հայ է, ունի հայի մտածելակերպ, բայց այս պահին չի կարող մարզել հավաքականը:

Սերխիո Մարգարյանի մասին չեմ ցանկանա խոսել, քանի որ նա անձամբ գրավոր դիմել է, որ այլեւս չանդարառնանք իր չգալուն: Ես կցանկանայի խոսել, բայց ունենք նրա հետ պայմանավորվածություն, որ չխոսվի այդ մասին»,- ասաց Հայրապետյանը:

Վերա Մարտիրոսյան

Ֆոտո՝ Արսեն Սարգսյան

Հետևեք NEWS.am SPORT-ին Facebook-ում, Twitter և Telegram-ում