Ռոբերտ Արզումանյան. Պորտուգալիան ու Ռոնալդուն այժմ ավելի ուժեղ են, իսկ Դանիան ավելի զգույշ կխաղա մեր դեմ

Կարող էինք հայտնվել ավելի հեշտ խմբում, բայց եթե արժանի ենք խաղալ Եվրոպայում, ուրեմն պետք է դուրս գանք նաեւ այս խմբից:

Այս մասին NEWS.am Sport-ի թղթակցի հետ զրույցում ասաց Հայաստանի ազգային հավաքականի եւ ղազախական «Ակտոբեի» պաշտպան Ռոբերտ Արզումանյանը, ով մեկնաբանեց ֆուտբոլի Եվրոպայի 2016թ. առաջնության ընտրական մրցաշարի վիճակահանության արդյունքները: Եվրո-2016-ի ընտրական փուլում Հայաստանի հավաքականը, Պորտուգալիայի, Դանիայի, Սերբիայի եւ Ալբանիայի թիմերի հետ ընդգրկվել է վերջին՝ I խմբում:

Ռոբերտ, Հայաստանի հավաքականը I խմբի իր բոլոր մրցակիցների հետ արդեն խաղացել է: Ի՞նչ կասես նրանց մասին: Վերջին տարիներին նրանք ավելացրել են, թե՝ թուլացել:

Ես խաղացել եմ բոլոր հավաքականների դեմ, բացի Ալբանիայից: Այսօր Պորտուգալիան եւ Սերբիան մի քիչ այլ թիմեր են, քան այն ժամանակ: Դանիան էլ արդեն մեզ հետ ավելի զգույշ կխաղա, ինչպես խաղաց այստեղ՝ Երեւանում: 2007-ի հետ համեմատ՝ Պորտուգալիան ավելի ուժեղ թիմ է: Ռոնադուն էլ նույնպես այժմ ավելի ուժեղ է, քան այն ժամանակ: Նրանից շատ բան է կախված Պորտուգալիայի հավաքականում: Սերբիան այսօր ունի ավելի երիտասարդ թիմ, բայց դրանից նրանք չեն թուլացել: Հիմա նրանք ավելի ուժեղ են, սակայն մենք նույնպես այժմ ավելի ուժեղ ենք, քան այն ժամանակ:

Ըստ քեզ՝ բա՞րդ խմբում հայտնվեցինք: Ո՞ր խմբում կցանկանայիր տեսնել Հայաստանի հավաքականին:

Մեր խումբը բարդ է: Կարող էինք հայտնվել ավելի հեշտ խմբում, բայց եթե արժանի ենք խաղալ Եվրոպայում, ուրեմն պետք է դուրս գանք այս խմբից, իսկ եթե ոչ, ապա ամենահեշտ խմբից էլ դուրս չէինք գա: Այնպես որ պետք է պատրաստվենք ու յուրաքանչյուր խաղ անցկացնենք այնպես, կարծես դա եզրափակիչն է:

Վերա Մարտիրոսյան

Հետևեք NEWS.am SPORT-ին Facebook-ում, Twitter և Telegram-ում