Եղիշե Մելիքյան. Չեմ հուսահատվի, եթե այս տարի մեզ մոտ ոչինչ չստացվի

Վաղվա խաղում արդյունքը կարեւոր է, բայց առաջնահերթություն չի ինձ համար: Չեմ հուսահատվի, եթե այս տարի մեզ մոտ ոչինչ չստացվի: Համբերություն, եւ վաղ թե ուշ այս թիմը լավ թիմ կլինի, որը կգնա հստակ արդյունքների: Համբերություն կունենաք, ես կտանեմ, եթե չէ, մեկ այլ մարզիչ կգա եւ կտանի թիմին:

Այս մասին լրագրողների հետ հանդիպմանն ասաց ֆուտբոլի Հայաստանի հավաքականի գլխավոր մարզիչ Եղիշե Մելիքյանը:

Հունիսի 6-ին Հայաստանի հավաքականը Վազգեն Սարգսյանի անվան «Հանրապետական» ստադիոնում կընդունի Ղազախստանին:

«Ունենք ուղղություն, թե ինչ ենք ուզում ստանալ այս երկու ընկերական խաղերում: Ունենք մեծ փոփոխություններ, վնասվածքների պատճառով՝ կորուստներ: Առիթ ունենք վերլուծելու: Աշնան պաշտոնական խաղերից առաջ պետք է աշխատենք մեր սխալների վրա եւ փորձենք ստանալ արդյունք: Կարեւորը՝ ճիշտ ուղու վրա ենք: Այս երկու խաղերում պետք է ամեն ինչ անենք, որ այդ արդյունքը ստանանք: Աստված տա ունենանք հաղթանակ, եթե ոչ՝ տեսնենք, վերլուծենք մեր խնդիրները:

Առաջին խնդիրն այն է, որ Ղազախստանում դեռ շարունակվում է առաջնությունը եւ մրցակից թիմի ֆուտբոլիստներն ավելի լավ մարզավիճակում են լինելու այս խաղում: Մեր տղաները հանգստից են եկել եւ միացել հավաքին:

Մի քանի ֆուտբոլիստ չի միացել թիմին վնասվածքների պատճառով, ինչը կորուստ է մեզ համար: Ունենք խնդիրներ, բայց այս օրերին լավ աշխատանք ենք տարել: Այժմ առիթ է՝ տեսնել, թե ինչ արդյունք տվել մեր աշխատանք:

Վաղվա եւ հաջորդ խաղում ինձ համար եւ թիմի համար արդյունքը կարեւոր է, բայց առաջնահերթ չէ: Անկախ արդյունքից, ուզում եմ տեսնել, թե ինչ կունենանք աշնանը: Ուզում եմ, որ արդյունքը չխանգարի, այլ հող նախապատրաստի աշնան խաղերի համար:

Ղազախստանի թիմն այս տարի այլ է, ավելի ուժեղ է նախորդ տարիների համեմատ: Մեզ պետք է համապատասխան թիմ, ինչպիսին կունենանք աշնանը: Ընտրել ենք ոչ շատ ուժեղ, ոչ միջին, ոչ թույլ թիմեր: Ինձ պետք էին թիմեր, որոնք մեզ համար խնդիրներ կստեղծեն խաղադաշտում, մենք հնարավորություն կունենանք տեսնել այդ խնդիրները եւ գտնել դրանք լուծումները:

Բանդիկյանի ոճը պաշտպանողական է, այլ ոչ հարձակողական: Նրան տեսնում եմ պաշտպանությունում: 

Էդգար Սեւիկյանի հրավերի քննարկումներ են եղել: Որքան ես աշխատում եմ հավաքականում, տեսնում եմ խնդիրներ, որոնցից մեկը որակի պակասն է: Սեւիկյանը որակ ունի եւ մի քանի տարի կօգնի հավաքականին: Այսօր նրա մարզավիճակը լավ չի: Նա ունի մեծ պոտենցիալ եւ ապագայում նա շատ կօգնի հավաքականին:

Հավաքական ենք հրավիրել լավագույններից լավագույններին եւ փորձելու ենք բոլորին փորձակել տարբեր դիրքերում: Նորեկների մասով դեռ կտրուկ քայլեր եւ որոշումներ չեմ անի: Ժամանակի ընթացքում կհասկանանք՝ ով, ինչքանով կկարողանա հավաքականին օգնել: Խոսքը Հայաստանի առաջնությունում հանդես եկող խաղացողների մասին է, իսկ Հայաստանի հավաքականն այն ցուցանիշը չի, որը կարող ենք հիմք վերցնել եւ մեկնարկային կազմ մտցնել ֆուտբոլիստներին:

«Ալաշկերտի» գլխավոր մարզիչ Վահե Գեւորգյանի հետ որեւէ խնդիր չի եղել, ես նրա եւ թիմի մասին երբեք ոչինչ չեմ ասել: Ինչ Վահե Գեւորգյանն է խոսել, իր կարծիքն է: Ես չեմ իջնի. ես ճանապարհ անցած մարդ եմ, գիտեմ՝ որտեղ եմ գտնվում եւ չեմ գնա այլ դաշտ:

Վերցրել եմ այս պրոբլեմներով թիմը եւ աշխատում եմ խնդիրների վրա:  Չեմ կարող խոսք տալ, որ ամեն ինչ լավ կլինի: Ես կախարդական փայտիկ չունեմ, որ միանգամից խնդիրները լուծեմ: Ես չեմ ուզում բարձր խոստումներ անել, երիտասարդ թիմ ենք: Սերնդափոխություն է կատարվել, եւ չհաշված այս խնդիրներին եւ սերնդափոխությանը, մեր խնդիրները ժամանակ են ուզում:

Չեմ հուսահատվի, եթե այս տարի մեզ մոտ ոչինչ չստացվի: Համբերություն եւ վաղ թե ուշ այս թիմը լավ թիմ կլինի, որը կգնա հստակ արդյունքների: Համբերություն կունենաք, ես կտանեմ, եթե չէ, մեկ այլ մարզիչ կգա եւ կտանի թիմին»,- ասաց Եղիշե Մելիքյանը:

Հայաստան - Ղազախստան հանդիպումը տեղի կունենա հունիսի 6-ին Երեւանի Վազգեն Սարգսյանի անվան «Հանրապետական» ստադիոնում եւ կմեկնարկի Երեւանի ժամանակով 18:00-ին:

Հետևեք NEWS.am SPORT-ին Facebook-ում, Twitter և Telegram-ում