Դուբայի «Ալ Վասլ» ակումբի գլխավոր մարզիչ Դիեգո Մարադոնան պատրաստվում է վերադառնալ Նեապոլ քաղաք եւ վերջ դնել իր եւ իտալական իշխանությունների միջեւ եղած կոնֆլիկտին, գրում է Goal.com-ը:
Մարադոնան մեղադրվում է 1984-1991 թվականների ընթացքում 38 միլիոն եվրո հարկ չվճարելու մեջ: Հիշեցնենք, որ այդ տարիներին լեգենդար արգենտինացին հանդես է եկել «Նապոլի» ակումբում:
Երկար ժամանակ Դիեգոն խուսափում էր մեկնել Իտալիա, սակայն հիմա պատրաստվում է վերադառնալ Նեապոլ եւ վերականգնել իր բարի համբավը:
Հաղորդվում է, որ Մարադոնան նման որոշում է ընդունել «Նապոլիի»՝ Իտալիայի գավաթի խաղարկության եզրափակիչ դուրս գալուց հետո: Արգենտինացին ցանկանում է ներկա լինել եզրափակիչ հանդիպմանը եւ աջակցել իր նախկին ակումբին:
Մարադոնայի օգնությամբ «Նապոլին» երկու անգամ հռչակվել է Իտալիայի չեմպիոն, գավաթակիր եւ ՈւԵՖԱ-ի գավաթի հաղթող:
Հետևեք NEWS.am SPORT-ին Facebook-ում, Twitter և Telegram-ում