Մանուել Տուլիպա․ Հիացած եմ ամբողջ թիմի խաղից

Հիացած եմ ամբողջ թիմի խաղից: Մեզ համար շատ կարեւոր հաղթանակ էր: «Ռիգան» բարձրակարգ թիմ է: Հանդերձարանում ֆուտբոլիստներիս ասացի՝ լավ խաղ էր, լավ արդյունք էր, բայց չմոռանաք, որ առջեւում պատասխան խաղն է:

Այսպես Լատվիայի չեմպիոն «Ռիգայի» նկատմամբ տարած հաղթանակը մեկնաբանեց «Արարատ-Արմենիայի» գլխավոր մարզիչ, պորտուգալացի մասնագետ Մանուել Տուլիպան:

Ֆուտբոլի Հայաստանի չեմպիոն «Արարատ-Արմենիան» Չեմպիոնների լիգայի որակավորման առաջին փուլի տնային խաղում «Ռիգային» պարտության մատնեց 2։0 հաշվով։

«Առաջին խաղակեսում լավ խաղացինք: Կարեւորն այն է, որ գնդակով լավ էինք դուրս գալիս վտանգավոր իրավիճակներից, սեփական տուգանային հրապարակից: Մեզ համար ամենադժվարն այն էր, որ չէինք կարողանում երկար փոխանցումները տեղ հասցնել մեր հարձակվողներին, քանի որ նրանց ֆուտբոլիստները գերազանցում էին մենապայքարներում:

«Ռիգայի» նման որակյալ թիմի դեմ խաղացինք որպես թիմ եւ դա ամենադրականն էր:

Երկրորդ խաղակեսի մեկնարկը վատ էր, հորդառատ անձրեւ էր: Լավ էր, որ անձրեւը չխանգարեց, որ երկրորդ խաղակեսի առաջին 10 րոպեում գտնենք մեր լավագույն խաղը:

Իմ թիմն ունի խաղային ինքնություն, բոլորը շատ հեշտ են հարմարվում ցանկացած պահի բոլոր հնարավոր զարգացումներին:

Ինձ դուր է գալիս, որ թիմը վստահ է գործում: Շատ կարեւոր հաղթանակ էր մեզ համար, քանի որ Լատվիայի չեմպիոն «Ռիգան» բարձրակարգ թիմ է եւ այդպիսի թիմին հաղթելը շատ կարեւոր էր մեզ համար:

Առաջին գոլի հեղինակ Օլիվեյրային շատ վաղուց գիտեի եւ շատ լավ էի ճանաչում նրան: Չեմ ցանկանում կենտրոնանալ անհատների վրա: Հիացած եմ ամբողջ թիմի խաղից:

Վստահեցնում եմ, որ այս հաշիվն ու ելքը չի կարող մեզ հանգստացնել հաջորդ խաղի համար: Հանդերձարանում ֆուտբոլիստներին ասացի՝ շատ լավ խաղ էր, լավ արդյունք էր, բայց չենք մոռանում պատասխան խաղի մասին, որը տեղի է ունենալու Ռիգայում: Իսկ Ռիգայում մեզ համար շատ դժվար է լինելու խաղալ եւ մեզ իսկապես դժվար հանդիպում է սպասվում: Ես հետեւել եմ «Ռիգայի» մրցելույթներին Լատվիայի առաջնությունում: «Ռիգան» շատ բարդ մրցակից է եւ մեզ համար դժվար է լինելու խաղալ նրանց խաղադաշտում: Այնպես որ՝ 2:0-ն լավ արդյունք է, բայց ամեն ինչ պարզ կլինի պատասխան խաղից հետո:

Մեծ պատիիվ է «Արարատ-Արմենիան» ներկայացնել Չեմպիոնների լիգայում, քանի որ մենք նաեւ ներկայացնում ենք երկիրը: Հպարտությամբ եմ կրում այս պատասխանատվությունը, քանի որ «Արարատ-Արմենիան» շատ հայկական թիմ է, ամենաշատ ներկայացուցիչներն ունի Հայաստանի հավաքականից, ինչը շատ կարեւոր է: Ես շատ եմ սիրում այս երկիրը եւ իմ ընտանիքի հետ սիրով հաստատվել եմ այս երկրում»,- ասաց Մանուել Տուլիպան:

«Ռիգա» - «Արարատ-Արմենիա» պատասխան հանդիպումը տեղի կունենա հուլիսի 14-ին եւ կմեկնարկի Երեւանի ժամանակով 21:00-ին։

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում