ԵԱ. Արփինե Դալալյանը չորրորդն է
15:34 11 ապրիլի, 2021Հայաստանի ներկայացուցիչ Արփինե Դալալյանը չորրորդ տեղը գրավեց Մոսկվայում ավարտին մոտեցող ծանրամարտի Եվրոպայի առաջնությունում:
Կանանց +87 կգ քաշայինների պայքարում 22-ամյա մարզուհին երկամարտում գրանցեց 221 կգ (95+126) արդյունք:
Պոկում վարժությունում Դալալյանը երրորդ մոտեցմամբ միայն կարողացավ բարձրացնել 95 կգ-ոց ծանրաձողը եւ գրանցեց 6-րդ արդյունք:
Հրում վարժությունում առաջին մոտեցմամբ գլխավերեւում պահեց 125 կգ, երկրորդ եւ երրորդ փորձին չմոտեցավ:
Եվրոպայի չեմպիոնի կոչումը նվաճեց Մեծ Բրիտանիայի ներկայացուցիչ Էմիլի Քեմփբելը, որը երկամարտում հավաքեց 276 կգ (122+154): Երկրորդ տեղը զբաղեցրեց Ուկրաինայի ներկայացուցիչ Անաստասիա Լիսենկոն՝ 252 կգ (116+136), իսկ բրոնզե մեդալը բաժին հասավ թուրք Մելիկե Գունալին՝ 243 կգ (108+135)։
Նախորդ` Բաթումիում անցկացված Եվրոպայի առաջնությունում Դալալյանը +87 կգ քաշային կարգում երկամարտի 240 կգ արդյունքով կրկին չորրորդ տեղում էր։ Պոկում վարժությունում Դալալյանը բարձրացրել էր 105, հրում վարժությունում՝ 135 կգ։
+109 կգ քաշայինների պայքարում Հայաստանը կներկայացնեն օլիմպիական փոխչեմպիոն, աշխարհի փոխչեմպիոն Գոռ Մինասյանը եւ Վարազդատ Լալայանը։
Հիշեցնենք, որ Մոսկվայում Հայաստանի ներկայացուցիչներից Եվրոպայի չեմպիոնի կոչումը երկամարտում նվաճել են Կարեն Ավագյանը (89 կգ) և Սամվել Գասպարյանը (102 կգ), Արսեն Մարտիրոսյանը (102 կգ) դարձել է Եվրոպայի փոխչեմպիոն, իսկ Անդրանիկ Կարապետյանը (89 կգ), Հակոբ Մկրտչյանը (96 կգ) և Լիանա Գյուրջյանը (81 կգ) նվաճել են բրոնզե մեդալ: Իզաբելլա Յայլյանը (55 կգ) և Ռաֆիկ Հարությունյանը (81 կգ) գրավել են չորրորդ տեղը, Տաթեւ Հակոբյանը (87 կգ) զբաղեցրել է 9-րդ տեղը, իսկ Դավիթ Հովհաննիսյանը (96 կգ) եւ Սիմոն Մարտիրոսյանը (109 կգ) զրո էին ստացել հրում վարժությունում:
Եվրոպայի առաջնությունը վարկանիշային է Տոկիոյի Օլիմպիական խաղերի համար:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.