Աշխարհի Գավաթ. Մալխաս Ամոյանը շանս չտվեց թուրք մրցակցին և դուրս եկավ եզրափակիչ (ֆոտո)

Մալխաս Ամոյանն (72 կգ) առանց մրցակիցներին միավոր տալու նվաճեց Սերբիայի մայրաքաղաք Բելգրադում դեկտեմբերի 12-ին մեկնարկած հունահռոմեական ոճի ըմբշամարտի աշխարհի անհատական գավաթի խաղարկության եզրափակիչի ուղեգիր:

Կիսաեզրափակիչում Հայաստանի ներկայացուցիչը մրցեց թուրք Չենգիզ Արսլանի հետ և հաղթեց 7:0 հաշվով: Առաջին մրցափուլից հետո Ամոյանը հաղթում էր 5:0 հաշվով, իսկ երկրորդում վաստակեց ևս 2 միավոր և տարավ վստահ հաղթանակ:

2018թ. աշխարհի ու 2019թ. Եվրոպայի երիտասարդական չեմպիոն Մալխաս Ամոյանը պայքարը սկսել էր 1/8 եզրափակիչից, որտեղ 6:0 հաշվով ուժեղ էր գտնվել 2016թ. Եվրոպայի փոխչեմպիոն, Եվրոպայի եռակի բրոնզե մեդալակիր, սերբ Ալեքսանդր Մաքսիմովիչից: Երկրորդ գոտեմարտում նա 1 րոպե 47 վայրկյանում 12:0 հաշվով տպավորիչ հաղթանակ էր տարել մոլդովացի Վալենտին Պետիչի նկատմամբ:

Դեկտեմբերի 13-ին կայանալիք եզրափակիչում Մալխաս Ամոյանի մրցակիցը կլինի 2016թ. աշխարհի ու 2017թ. Եվրոպայի չեմպիոն, 33-ամյա հունգարացի Բալինտ Կորպաշին:

Առաջին մրցումային օրը Հայաստանն ուներ 5 ներկայացուցիչ, որոնից միայն Մալխաս Ամոյանին էր հաջողվել նվաճել կիսաեզրափակիչի ուղեգիր:

Ռուդիկ Մկրտչյանը (55 կգ) պայքարը սկսեց որակավորման փուլից, որտեղ 0:4 հաշվով պարտվեց աշխարհի մինչեւ 23 տարեկանների փոխչեմպիոն, ռուսաստանցի Էմին Սեֆերշաևին, որը դուրս է եկել եզրափակիչ:

Սլավիկ Գալստյանը (67 կգ) մեկնարկեց 1/8 եզրափակիչից՝ 7:0 հաշվով հաղթելով կուբացի Կրիստոբալ Տորես Նունյեսին: Քառորդ եզրափակիչում Գալստյանը վիճելի մրցավարական որոշումների պայմաններում 4:7 հաշվով պարտվեց Ադրբեջանը ներկայացնող Իսլամբեկ Դադովին, որը նույնպես նվաճել է եզրափակիչի ուղեգիր:

Տոկիոյի Օլիմպիական խաղերի ուղեգիր նվաճած Կարապետ Չալյանը (77 կգ) որակավորման փուլում հաղթահարեց լեհ Իվան Նիլիպիուկի արգելքը (4:0), իսկ 1/8 եզրափակիչում 4:2 հաշվով հաղթեց իտալացի Մատեո Մաֆեցոլիին: Կիսաեզրափակիչի ուղեգիրը գյումրեցի ըմբիշը վիճարկեց կրկնակի օլիմպիական չեմպիոն, ռուս Ռոման Վլասովի հետ և պարտություն կրեց 1:3 հաշվով: Վլասովը նվաճել է եզրափակիչի ուղեգիր:

2018թ. աշխարհի առաջնության բրոնզե մեդալակիր Արթուր Շահինյանը (87 կգ) մեկնարկեց 1/8 եզրափակիչից, որտեղ 2:3 հաշվով պարտվեց 2019թ. երիտասարդների աշխարհի եւ Եվրոպայի չեմպիոն, հունգարացի Իստվան Տակաչին և լքեց պայքարը:

Կարապետ Չալյանը, Ռուդիկ Մկրտչյանը և Սլավիկ Գալստյանը հնարավորություն ստացան դեկտեմբերի 13-ին մասնակցել սփոփիչ գոտեմարտերի և պայքարել բրոնզե մեդալի համար:

Հիշեցնենք, որ Արմեն Մելիքյանը (60 կգ), Գևորգ Ղարիբյանը (63 կգ), Ռուբեն Ղարիբյանը (82 կգ), Արթուր Ալեքսանյանը (97 կգ) և Դավիթ Օվասապյանը (130 կգ) պայքարի մեջ կմտնեն դեկտեմբերի 13-ին: Նրանց առաջին մրցակիցները ևս հայտնի են:

Հետևեք NEWS.am SPORT-ին Facebook-ում, Twitter և Telegram-ում