Թբիլիսի. Եվրոպայի փոխչեմպիոն Վանիկ Ավետիսյանը մեդալ չնվաճեց

Հայաստանի ներկայացուցիչներ Վանիկ Ավետիսյանը եւ Ռոստամ Կարապետյանը մեդալ չնվաճեցին Թբիլիսիում ընթացող ծանրամարտի Եվրոպայի առաջնությունում, որում հանդես եկան 69 կգ քաշային կարգում: 

Եվրոպայի գործող փոխչեմպիոն Վանիկ Ավետիսյանը երկամարտի 312 կգ (137+175) արդյունքով գրավեց չորրորդ տեղը, իսկ Ռոստամ Կարապետյանը երկամարտում հավաքեց 308 կգ (138+170)՝ գրանցելով 6-րդ արդյունքը:

Նախորդ տարի Թել Ավիվում կայացած Եվրոպայի առաջնությունում Վանիկ Ավետիսյանը արծաթե մեդալ էր նվաճել երկամարտի 315 կգ (140+175) արդյունքով:

Հիշեցնենք, որ ապրիլի 12-ին Վրաստանի մայրաքաղաքում պայքարի մեջ էր մտել նաեւ կանանց մրցաշարում Հայաստանի առաջին ներկայացուցիչ Աննա Գովելյանը, ով 6-րդ տեղն էր գրավել 53 կգ քաշային կարգում: Մրցումների առաջին օրը 56 կգ քաշային Սմբատ Մարգարյանը դարձել էր Եվրոպայի փոխչեմպիոն:

Ապրիլի 13-ին Հայաստանի ներկայացուցիչներից ելույթ կունենա միայն 58 կգ քաշային Իզաբելա Յալյանը: