Արգենտինացի լեգենդար ֆուտբոլիստ Դիեգո Մարադոնան լքել է Արաբական Միացյալ Էմիրությունների առաջնությունում հանդես եկող «Ալ-Վասլ» ակումբի գլխավոր մարզիչի պաշտոնը, հաղորդում է ակումբի պաշտոնական Թվիտերը:
Ակումբի մամուլի ծառայությունը հաղորդել է, որ արգենտինացու հետ մինչեւ հաջորդ տարվա մայիս նախատեսված պայմանագիրը չեղյալ է համարվել:
Երկրի առաջնությունում «Ալ-Վասլը» գրավել էր ընդամենը 8-րդ տեղը, ինչը` Մարադոնայի կարծիքով, կապված էր թիմի ոչ այնքան ուժեղ կազմի հետ: Ապրիլի վերջերին արգենտինական լրատվամիջոցները հաղորդել էին, որ Մարադոնան մտադիր է լքել իր պաշտոնը, եթե ակումբի ղեկավարությունը չկատարի խոստումը եւ կազմի համալրում չիրականացնի: Հետագայում արգենտինացին թիմի ղեկավարության հետ հանդիպման ժամանակ ընդունել էր, որր «զայրույթի պոռթկումները վնաս են հասցնում թիմի շահերին» եւ նա «ոչ մի պարագայում» չի հեռանա «Ալ-Վասլից»:
Հիշեցնենք, որ մինչեւ արաբական ակումբը գլխավորելը Մարադոնան երեք տարի Արգենտինայի գլխավոր մարզիչն էր: Նրա աշխատանքն ավարտվեց 2010թ. աշխարհի առաջնության քառորդ եզրափակիչում Գերմանիայի հավաքականից կրած 0:4 խոշոր հաշվով պարտությունից հետո:
Հետևեք NEWS.am SPORT-ին Facebook-ում, Twitter և Telegram-ում