IIHF պատվավոր նախագահ Ռենե Ֆազել. Տափօղակով հոկեյը մեծ ապագա ունի Հայաստանում

Տափօղակով հոկեյը մեծ ապագա ունի Հայաստանում: Ունեք բավականին լավ թիմ եւ կարող եք ավելի մեծ արդյունքների հասնել: Այդ հարցում Հայաստանի հավաքականին կարող է օգնել սփյուռքը:

Այս մասին լրագորղների հետ հանդիպմանն ասել է Տափօղակով հոկեյի միջազգային ֆեդերացիայի (IIHF) պատվավոր նախագահ Ռենե Ֆազելը, որն այս օրերին Երեւանում է: Ռենե Ֆազելը նախօրեին հետեւել է Երեւանում անցկացվող տափօղակով հոկեյի աշխարհի չորրորդ դիվիզիոնի առաջնության Հայաստան - Իրան հանդիպմանը, որտեղ ազգային հավաքականը 8:0 հաշվով հաղթանակ տարավ:

«Տափօղակով հոկեյը մեծ ապագա ունի Հայաստանում: Ունեք բավականին լավ թիմ եւ կարող եք ավելի մեծ արդյունքների հասնել: Այդ հարցում Հայաստանի հավաքականին կարող է օգնել սփյուռքը: Երբ իմ հայ գործընկերոջ հետ ծանոթացա, այդ ժամանակ մարզաձեւի առաջին քայլերն էին այստեղ: Հասկանալի էր, որ Հայաստանի համար շատ դժվար էր, քանի որ կար միայն մեկ սահադաշտ: Հիշում եմ, երբ 2006 թ. Հայաստանը 32:1 հաշվով հաղթեց Իռլանդիային: Այդ ժամանակ սփյուռքից շատ էին խաղացողները, որի շնորհիվ Հայաստանի հավաքականը շատ ուժեղ էր:

15 տարվա դադարից հետո նորից խաղում եք աշխարհի առաջնությունում: Սա նշանակում է, որ վերջին երկու տարիներին մարզաձեւը զարգանում է, առաջխաղացում կա:

Պետք է ներգրավել հոկեյիստների Հյուսիսային Ամերիկայից եւ Ռուսաստանից։ Այդ դեպքում դուք իսկապես կունենաք շատ ուժեղ թիմ։ IIHF-ի կանոնակարգը թույլ է տալիս, սակայն մի փոքր երկար գործընթաց է: IIHF-ի կանոնակարգի համաձայն նույնիսկ եթե հոկեյիստը քաղաքացի է, նվազագույնը երկու տարի պետք է ապրի եւ խաղա Հայաստանում, որպեսզի իրավունք ստանա աշխարհի առաջնությունում խաղալ հավաքականի կազմում:

Երեկ հետեւում էի Հայաստան - Իրան հանդիպմանը, որտեղ ձեր ընտրանին հաղթեց 8:0 հաշվով: Սա մեծ քայլ է մարզաձեւի տարածման եւ զարգացման համար»,- ասել է Ռենե Ֆազելը:

Երեւանում անցկացվող տափօղակով հոկեյի տղամարդկանց աշխարհի չորրորդ դիվիզիոնի առաջնությունում Հայաստանի հավաքականը 4 տուրում տարել է 3 հաղթանակ կրել 1 պարտություն: Առաջին տուրում Հայաստանի հավաքականը 24:3 հաշվով հաղթել է Մալայզիայի թիմին, երկրորդ տուրում՝ բուլիտներով 3:2 հաշվով առավելության է հասել Ուզբեկստանի նկատմամբ: Երրորդ տուրում ավելացված ժամանակում 4:5 հաշվով պարտվել է Քուվեյթի թիմին, 4-րդ տուրում 8:0 հաշվով հաղթել Իրանին: Վերջին տուրում Հայաստանը կմրցի Ինդոնեզիայի հետ: Հանդիպումը տեղի կունենա ապրիլի 19-ին:

Հետևեք NEWS.am SPORT-ին Facebook-ում, Twitter և Telegram-ում