Պետք է մոռանալ Սոֆիայում տեղի ունեցածը եւ կենտրոնանալ առաջիկա խաղի վրա, հաղթանակի դեպքում հույսով կմեկնենք Իտալիա:
Այդ մասին Հայաստանի ազգային հավաքականի մարզումից հետո լրագրողների հետ զրույցում ասաց Հայաստանի ազգային հավաքականի եւ Դորտմունդի «Բորուսիայի» կիսապաշտպան Հենրիխ Մխիթարյանը:
Հիշեցնենք, որ Սոֆիայում Հայաստանը պարտվել է 0:1 հաշվով:
«Մենք տանը հաղթանակներ չենք տոնել, բայց ունենք դեռ երկու շատ կարեւոր հանդիպում, որոնց պատրաստվում ենք շատ լրջորեն: Բուլղարիայում կայացած առաջին խաղն արդեն անցյալ է: Ինչ եղավ այնտեղ, պետք է մոռանալ: Մեզ պետք է կենտրոնանալ այս խաղի վրա եւ լավ հանդես գալ: Այս մրցաշրջանում մենք գրեթե բոլոր խաղերը անցկացրել ենք կորուստներով: Մենք ունենք ազգային հավաքականի մարզիչ, ով կփորձի լուծել բացակա ֆուտբոլիստների հարցը:
Ավագի հարցը կարծում եմ կարեւոր չէ քննարկել: Ով կխաղա, չգիտեմ: Իսկ դուք Բերեզովսկուն արդեն հանե՞լ եք: Թե ինչու ես Չեխիայի հավաքականին հաղթելուց հետո ասացի, որ «շատերի բերանը փակեցինք»: Դա պատասխան էր բոլոր այն մարդկանց, ովքեր կարծում էին, թե ազգային հավաքականի հաղթանակները պատահականություն էին, որ այժմ հավաքականը անկում է ապրում: Մենք ազգ ենք ներկայացնում: Եվ պետք է ներկայացնենք մեր երկիրը: Մենք խաղում ենք մեր ազգի համար, այն մարզկանց համար, ովքեր ներկայացնում են Հայաստանը:
Բուլղարիայի հավաքականում ոչ մեկի չեմ առանձնացնի: Նրանք ընդհանուր լավ տպավորություն են թողնում: Մենք ավելի լավ է կենտրոնանանք մեր թիմի վրա: Մեզ հետաքրքիր խաղ է սպասվում:
Չեմ կարող ասել, որ ամեն բան որոշվելու է այս խաղում: Եթե մենք երեք միավոր վաստակենք, ապա Իտալիայում հույսերը կպահպանվեն, բայց այս պահին առաջնայինը Բուլղարիան է:
Փորձում եմ առավելագույնս լավ մարզավիճակում լինել թե Հայաստանի ազգային հավաքանում, թե «Բորուսիայում»,- ասել է Հենրիխ Մխիթարյանը:
Հոկտեմբերի 11-ին Հայաստանի հավաքականը կընդունի բուլղարացիներին, իսկ հոկտեմբերի 15-ին կհյուրընկալվի Իտալիայի հավաքականին, որն արդեն ապահովել է առաջին տեղն ու ուղեգիրը:
Վերա Մարտիրոսյան
Ֆոտո՝ Արսեն Սարգսյանի
Հետևեք NEWS.am SPORT-ին Facebook-ում, Twitter և Telegram-ում