Մարադոնան ներքաշվել է սկանդալի մեջ ընկերուհու պատճառով

Դուբայի «Ալ Վասլի» գլխավոր մարզիչ Դիեգո Մարադոնան դարձյալ հայտնվել է սկանդալի մեջ: Արաբական Միացյալ Էմիրությունների առաջնությունում, մրցակցի խաղադաշտում «Ալ Շաբաբից» 0:2 հաշվով պարտվելուց հետո Մարադոնան վիճաբանության մեջ է մտել տրիբունայի VIP-հատվածի ֆուտբոլասերների հետ, որոնք անպատվել են իր ընկերուհուն` Վերոնիկա Օխեդային եւ «Ալ Վասլի» խաղացող Խուան Իգնասիո Մերսիերի ընկերուհուն:

Վրդովված Մարադոնան բարձրացել է տրիբունա եւ վիճաբանության մեջ է մտել արաբ ֆուտբոլասերների հետ: Անվտանգության ծառայության աշխատակիցների միջամտությունից հետո Մարադոնան հեռացել է տրիբունայից, սակայն շարունակել է բղավել տրիբունաների ուղղությամբ:

Խաղից հետո կայացած մամուլի ասուլիսում Մարադոնան իր ընկերուհուն անպատված «Ալ Շաբաբի» երկրպագուներին անվանել է «վախկոտներ», հաղորդում է sport360.com-ը:

Հետևեք NEWS.am SPORT-ին Facebook-ում, Twitter և Telegram-ում