Կարեն Աղամալյանը՝ Փարիզից․ Դավիթը հաղթեց շատ ծանր մենամարտում, ցույց տվեց իր կամային հատկանիշները

Դավիթը հաղթեց շատ ծանր մենամարտում: Գոհ եմ ռինգում նրա աշխատանքից, ցույց տվեց իր կամային հատկանիշները: Շնորհավորում եմ բոլորիս եւ շնորհակալ եմ այն մեծ աջակցության համար, որ զգում ենք այստեղ:

Այսպես աշխարհի փոխչեմպիոն Դավիթ Չալոյանի հաղթական մեկնարկը Փարիզի Օլիմպիական խաղերում օլիմպիական մայրաքաղաքից մեկնաբանեց բռնցքամարտի Հայաստանի հավաքականի գլխավոր մարզիչ Կարեն Աղամալյանը NEWS.am Sport-ի թղթակցի հետ զրույցում:

Հուլիսի 29-ին բռնցքամարտի օլիմպիական մրցաշարում Հայաստանի միակ ներկայացուցիչ, աշխարհի փոխչեմպիոն, +92 կգ քաշային Դավիթ Չալոյանը կամային հաղթանակ տարավ Եվրոպական խաղերի չեմպիոն, անգլիացի Դելիշուս Օրիի նկատմամբ:

Լարված պայքարում Չալոյանը Օրիին հաղթեց 3:2 հաշվով եւ պայքարը շարունակում է քառորդ եզրափակիչում:

Հավաքականի գլխավոր մարզիչ Կարեն Աղամալյանի խոսքով Չալոյանը անգլիացուն հաղթեց ծանր ու համառ պայքարում:

«Դավիթը շատ լավ մենամարտ անցկացրեց: Իսկապես շատ ծանր մենամարտ էր: Սա ռեւանշ էր, քանի որ Լեհաստանում անցկացված Եվրոպական խաղերում անգլիացին հաղթել էր նրան կիսաեզրափակիչում: Ռեւանշը կայացած է:

Գոհ եմ ռինգում նրա աշխատանքից, անցկացրած մենամարտից, ցույց տվեց իր կամային որակներ:

Առաջին ռաունդի գնահատականներն այն չէր: Բոլոր 5 մրցավարները անգլիացուն շնորհեցին հաղթանակը, որն այդքան էլ այդպես չէր: Բայց դա չխանգարեց Դավիթին պոկել մենամարտը եւ առավելության հասնել երկրորդ եւ երրորդ ռաունդներում:

Երրորդ ռաունդի վերջնամասում, ըստ մեր տակտիկայի, Դավիթը գնաց պաշտպանության: Ես արդեն զգում էի, որ հաղթում է եւ այդտեղ ճիշտ էր պաշտպանվելը, այլ ոչ գրոհելը:

Շնորհավորում եմ բոլորիս, Դավիթին՝ հրաշալի մենամարտ անցկացնելու համար:

Հաջորդ մրցակիցը նույնպես ուժեղ բռնցքամարտիկ է, իսպանացի Այուբ Ղադֆա Դրիսին է: Նրա հետ նույնպես հանդիպել է Չալոյանը Երեւանում անցկացված Եվրոպայի առաջնությունում եւ պարտվել: Այստեղ էլ սպասում ենք ռեւանշի, մեր երկրորդ ռեւանշին: Իսպանացու հետ նույնպես շատ ծանր մենամարտ է սպասվում:

Հաղթելու դեպքում Չալոյանը կապահովի բրոնզե մեդալ: Այս քաշային կարգում այն էլ Օլիմպիական խաղերում թույլ բռնցքամարտիկ չկա: Մեր հաջորդ մենամարտում էլ պետք է կռիվ տանք, պայքարենք հաղթանակի համար:

Շնորհակալ եմ բոլորին մեծ աջակցության համար, այստեղ մենք զգում ենք բոլորի աջակցությունը»,- ասաց Կարեն Աղամալյանը:

Աշխարհի փոխչեմպիոն Դավիթ Չալոյանը Փարիզի Օլիմպիական խաղերում երկրորդ մենամարտը կանցկացնի օգոստոսի 3-ին, Երեւանի ժամանակով 00:24-ին: Քառորդ եզրափակիչում Չալոյանի մրցակիցը կլինի աշխարհի բրոնզե մեդալակիր, Եվրոպայի չեմպիոն, իսպանացի Այուբ Ղադֆա Դրիսին է:

Դավիթ Չալոյանն առաջին անգամ է մասնակցում Օլիմպիական խաղերին:

Լուսինե Շահբազյան 

Հետևեք NEWS.am SPORT-ին Facebook-ում, Twitter և Telegram-ում