Մոսկվայում կայացավ Տիգրան Պետրոսյանի հիշատակին նվիրված «Տաշիր» մրցաշարի պարգեւատրությունն ու փակման արարողությունը: Թեեւ 7-րդ տուրում Լեւոն Արոնյանը սեւերով հաղթեց ռուսաստանցի Էռնեստո Ինարկիեւին, սակայն դա նրան չօգնեց մրցաշարում զբաղեցնել երրորդ տեղը: Նա վաստակեց 4 միավոր եւ իսրայելցի Բորիս Գելֆանդի հետ կիսեց 3-4-րդ տեղերը, սակայն լրացուցիչ ցուցանիշներով զբաղեցրեց 4-րդ տեղը:
5.5 միավորով առաջին տեղը գրավեց ռուսաստանցի Ալեքսանդր Գրիշչուկը, ով արժանացավ 25 հազար եվրոյի եւ հատուկ մրցանակի, որի հեղինակն է հայտնի քանդակագործ Գեորգի Ֆրանգուլյանը: Ռուս գրոսմայստերը իր հաղթանակը նվիրեց դստերը:
Երկրորդ տեղը զբաղեցրած Վլադիմիր Կրամնիկը շնորհակալություն հայտնեց կազմակերպիչներին եւ հայտարարեց, որ սա իր մասնակցած մրցաշարերի մեջ լավագույններից մեկն էր՝ կազմակերպչական տեսանկյունից:
Իսկ երրորդ տեղը զբաղեցրած իսրայելցի Բորիս Գելֆանդը, հպարտությամբ նշեց, որ Տիգրան Պետրոսյանի հիշատակը շատ վառ է մնում նաեւ իրենց երկրում:
Պարգեւատրությանը ներկա էին ՖԻԴԵ նախագահ Կիրսան Իլյումժինովը, ռուսաստանի շախմատային ֆեդերացիայի նախագահ Անդրեյ Ֆիլատովը, Ռուսաստանի ազգային օլիմպիական կոմիտեի նախագահ Ալեքսանդր Ժուկովը, «Տաշիր» խմբի նախագահ Սամվել Կարապետյանը:
Հիշեցնենք, որ Տիգրան Պետրոսյանի հիշատակին նվիրված մրցաշարին մասնակցում էին Լեւոն Արոնյանը (Հայաստան), Վլադիմիր Կրամնիկը, Ալեքսանդր Գրիշչուկը, Ալեքսանդր Մորոզեւիչը, Էռնեստո Ինարկիեւը (բոլորը՝ Ռուսաստան), Բորիս Գելֆանդը (Իսրայել), Պետեր Լեկոն (Հունգարիա) եւ Դինգ Լիրենը (Չինաստան):
Շուշանիկ Հակոբյան (Մոսկվա)
Հետևեք NEWS.am SPORT-ին Facebook-ում, Twitter և Telegram-ում
12:20 , 4 մայիսի 
11:37 , 4 մայիսի 
10:47 , 4 մայիսի 
09:03 , 4 մայիսի 
01:19 , 4 մայիսի 
00:59 , 4 մայիսի 
23:47 , 3 մայիսի 
23:37 , 3 մայիսի 
23:13 , 3 մայիսի 
22:04 , 3 մայիսի 
