Կյանքում առաջին անգամ հնարավորություն է տրվում խաղալ միջազգային մակարդակով: Ես պետք է ապացուցեմ եւ մոտենամ Հայաստանի հավաքականին: Տարբերություն չկա, թե ում դեմ եմ խաղալու: Պետք է դուրս գամ խաղադաշտ եւ խաղամ իմ ֆուտբոլը:
Այդ մասին հայտարարել է «Ուֆայի» հարձակվող Միխայիլ Մարկոսովը, ով հրավիրվել է ֆուտբոլի Հայաստանի ազգային հավաքական՝ մասնակցելու փետրվարի 5-ին Ֆրանսիայի Վալանս քաղաքում կայանալիք Լյուքսեմբուրգի թիմի հետ խաղին: 27-ամյա հարձակվողը պատասխանել է «Ուֆայի» երկրպագուների հարցերին՝ խոսելով նաեւ Հայաստանի հավաքականի մասին:
Միխայիլ, ինչպե՞ս ես շփվելու Հայաստանի հավաքականի ֆուտբոլիստների հետ: Արդեն սովորու՞մ ես հայերեն:
Ոչ, չեմ սովորում: Կարծում եմ՝ այնտեղ շփվում են ռուսերենով եւ ինձ կհասկանան:
Ինչու՞ ես այդպես կարծում:
Որովհետեւ Հայաստանում գրեթե բոլորը հասկանում եւ խոսում են ռուսերեն կարող են շփվել:
Բայց այնտեղ կան ֆուտբոլիստներ ԱՄՆ-ից, Հոլանդիայից: Նրանք միեւնույն է բոլորը ռուսերե՞ն են խոսում:
Դա արդեն չգիտեմ, այնտեղ պարզ կլինի:
Չե՞ս անհանգստանում, որ կարող ես Դիեգոյի ու Վիլումի պես լեգեոնական դառնալ «Ուֆա» ակումբում:
Իսկ ինչու պետք է անհանգստանամ: Կյանքում առաջին անգամ հնարավորություն է տրվում խաղալ միջազգային մակարդակով: Չեմ կարծում, որ պետք է անհանգստանամ: Ես պետք է ապացուցեմ եւ մոտենամ թիմին:
Ինչու՞ չես մասնակցել «Ուֆայի» նախորդ 3 ընկերական հանդիպումներին: Դա նույնիսկ անհանգստացրել է հայկական լրատվամիջոցներին:
Կարելի է շնորհակալություն հայտնել ակումբի ղեկավարությանն ու մարզչական շտաբին: Նրանք հանգստանալու հնարավորություն են տվել ինձ հավաքականին միանալուց առաջ: Անցկացվում էին մեծ ծանրաբեռնվածությամբ մարզումներ, որոնք դժվար էին իմ եւ տղաների համար:
Ըստ քեզ՝ սա քո կարիերայի ամենավառ փու՞լն է:
Կարծում եմ՝ ամենավառը դեռ առջեւում է:
Իսկ ինչ-որ բան գիտես Լյուքսեմբուրգի ազգային հավաքականի մասին:
Ես պետք է դուրս գամ խաղադաշտ եւ խաղամ իմ ֆուտբոլը: Տարբերություն չկա, թե ում դեմ եմ խաղալու:
Իսկ լինու՞մ է, որ մրցակիցների մասին տեղեկանաս համացանցի միջոցով:
Ոչ, չի լինում:
Հետևեք NEWS.am SPORT-ին Facebook-ում, Twitter և Telegram-ում