ԱԱ․ Արցախցի Էրիկ Առստամյանը հաղթեց ադրբեջանցի մրցակցին՝ ապահովելով մեդալ

Արցախցի Էրիկ Առստամյանը ադրբեջանցու նկատմամբ հաղթանակով դուրս եկավ բռնցքամարտի երիտասարդների աշխարհի առաջնության կիսաեզրափակիչ՝ ապահովելով առնվազն բրոնզե մեդալ:

Չեռնոգորիայի Բուդվա քաղաքում անցկացվող առաջնության 57 կգ քաշայինների քառորդ եզրափակիչում Էրիկ Առստամյանը 3:2 հաշվով հաղթեց ադրբեջանցի Թաղի Նասիբովին:

Առաջին ռաունդում 17-ամյա բռնցքամարտիկը շատ ակտիվ էր, բայց մրցակցի հարվածները հասնում էին նպատակին: Մրցավարները հաղթանակը տվեցին ադրբեջանցուն:

Երկրորդ ռաունդում Էրիկ Առստամյանն ավելացրեց ճնշումը եւ անցավ հակագրոհի: Ռինգի մրցավարներից 4-ը հաղթանակը տվեցին արցախցի բռնցքամարտիկին: Դահլիճը սկսեց սուլել:

Երրորդ ռաունդում էլ 17-ամյա բռնցքամարտիկը շարունակեց ակտիվ գրոհները եւ գրանցեց  հաղթանակ:

Վազգեն Բադալյանի գլխավորած հավաքականից կիսաեզրափակիչ են դուրս եկել 60 կգ քաշային Անդրանիկ Մարտիրոսյանը եւ 63,5 կգ քաշային Ռաֆայել Ներսիսյանը:

Քառորդ եզրափակիչ դուրս եկած Հայաստանի ներկայացուցիչներ Հեղինե Պետրոսյանը (48 կգ), Արմեն Պողոսյանը (80 կգ) եւ Միսակ Ստեփանյանը (+92 կգ) պարտվել են:

Քիչ անց քառորդ եզրափակիչի մենամարտ կանցկացնի Արշակ Բաբլումյանը (67 կգ): Մրցակիցը  թուրք Ալպերեն Յիլմազն է:  

Հետևեք NEWS.am SPORT-ին Facebook-ում, Twitter և Telegram-ում