«Ալբանացիները նույնպես հանդիպում էին այդ դժվարություններին, բայց նրանք սովոր էին, իսկ մենք Հայաստանում խաղում ենք շատ լավ խոտածածկի վրա»:
Այդ մասին NEWS.am Sport-ի թղթակցի հետ զրույցում պատմեց Հայաստանի ազգային հավաքականի եւ հոլանդական «Վիլլեմ Երկրորդի» կիսապաշտպան Նորայր Ասլանյանը:
Նորայր, ի՞նչ կասեք Ալբանիա – Հայաստան խաղի մասին: Ինչո՞ւ հավաքականի խաղը ձախողվեց:
Խաղադաշտը շատ վատ վիճակում էր: Խոտը լավ հնձված չէր: Ամբողջ խաղադաշտում փոսեր էին: Հայաստանի հավաքականը ավելի շատ խաղում է կարճ փոխանցումներով, իսկ այստեղ խաղադաշտը թելադրում էր խաղալ ավելի շատ երկար փոխացումերով եւ օդային խաղ, որը մերը չէր:
Բայց ալբանացիների խաղը ստացվում էր այդ խաղադաշտում:
Այո՛, նրանք նույնպես հանդիպում էին այդ դժվարություններին, բայց նրանք սովոր էին: Հայաստանում խաղում ենք շատ լավ խոտածածկի վրա: Իհարկե, չի կարելի ամբողջ մեղքը գցել խաղադաշտի վրա: Կային նաեւ այլ խնդիրներ, բայց հիմնականը դա էր:
Ի՞նչ այլ խնդիրներ կային:
Այդ օրը Ալբանիայի պաշտպանությունը շատ լավ էր խաղում: Դժվար էր հարձակվելը, բայց սա ընկերական խաղ է: Մենք պետք է պատրաստվենք Չեխիայի դեմ խաղին:
Այնպիսի տպավորություն էր, թե ֆուտբոլիստները անտրամադիր եւ ընկճված են դուրս եկել խաղադաշտ:
Ո՛չ, ես նման բան չեմ նկատել: Բոլորն էլ լավ տրամադրություն ունեին:
Խաղից հետո մարզիչը ձեր հետ հոգեբանական աշխատանք տարա՞վ:
Այո՛, բայց դա մեր թիմի մեջ է: Դա սովորական է, երբ մարզիչը թիմի հետ աշխատանք է կատարում պարտությունից հետո:
Ի՞նչ կասես քո խաղի մասին:
Տասը րոպե խաղացի: Դժվար է գնահատական տալ: Կձգտեմ անել ամեն ինչ, որ ինձ ավելի շատ ժամանակ վստահեն:
Այսօր «Վիլլեմ Երկրորդը» հանդիպում ունի: Մասնակցելո՞ւ ես:
Ո՛չ, երեկ վերադարձա թիմ: Չհասցրեցի: Շատ գոհ եմ իմ նոր թիմից: Մարզիչը ինձ շատ է վստահում: Սա ուժեղ թիմ է: Այժմ նրանք դուրս են մնացել բարձրագույն խմբի առաջնությունից, բայց վստահ եմ՝ կվերադառնան:
Վերա Մարտիրոսյան
Հետևեք NEWS.am SPORT-ին Facebook-ում, Twitter և Telegram-ում