Արթուր Չիբուխչյան․ Կարծում եմ՝ աշխարհի առաջնությանը մասնակցած երեխաները հասկացան՝ ինչ մեծ ճանապարհ պետք է անցնեն

Իտալիայում անցկացված շախմատի աշխարհի Մ12 պատանիների եւ աղջիկների առաջնությունում Հայաստանն ունեցել է 14 մասնակից: Թիմի հետ մրցավայրում աշխատել է Հայաստանի հավաքականի նախկին խաղացող, գրոսմայստեր Արթուր Չիբուխչյանը:

NEWS.am Sport-ի թղթակցի հետ զրույցում մարզիչն ամփոփել է արդյունքները։

«Վերջին մրցաշարում մեր արդյունքները լավ չէին: Երեխաները պատրաստ չէին: Մենք էլ գիտեինք, որ պատրաստ չէին, մի քիչ էլ բախտը մեզ չժպտաց:

12 տարեկանների պայքարում Տիգրան Համբարձումյանը հնարավորություն ուներ մեդալ նվաճել, մոտեցել էր, բայց վերջին երկու տուրերում պարտվեց:

8 տարեկանների պայքարում Սոֆիա Բաղրամյանը նաեւ շանս ուներ, բայց նա նույնպես պարտվեց: Երեւում էր, որ զիջում էր, բոլորն էլ զիջում էին:

Աշխարհի առաջնությունը բավականին բարդ էր: Թիմի ընդհանուր պատրաստությունը թույլ էր, չէր համապատասխանում աշխարհի առաջնությանը:

Անցած տարիներին լավ արդյունքներ ենք ունեցել: Էական չէր, թե մեր երեխաների սկզբնական գործակիցներն ինչքան էին, լավ էին հանդես գալիս: Այս տարի մի քանի հոգի ունեինք, որ տարիքով փոքր էին, բայց խաղում էին իրենցից մեծերի հետ, ինչը մեծ առավելություն էր: Ունենք 4-5 լավ երեխա: Պետք է աշխատենք առավելագույնս օգտագործել նրանց հնարավորությունները:

Եվրոպայի առաջնությանը ուրիշ ձեւ ենք պատրաստվում, բայց աշխարհի առաջնությունում զիջում ենք: Շատ եվրոպական երկրներ են զիջում աշխարհի առաջնությունում:

Ասիական երկրներն այդ տարիքային խմբերում ավելի պատրաստ են: Կարծում եմ՝ մեր երեխաները, որոնք մասնակցեցին աշխարհի առաջնությանը, հասկացան՝ ինչ ծավալի եւ մեծ ճանապարհ պետք է անցնեն: Հնդկաստանից, Չինաստանից բացի, արդեն նաեւ Մոնղոլիան, Վիետնամը, Ղազախստանը, Ուզբեկստանը ավելի պրոֆեսիոնալ են եւ լուրջ մրցակցություն են ապահովում այս տարիքային խմբում: Գուցե այդ երկրներից 1-2 ընդգծված երեխաներ են, որոնց հետ մեծ աշխատանք է տարվում: Մենք էլ ունենք այդպիսի լավ երեխաներ, ուղղակի պետք է ճիշտ աշխատել նրանց հետ:

Շատ մեծ դեր ունեն մարզիչները, ծնողները եւ երեխաները: Բոլորն էլ կարեւոր են: Շատ կարեւոր է ոչ միայն մարզչական աշխատանքը, նաեւ երեխաների հոգեբանական, ֆիզիկական պատրաստվածությունը:

Մասնավորապես, աշխարհի առաջնությունը հոգեբանական առումով շատ լարված է ստացվում այն երեխայի համար, որը մեդալային պայքարում է: Միայն աշխարհի առաջնության վրա չպետք է կենտրոնանալ: Տարվա ընթացքում շատ են մրցաշարերը, որոնց բոլորին մեր պատանիները պետք է պատշաճ պատրաստվեն»,- նշեց Արթուր Չիբուխչյանը:

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում